ភ្នំពេញ ៖ ក្នុងជំនួបជាមួយ លោកស្រី ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) នៅវិមានរដ្ឋសភា នារសៀលថ្ងៃទី០៣ ខែកុម្ភៈ ឆ្នាំ២០២១ លោក អ៉ិត សំហេងរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា សហគ្រាសបានបិទទ្វារ និងកម្មករ-និយោជិត បាត់បង់ការងារច្រើនជាងកាលពីឆ្នាំ២០១៩។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា ក្នុងឆ្នាំ២០២០ មានសហគ្រាសចំនួន ១,៣៥៦ បានបិទលែងដំណើរការ និងកម្មករ-និយោជិត បានបាត់បង់ការងារចំនួន ១០៨,៨២៥ នាក់ ដែលចំនួននេះ គឺច្រើនជាងកាលពីឆ្នាំ២០១៩ ក្នុងរយៈពេលដូចគ្នា ដែលមានសហគ្រាសចំនួន ៩៦៩ និងកម្មករនិយោជិតបាត់បង់ការងារចំនួន ៨៥,៨៨៩ នាក់ ដែលភាគច្រើន គឺជាប្រភេទរោងចក្រ សហគ្រាស ក្រៅពីវិស័យកាត់ដេរ។
ទោះជាយ៉ាងណា ក្នុងរយៈពេលដូចគ្នានេះទៀតសោត គឺក្នុងឆ្នាំ២០២០ បើតាមលោក អ៊ិត សំហេង ឲ្យដឹងថា ក៏មានរោងចក្រ សហគ្រាសចំនួន ១,១០៣ បានបើកថ្មី និងបានបង្កើតការងារបន្ថែមចំនួន ៦១,២៥៧ នាក់ មានការងារធ្វើផងដែរ, ហើយក្រសួងការងារ និងបណ្តុះបណ្តាលវិជ្ជាជីវៈ ក៏បានខិតខំផ្តល់ព័ត៌មានទីផ្សារការងារដល់អ្នកស្វែងរកការងារប្រមាណជាង ២.៣ លាននាក់ តាមរយៈវេទិកាការងារ សេវាទូរស័ព្ទ គេហទំព័រការងារ បណ្តាញទំនាក់ទំនងសង្គម និងមជ្ឈមណ្ឌលការងារជាដើម៕ រក្សាសិទ្ធិដោយ ពិសិដ្ឋ CEN
