ភ្នំពេញ ៖ សម្តេចពិជ័យសេនា ទៀ បាញ់ ប្រមុខការពារជាតិកម្ពុជាបានបញ្ជាក់ថា វ៉ាក់សាំងការពារជំងឺកូវីដ-១៩ ចំនួន ៦០ម៉ឺនដូស ដែលរដ្ឋាភិបាល នៃសាធារណរដ្ឋប្រជាមានិតចិនផ្តល់ឲ្យកម្ពុជាដំណាក់កាលទី១ នឹងដឹកតាមយន្តហោះពិសេសពីប្រទេសចិនមកដល់កម្ពុជានៅក្នុងពេលឆាប់ៗខាងមុខនេះ។ ហើយកម្ពុជាបានត្រៀមខ្លួនរួចជាស្រេចហើយក្នុងការដឹកជញ្ជូន ការទុកដាក់វ៉ាក់សាំងនៅកន្លែងសុវត្ថិភាព។ ភាគីចិនក៏បានបញ្ជូនក្រុមគ្រូពេទ្យជំនាញវេជ្ជសាស្ត្រចំនួន ៤រូប មកជួយបណ្តុះបណ្តាលដល់ក្រុមគ្រូពេទ្យកម្ពុជាផងដែរ។
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានមានប្រសាសន៍នៅក្នុងពិធីសំណេះសំណាលក្រុមគ្រូពេទ្យចាក់វ៉ាក់សាំងការពារជំងឺកូវីដ-១៩ នៅមន្ទីរពេទ្យព្រះកេតុមាលា នារសៀលថ្ងៃទី៣ ខែកុម្ភៈ នេះថា រដ្ឋាភិបាល កងទ័ព និងប្រជាជនចិន បានបញ្ជូនក្រុមគ្រូពេទ្យជំនាញវេជ្ជសាស្ត្រចំនួន ៤រូប បានមកជួយបង្ហាត់បង្រៀនជំនាញការដឹកជញ្ជូនវ៉ាក់សាំង ការរក្សាទុកវ៉ាក់សាំង និងកការចាក់ការពារវីរុសកូវីដ-១៩ ដែលក្រុមគ្រូពេទ្យកម្ពុជាពុំទាន់ទទួលបានបទពិសោធន៍ក្នុងការប្រើប្រាស់។
ជាមួយគ្នាភាគីចិនបានសម្រេចផ្តល់ជាបន្ទាន់នូវជំនួយវ៉ាក់សាំងចាក់ការពារវីរុសកូវីដ១៩ ដំណាក់កាលទី១ ចំនួន ៦សែនដូស ក្នុងនោះចំនួន ៣សែនដូសជូនដល់កងខេមរភូមិន្ទ និងបន្តផ្តល់ជំនួយវ៉ាក់សាំងដល់ប្រទេសកម្ពុជាដើម្បីគាំទ្រកម្ពុជាយ៉ាងពេញទំហឹងឲ្យយកឈ្នះជំងឺកូវីដ១៩ ឲ្យបានឆាប់តាមដែលអាចធ្វើទៅបាន។
សម្ដេចពិជ័យសេនា ទៀ បាញ់ បានបញ្ជាក់ថា “នាពេលខ្លីខាងមុខនេះ វ៉ាក់សាំងដំបូងរបស់ចិនផ្តល់មកកម្ពុជាដែលជាជំនួយបន្ទាន់នឹងដឹកមកដល់រាជធានីភ្នំពេញ។ សកម្មភាពនេះ បានបង្ហាញពីចំណងសាមគ្គីភាព មិត្តភាពរវាងប្រជាជន និងប្រជាជន ប្រទេសនិងប្រទេស ហើយប្រែក្លាយកេរ្តិ៍ដំណែលមួយ នៃការកសាងសហគមន៍មួយ វាសនាមួយទៅថ្ងៃអនាគត សម្រាប់មនុស្សជាតិដែលនឹងត្រូវបន្តរាប់រយពាន់ឆ្នាំដែលមានអត្ថន័យយ៉ាងជ្រាលជ្រៅ ជាមិត្តរួមសុខរួមទុក្ខ ស្រឡាញ់គ្នាក្នុងគ្រាក្រ ស្គាល់មានល្អក្នុងគ្រាលំបាក និងជាមិត្តដៃគូយុទ្ធសាស្ត្រគ្រប់ជ្រុងជ្រោយ និយាយតិចធ្វើច្រើន។ ខ្ញុំបារម្ភបំផុត គឺការដឹកជញ្ជូនទុកដាក់វ៉ាក់សាំង ប៉ុន្តែដោយសារបានដឹងមួយជំហានហើយ គឺបានត្រៀមរៀបចំសម្ភារសម្រាប់ទុកដាក់ និងការដឹកជញ្ជូនបានត្រៀមរួចរាល់អស់ហើយ”។
សម្តេចពិជ័យសេនាបានអះអាងថា កងទ័ពគឺត្រូវចាក់វ៉ាក់សាំងការពារជំងឺកូវីដ១៩ ទាំងអស់ រួចហើយក្រុមគ្រួសារកងទ័ពផងដែរ និងអ្នកនៅជុំវិញ ដោយម្នាក់ត្រូវចាក់វ៉ាក់សាំងការពារ ២ដូស។ ហើយវ៉ាក់សាំងនេះ មិនមែនអ្នកណាចេះតែប្រើបានទេ គឺត្រូវបានបញ្ជាផ្ទាល់ពីសម្តេចតេជោ ហ៊ុន សែន ប្រមុខដឹកនាំប្រទេស៕ រក្សាសិទ្ធិដោយៈ ចេស្តារ
