ភ្នំពេញៈ ក្រុមវេជ្ជបណ្ឌិតចិននឹងមកធ្វើបទឧទ្ទេសនាមបង្ហាញអំពីការប្រើប្រាស់វ៉ាក់សាំង ការទុកដាក់វ៉ាក់សាំង និងការចាក់វ៉ាក់សាំងការពារជំងឺកូវីដ-១៩ ដល់ក្រុមគ្រូពេទ្យរបស់ក្រសួងសុខាភិបាល និងក្រុមគ្រូពេទ្យរបស់កងយោធពលខេមរភូមិន្ទ នៅរសៀលថ្ងៃទី៣ ខែកុម្ភៈ ឆ្នាំ២០២១នេះ នៅមន្ទីរពេទ្យព្រះកេតុមាលា។ នេះបើតាមការបញ្ជាក់របស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ប្រាប់ CEN នៅព្រឹកថ្ងៃទី៣ ខែកុម្ភៈ ឆ្នាំ២០២១។
មុននឹងធ្វើបទឧទ្ទេសនាមនេះ សម្ដេចពិជ័យសេនា ទៀ បាញ់ និងលោក Wang Wen Tian ឯកអគ្គរដ្ឋទូតចិនប្រចាំកម្ពុជា ជួបសំណេះសំណាលជាមួយក្រុមគ្រូពេទ្យចាក់វ៉ាក់សាំងការពារជំងឺកូវីដ-១៩ និងក្រុមវេជ្ជបណ្ឌិតចិន នៅមន្ទីរពេទ្យព្រះកេតុមាលា នៅវេលាម៉ោង ២រសៀល ថ្ងៃទី៣ ខែកុម្ភៈ ឆ្នាំ២០២១ នេះ។
សម្តេចពិជ័យសេនា ទៀ បាញ់ បានមានប្រសាសន៍ថា វ៉ាក់សាំងចាក់ការពារជំងឺកូវីដ-១៩ គឺជារឿងថ្មីចំពោះកម្ពុជា បើទោះបីជាយើងមានពេទ្យក៏ដោយ ជាការចាំបាច់ត្រូវតែមានការឧទ្ទេសនាមពីក្រុមវេជ្ជបណ្ឌិតចិន ដើម្បីក្រុមគ្រូពេទ្យកម្ពុជាប្រើប្រាស់ចំទិសដៅ និងមានប្រសិទ្ធភាព។ ក្រុមវេជ្ជបណ្ឌិតចិនដែលមកធ្វើឧទ្ទេសនាមមានចំនួន ៤នាក់ ដែលមានជំនាញខាងប្រើប្រាស់វ៉ាក់សាំង និងការទុកដាក់ ការដឹកជញ្ជូន និងការថែរក្សាជាដើម។
សម្តេចពិជ័យសេនាបានបញ្ជាក់ថា “តាមចំនួនវ៉ាក់សាំងដែលមាន គឺមន្ត្រីយោធានឹងអាចទទួលបានវ៉ាក់សាំងចាក់ការពារទាំងអស់ ហើយវ៉ាក់សាំងនេះទៀតសោត តាមដែលសម្តេចដឹង គឺត្រូវចាក់ម្នាក់ពីរដូស ពោលគឺត្រូវចាក់ចំនួនពីរដង”។
ទាក់ទងវ៉ាក់សាំងការពារជំងឺកូវីដ១៩ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងនៅក្នុងពិធីបើកការដ្ឋានសាងសង់រោងចក្រប្រព្រឹត្តិកម្មទឹកស្អាតបាក់ខែង និងសម្ពោធដាក់ឲ្យប្រើប្រាស់ផ្លូវការរោងចក្រប្រព្រឹត្តកម្មទឹកស្អាតចំការមនកាលពីថ្ងៃទី១ ខែកុម្ភៈ ថា វ៉ាក់សាំងដែលកម្ពុជានឹងទទួលបានប្រមាណ ២០លានដូស។ ក្នុងនោះទទួលបានជំនួយពីចិន ១លានដូស ដែលនឹងមកដល់ខែកុម្ភៈ ចំនួន ៦០ម៉ឺនដូស ទទួលពីកូវ៉ាក់ ដែលជារបស់អង្គការសុខភាពពិភពលោក ៧លានដូស និងទិញតាមកូវ៉ាក់១លានដូស ព្រមទាំងទទួលបានតាមរយៈជំនួយពីអូស្ត្រាលីខ្ទង់៣លានដូស។ ក្រៅពីនោះកម្ពុជាពិចារណាទិញពីប្រទេសអង់គ្លេសផងដែរ។
សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់ទៀតថា បើវ៉ាក់សាំងមួយដូសតម្លៃចន្លោះពី ៤ ទៅ ៥ដុល្លារ គឺព្រះរាជអំណោយព្រះមហាក្សត្រ និងមហាក្សត្រី ព្រមទាំងការចូលរួមរបស់ប្រជាពលរដ្ឋខ្មែរជាង ៥៧លានដុល្លារ គឺគ្រប់គ្រាន់ហើយ៕ រក្សាសិទ្ធិដោយៈ ចេស្តារ
