កាលពីពេលថ្មីៗនេះ មហាជននៅក្នុងបណ្តាញសង្គម បានផ្ទុះការរិះគន់មិនសំចៃមាត់ ក្រោយពីបានឃើញក្រុមអ្នកលក់ឡេដ៏ល្បីឈ្មោះ គឺអាជី និងអាម៉ី បានថតសម្តែងរឿង «ទុំទាវ ២០២១» គ្មានការគិតពិចារណា ដោយយកព្រះពុទ្ធសាសនាមកលេងសើច តាមរយៈតួអង្គនេនទុំ និងដៃគូនេនពេជ្រ សម្តែងបែបកំប្លែងអាសអាភាស រាំចាក់ឌីជេដ៏មិនគួរគប្បី។
ក្នុងនោះ ក៏មានព្រះសង្ឃមួយអង្គព្រះនាមក្នុងហ្វេសប៊ុក Oeun Sam Art បានមានសង្ឃដីកាថា៖ ស្នើសុំគណៈសង្ឃនាយក នៃព្រះរាជាណាចក្រកម្ពុជា និងក្រសួងធម្មការ និងសាសនា មានវិធានការផ្លូវច្បាប់ចំពោះក្រុមសម្តែង និងម្ចាស់ page Hokima ដែលបានបង្ហោះវីដេអូក្នុងរូបភាពនេះ ដែលមានចេតនាក្នុងការបំផ្លាញព្រះពុទ្ធសាសនា។
តែទោះយ៉ាងណា ក្រុមអាជី និងអាម៉ី ក៏បានប្រញាប់ប្រញាល់លុបវីដេអូនោះចេញភ្លាមៗផងដែរ ក្រោយបង្ហោះបានប៉ុន្មានម៉ោងប៉ុណ្ណោះ បង្កឲ្យផ្ទុះការរិះគន់ធ្ងន់ៗពីសំណាក់អ្នកប្រើប្រាស់បណ្តាញសង្គម។
យ៉ាងណាមិញ ក្រោយពីបានសង្កេតឃើញនៅតែមានអ្នកយកវីដេអូ ដែលបានលុបចោលនេះ យកទៅផុសបន្តនៅលើ Tik Tok ឬ តាមផេកមួយចំនួន នាំធ្វើឲ្យមហាជនរិះគន់ និងកាន់តែជេរដៀលធ្ងន់ៗបន្ថែមទៀត ម្ចាស់ផេក Hokima អាជី និងអាមី ដែលធ្លាប់អួតលក់ឡេ១ថ្ងៃបាន១០ម៉ឺនដុល្លារ និងក៏ជាតួសម្តែងនៅក្នុងរឿងនេះ ក៏បានបង្ហោះសារសុំទោស និងព្រមានចាត់វិធានការផ្លូវច្បាប់ទៅកាន់អ្នកយកវីដេអូនេះទៅផុសបន្តថា៖ «រឿង ទុំទាវ 2021 អរគុណសម្រាប់មតិរិះគន់ដើម្បីស្ថាបនា ហើយក៏សុំទោសរាល់កំហុសខុសឆ្គងរបស់ក្រុមសម្ដែងពួកខ្ញុំ ដោយសារតែពួកខ្ញុំមិនបានដឹង ចឹងវីឌីអូនិងគឺខ្ញុំបានលុបរួចហើយ សម្រាប់អ្នកដែលចម្លងយកទៅផុសត និយាយជេរឌៀលជាសាធារណៈ ទុកពេលឲ្យ២៤ម៉ោងសម្រាប់លុប ចោលបើមិនលុបនៅតែបន្តបង្ខូចកេរ្ដិ៍ឈ្មោះខ្ញុំក្នុងសាធារណៈ គឺមេធាវីនិងចាត់ចែងទៅតាមផ្លូវច្បាប់ ព្រោះក្រុមសម្ដែងពួកខ្ញុំបានដឹងនៅកំហុសឆ្គង ហើយក៏លុបចោលភ្លាមៗដែរ តែបើនៅតែមានចេតនាយកទៅកាត់តបង្ហោះទៀត ត្រៀមខ្លួនប្រឈមនៅនិងមុខច្បាប់ទៅ ចម្លងកាត់តបង្ហោះជាសាធារណៈដោយគ្មានការអនុញ្ញាតពីម្ចាស់ដើម ធ្វើឲ្យប៉ះពាល់ដល់កេរ្ដិ៍ឈ្មោះនិងកិត្តិយស រក្សាសិទ្ធិដោយក្រុមសម្ដែងផ្ទាល់ ដោយក្ដីគោរព ពីតេង ដាណា»៕ រក្សាសិទ្ធិដោយ៖ លឹម ហុង
