ភ្នំពេញ ÷ ស្ត្រី២នាក់ម្តាយ និងកូន បានបើករថយន្តក្នុងល្បឿនលឿន មិនប្រយ័ត្នបណ្ដាលឲ្យរេចង្កូតជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តខ្ទេចមួយកំណាត់មុខស្ទើរទាំងស្រុង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៨និង៣០នាទីយប់ថ្ងៃអង្គារទី២៦ ខែមករា ឆ្នាំ២០២១
ស្ថិតតាមបណ្ដោយផ្លូវសហពន្ធរុស្ស៊ីចំណុចជិតច្រកព្រលានយន្តហោះពោធិ៍ចិនតុងថ្មី
ក្នុងសង្កាត់កាកាប២ ខណ្ឌពោធិ៍សែនជ័យ។
បើយោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេឃើញស្ត្រីម្នាក់ រួមទាំងកូនស្រីបើករថយន្តម៉ាកCHEVROLET ពណ៌សមួយគ្រឿងពាក់ផ្លាកលេខភ្នំពេញ 2-AJ 3399 ធ្វើដំណើរតាមបណ្តោយផ្លូវសហព័ន្ធរុស្ស៊ីក្នុងទិសដៅពីកើតទៅលិច ក្នុងល្បឿនយ៉ាងលឿន ខណៈពេលមកដល់ចំណុចកើតហេតុខាងលើ មិនប្រយ័ត្នបានរេចង្កូតជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យស្ត្រីជាម្ដាយរងរបួសធ្ងន់ និងកូនស្រីរួមដំណើរជាមួយរងរបួសស្រាល ត្រូវបានរថយន្តសាម៉ុយគ្លីនិចឯកជន ដឹកយកទៅសង្គ្រោះភ្លាមៗ។
ក្រោយកើតហេតុសមត្ថកិច្ចមូលដ្ឋាន សហការជាមួយនិងជំនាញចរាចរណ៍ បានចុះមកដល់ចំណុចកើតហេតុ រួចក៏បានទាក់ទងទៅខាងជំនាញចរាចរណ៍ផ្លូវគោក មកវាស់វែងនិងធ្វើកំណត់ហេតុ យករថយន្តបង្កទៅស្នងការរាជធានីភ្នំពេញរង់ចាំដោះស្រាយតាមផ្លូវច្បាប់៕ រក្សាសិទ្ធិដោយ៖ សាមេត
