ភ្នំពេញៈ នៅថ្ងៃទី៤ កុម្ភៈ នេះ សាលាដំបូងរាជធានីភ្នំពេញបានបន្តបើកសវនាការជំនុំជម្រះលើសំណុំរឿងមេដឹកនាំអតីតបក្សប្រឆាំង លោក សម រង្ស៊ី និងបក្ខពួក ២១ នាក់ ពាក់ព័ន្ធបទចោទរួមគំនិតក្បត់ និងបង្កភាពវឹកវរដល់សន្តិសុខសង្គម និងញុះញង់មិនឱ្យយោធិនស្តាប់បង្គាប់រាជរដ្ឋាភិបាល ។ ការបន្តសវនាការនេះ បន្ទាប់ពីតុលាការ បានបើកសវនាការលើសំណុំរឿងនេះកាលពីថ្ងៃទី២២ ខែមករា ឆ្នាំ២០២១។
លោកសំ សុគង់ មេធាវីការពារជនជាប់ចោទបានឲ្យដឹងថា នៅក្នុងសំណុំរឿងនេះ មានមនុស្សចំនួន ២២នាក់ ដោយក្នុងនោះ ១៤នាក់កំពុងជាប់ឃុំ ម្នាក់នៅក្រៅឃុំ និងចំនួន ៧នាក់ទៀតនៅក្រៅប្រទេស។ ហើយមកដល់ពេលនេះ មនុស្សចំនួន ៨នាក់ហើយ ដែលត្រូវបានសាកសួរ។ ហើយតុលាការនឹងបន្តសវនាការនៅថ្ងៃទី៤ ខែកុម្ភៈ ឆ្នាំ២០២១។
សូមជម្រាបថា សាលាដំបូងរាជធានីភ្នំពេញកាលពីថ្ងៃទី២៩ ខែធ្នូ ឆ្នាំ២០២០ បានបើកសវនាការជំនុំជម្រះលើសំណុំរឿងមេដឹកនាំអតីតបក្សប្រឆាំង លោក សម រង្ស៊ី និងបក្ខពួក ២១ នាក់ ពាក់ព័ន្ធបទចោទរួមគំនិតក្បត់ និងបង្កភាពវឹកវរដល់សន្តិសុខសង្គម និងញុះញង់មិនឱ្យយោធិនស្តាប់បង្គាប់រាជរដ្ឋាភិបាល។
នៅក្នុងសវនាការមានតែជនត្រូវចោទចំនួន ១៤នាក់ប៉ុណ្ណោះ ក្នុងចំណោម ២២ នាក់ ខណៈមនុស្សមួយចំនួនទៀត កំពុងគេចខ្លួននៅក្រៅប្រទេសរួមមានៈ លោកសម រង្ស៊ី អ្នកស្រី ជូឡុង សូម៉ូរ៉ា អ្នកស្រី មូរ សុខហួរ លោក នុត រំដួល លោកអេង ឆៃអេង)។
ជនត្រូវចោទទាំង ២២ នាក់ ដែលរួមទាំងលោក សម រង្ស៊ី ផងនោះត្រូវបានការពារសិទ្ធិដោយលោក មេធាវី សំ សុគង់ , មេធាវី ឡោ ជុនធី រីឯមេធាវី ២ រូបទៀត គឺជាមេធាវីចាត់តាំងពីគណៈមេធាវីរួមមានលោកស្រីមេធាវី ស៊ិន សាវ៉ន និង លោក មេធាវី យុង ផានិត។
គួររំលឹកថា កងយោធពល ខេមរភូមិន្ទ បានដាក់ ពាក្យ ប្តឹង សម រ ង្ស៉ី កាលពី ព្រឹក ថ្ងៃទី ៧ ខែធ្នូ ឆ្នាំ ២០១៧ កន្លងទៅ ពាក់ព័ន្ធ នឹង ករណី ញុះញង់ កុំ ឲ្យ យោធិន ស្តាប់បង្គាប់ រាជរដ្ឋាភិបាល ស្របច្បាប់ ដោយ កងទ័ព ចាត់ទុកថា ការលើកឡើងនោះ ធ្វើឲ្យខូចទឹកចិត្តកងទ័ព និងប្រមាថថ្នាក់ដឹកនាំ កងយោធពល ខេមរភូមិន្ទ ។ ក្នុង ពាក្យបណ្តឹង បានបញ្ជាក់ថា ការអំពាវនាវរបស់លោក សម រង្ស៉ី ធ្វើឲ្យប៉ះពាល់ដល់សន្តិសុខនៃរដ្ឋ ដែលជាបទល្មើសចែង នៅក្នុងក្រមព្រហ្មទណ្ឌកម្ពុជា ។
ការដាក់ពាក្យបណ្តឹងបានកើតឡើង ក្រោយពេលលោក សម រ ង្ស៉ី អតីតប្រធានគណបក្សសង្គ្រោះជាតិបាន អំពាវនាវឲ្យកងទ័ពបង្វែរកាណុងមកលើរាជរដ្ឋាភិបាល ហើយបានបង្គាប់ឲ្យកងទ័ពឈប់ស្តាប់បញ្ជា រាជរដ្ឋាភិបាលស្របច្បាប់ ៕ រក្សាសិទ្ធិដោយ៖ ចេស្តារ
