តាកែវ៖ មន្ត្រីជំនាញសាខា ក.ប.ប ខេត្តតាកែវបញ្ជាក់ថាការលក់ផលិតផល មុខម្ហូបអាហារ របស់អាជីវករក្នុងស្តង់ពិព័រណ៍ខ្មែរ ក្នុងក្រុងដូនកែវ ខេត្តតាកែវ មិនមានសាធាតុគីមី ឬផលិតផលហួសកាបរិច្ឆេទទេ ដូច្នេះបងប្អូនប្រជាពលរដ្ឋដែលមកទស្សនាកម្សាន្តអាចទិញពិសាបានទៅតាមតម្រូវការរបស់ខ្លួន ។
ការបញ្ជាក់យ៉ាងដូច្នេះគឺ ក្រោយពេលដែលលោក លី សេរីសម្បត្តិ ប្រធានសាខា ក.ប.ប ខេត្តតាកែវ សហការជាមួយនិងមន្ទីរពណិជ្ជកម្មខេត្ត នៅរសៀលថ្ងៃទី ២២ ខែមករា ឆ្នាំ២០២១នេះ បានធ្វើការចុះត្រួតពិនិត្យទំនិញនិងមុខម្ហូបមួយចំនួន ដែលដាក់តាំងលក់នៅក្នុងស្តង់ពិព័រណ៍ខ្មែរដើម្បីរកសាធាតុគីមីទៅលើមុខម្ហូប បង្គា មឹក ស្លាបមាន់ ប្រហិត គុយទាវ មី និងផលិតផលក្លែងក្លាយ ហួសកាលបរិច្ឆេទ ដើម្បីជាការធានាពីសុវត្ថិភាពរបស់ប្រជាពលរដ្ឋ ដែលចូលទស្សនានិងហូបអាហារ ក្នុងការដាក់តាំងពិព័រណ៍ផលិតផលខ្មែរ នៅក្នុងក្រុងដូនកែវ ខេត្តតាកែវ ដែលមានរយៈពេល ចាប់ពីថ្ងៃទី ២០ ខែមករា ឆ្នាំ២០២១ ដល់ថ្ងៃទី ២៦ ខែមករា ឆ្នាំ២០២១ ។
សូមបញ្ជាក់ផងដែរថា ជុំវិញការដាក់ឲ្យមានការតាំងពិព័រណ៍នេះដែរ គឺអាជ្ញាធរខេត្តបានយកចិត្តទុកដាក់ខ្ពស់ ដោយណែនាំឲអ្នករៀបចំការតាំងពិព័រណ៍នោះ ត្រូវគោរពឲ្យបាននូវគោលការណ៍ណែនាំ របស់ក្រសួងសុខាភិបាល ក្នុងការរួមគ្នាទប់ស្កាត់ការឆ្លងរីករាលដាលនៃជំងឺកូវីដ១៩ ដោយតម្រូវមុនចូលស្តង់ពិព័រណ៍ ត្រូវវាស់ស្ទង់កម្តៅ បាញ់អាល់កុល និងចែកម៉ាសដោយមិនគិតថ្លៃដល់អ្នកដែលចូលទស្សនាទិញផលិតផលផងដែរ ៕ រក្សាសិទ្ធិដោយ៖ តាកែវ
