កាលពីពេលថ្មីៗនេះ មហានជនពិតជាមានការភ្ញាក់ផ្អើល និងសម្តែងការមិនសប្បាយចិត្តសោះឡើយ ក្រោយពីបានឃើញសារពីអាណាព្យាបាល២នាក់ បានសម្រេចធ្វើការបកអាក្រាតនៅលើបណ្តាញសង្គម បង្ហាញពីទង្វើររបស់គ្រូបង្រៀននៅសាលាសន្ធរម៉ុក តម្រូវឲ្យសិស្សរៀនគួរ បើមិនដូច្នេះ នឹងត្រូវដេញចេញក្រៅថ្នាក់ ហើយបើមិនរៀនគួរទេ ក៏ត្រូវបង់លុយ១ខែ ៦ ម៉ឺនរៀល ដែរ ជាថ្លៃដឹងគុណគ្រូ។
ក្នុងនោះ អាណាព្យាបាលម្នាក់ ដែលមានគណនីហ្វេសប៊ុកឈ្មោះ Bunthoeun Ev បានបង្ហោះឲ្យដឹងថា «កូនស្រីខ្ញុំត្រូវបានអ្នកគ្រូសាលាសន្ធរម៉ុក បណ្តេញចេញពីថ្នាក់ តាមសម្តីអ្នកគ្រូបាននិយាយថា បើមិនរៀនគួរទេ ទៅរកគ្រូរកសាលាណារៀនផ្សេងទៅ នៅសាលាសន្ធម៉ុក បើមិនរៀនគួរក៏ត្រូវបង់លុយដឹងគុណគ្រូមួយខែ ៦០០០០៛ ដែរ sic តើខ្ញុំរស់បានដល់ពេលណា បើខ្ញុំខំរកលុយអោយកូនរៀនគួរមិនបានផង»។
យ៉ាងណាមិញ ក្រោយករណីនេះបានផ្ទុះឡើង មន្ទីរអប់រំរាជធានីភ្នំពេញ ក៏បានធ្វើការស្រាវជ្រាវ និងរកឃើញថា គ្រូបង្រៀនម្នាក់នៅសាលាបឋមសិក្សាសន្ធរម៉ុក ពិតជាបានទារប្រាក់ចំនួន ៦ ម៉ឺនរៀល ក្នុង១ខែ ពីកូនសិស្សមែន។ ហើយក្រសួងក៏បានបញ្ជាក់ថា ករណីនេះនឹងបើកការប្រជុំបន្ទាន់ផងដែរ។
ជាមួយនឹងទង្វើរល្មើសនឹងបម្រាមរបស់ក្រសួងនេះផងដែរ ក្នុងនោះលោកគ្រូម្នាក់បានលើកឡើងថា «ខ្ញុំក៍ជាគ្រូបង្រៀនម្នាក់ដែរ ឥឡូវនេះ កាលពីតូចខ្ញុំជាសិស្សល្ងង់ភ័យខ្លាចអត់លុយឲ្យគ្រូ ថ្លៃសៀវភៅតាមដានថ្លៃ ប្រលង ភ័យមិនហ៊ានចង់ទៅរៀន ទើបខ្ញុំស្អប់រូបភាពនិងណាស់ ក្រសួងធ្វើតាមច្បាប់ទៅ ហើយមិនដឹងថាមានតែគ្រូម្នាក់ឬក៍មានផ្សេងទៀត សម្រាប់កូនអ្នកមានវាជាលុយតិចតួចតែសម្រាប់កូនអ្នកក្រវិញ ស្ទើរតែបោះបង់ការសិក្សា ព្រោះថ្លៃនេះថ្លៃនោះនិងហើយ»។ ដោយឡែក មតិអាណាព្យាបាលម្នាក់ ក៏បានស្នើក្រសួងចាត់វិធានលើបញ្ហានេះថា៖ «ក្រសួងគួរចាត់វិធានការផង រឿងបង្ខំសិស្សអោយរៀនគួរឥតល្ហែដោយសារតែនៅក្នុងការបញ្ចេញមតិរបស់អាណាព្យាបាលនីមួយៗដូចៗគ្នា កូនៗទេីបរៀននៅត្រឹមបឋម រៀនគួររកម៉ោងទំនេរគ្មាន កូនម្នាក់ៗគ្នាចង់ឈឺអស់ហេីយ។»។
នេះបើយោងតាមការប្រកាសលេខ ៥១៣ អយក.ប្រក របស់ក្រសួងអប់រំ និងកីឡា ចុះថ្ងៃទី១២ ខែមេសា ឆ្នាំ២០០៥ «ស្តីពីការលុបបំបាត់ការប្រមូល និងរៃអង្គាសប្រាក់ពីសិស្ស នៅតាមសាលារៀនបឋមសិក្សា និងមធ្យមសិក្សាសាធារណៈ» ដោយក្នុងនោះក្រសួងបានធ្វើការព្រមានថា គ្រប់សាលារៀនចំណេះទូទៅសាធារណៈ (បឋមសិក្សា និងមធ្យមសិក្សា) ហាមដាច់ខាតមិនឲ្យមានការប្រមូល ឬ រៃអង្គាសប្រាក់ ឬ ការសុំសំភារៈផ្សេងៗ ក្រៅផ្លូវការគ្រប់រូបភាពពីសិស្ស។
តាមរយៈបម្រាមខាងលើនេះ ក្រសួងក៏បានបញ្ជាក់ឲ្យដឹងថា រាល់អំពើទាំងឡាយ ដែលផ្ទុយនឹងប្រការនេះ នឹងត្រូវទទួលទោសពិន័យដូចមានចែងក្នុងច្បាប់ ស្តីពីសហកន្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា៕ រក្សាសិទ្ធិដោយ៖ លឹម ហុង
