ស្ទឹងត្រែង៖គ្រោះថ្នាក់ចរាចរណ៍ដ៏កម្រមួយ បានកើតឡើងបុកជាប់គ្នាខាងលិចស្ពានមេគង្គ ស្រុកថាឡាបរិវ៉ាត់ ខេត្តស្ទឹងត្រែង វេលាម៉ោង ៥ ល្ងាចថ្ងៃទី ២៤ ខែមករា ឆ្នាំ ២០២១។
តាមប្រភពព័ត៌មានពីប្រជាពលរដ្ឋនៅក្បែរកន្លែងកើតហេតុ បានប្រាប់ឲ្យដឹងថា មានរថយន្តប្រភេទយីឌុប ១ គ្រឿង ដឹកដំឡូងមីបានខូចអែបម្ខាងផ្លូវ ក្នុងទិសដៅពីលិចទៅកើតនៅលើផ្លូវជាតិលេខ ៩ ខាងលិចស្ពានមេគង្គ។ រីឯរថយន្តយីឌុបមួយគ្រឿងទៀត បានបើកបរចុះពីលើស្ពានមេគង្គ ក្នុងទិសដៅពីកើតទៅលិច លុះពេលរថយន្តចុះពីស្ពានមេគង្គ មកដល់កន្លែងរថយន្តយីឌុបដឹកដំឡូងមី កំពុងខូចគាប់ជួនមានរថយន្តដឹកត្រាក់ទ័រកាយដី ក្នុងទិសដៅពីលិចមកកើតក៏បានបុកព្រមគ្នាគាបជាប់ទាំង ៣គ្រឿងតែម្ដង។
ខណៈពេលនេះអ្នកធ្វើដំណើរតាមរថយន្តតូចធំមិនអាចឆ្លងកាត់ពីក្រុងស្ទឹងត្រែង ទៅកាន់ខេត្តព្រះវិហារ និងពីខេត្តព្រះវិហារ មកកាន់ក្រុងស្ទឹងត្រែងបានទេ ពីព្រោះរថយន្តទាំង ៣ គ្រឿងនេះបានគាបជាប់នៅលើផ្លូវមិនទាន់អូសចេញនៅឡើយ។ ហេតុការណ៍នេះមិនបង្កឱ្យមានគ្រោះថ្នាក់អាយុជីវិតនរណាម្នាក់ទេ៕ រក្សាសិទ្ធិដោយ៖សំណាង
