ថ្មីៗនេះ នៅលើបណ្តាញសង្គមថៃ បានផ្ទុះផ្អើលទៀតហើយ ក្រោយពីអ្នកឈ្នះឆ្នោតធំៗចំនួន៣នាក់ នៅក្នុងការចាប់ឆ្នោតចុងក្រោយរបស់រដ្ឋាភិបាលថៃ កាលពីថ្ងៃទី១ ខែកុម្ភៈ ឆ្នាំ២០២១ ទទួលបានទឹកប្រាក់រាប់លានបាត ដោយក្នុងនោះអ្នកឈ្នះទី១ និងទី២ ជាមួយទឹកប្រាក់ ១២ លានបាត និងអ្នកឈ្នះទី៣ចំនួន ៣០ លានបាត។
អ្នកស្រី Rachanee Suwanmanee អាយុ ៥៣ ឆ្នាំ បានប្រាប់ឲ្យដឹងថា គាត់បានឈ្នះសំបុត្រឆ្នោត២ ដែលមានលេខ 912307 ជាមួយទឹកប្រាក់ ១២ លានបាត (ស្មើនឹងជិត ៤ សែនដុល្លារ)។ អ្នកស្រី Rachanee ក៏បានបញ្ជាក់ឲ្យដឹងថា អ្នកស្រីបានទៅលេងម្តាយរបស់អ្នកស្រី នៅពេលនោះ ក៏មានសាច់ញាតិម្នាក់បានមកលក់ឆ្នោតឲ្យអ្នកស្រី។ ហើយនៅពេលបានដឹងថាឈ្នះប្រាក់លានដ៏សន្ធឹកសន្ធាប់បែបនេះ អ្នកស្រី Rachanee បានឱបម្តាយ ជាមួយអារម្មណ៍រំភើបចិត្តស្ទើរហោះតែម្តង។
អ្នកឈ្នះបន្ទាប់នូវទឹកប្រាក់ ១២ លានបាតដូចគ្នា គឺជាអភិបាលរងស្រុក Mae Sot នៃខេត្ត Tak។ គាត់ក៏ស្ទើរតែដួលសន្លប់ផងដែរ នៅក្នុងផ្សារ នៅពេលដឹងថាឈ្នះនូវទឹកប្រាក់ដ៏ធំនេះ។
លោក Thawatchai Onsarn អាយុ ៣៤ ឆ្នាំ ដែលជាសេដ្ឋីទី២ បានបញ្ចេញឲ្យដឹងថា ថ្មីៗនេះ គាត់ផ្លាស់ទៅកាន់ស្រុក Mae Sot ក្នុងរយៈពេល១ឆ្នាំ។ ហើយនៅទីនោះ គាត់តែងមកលេងប្រាសាទជាទៀងទាត់ ហើយនៅពេលនោះ ព្រះសង្ឃមួយអង្គបានប្រាប់គាត់ថា សំណាងល្អនឹងមកដល់នៅដើមខែកុម្ភៈនេះ។ បន្ទាប់មកមិនយូរប៉ុន្មាន ក៏មានព្រះសង្ឃមួយអង្គទៀត នៅប្រាសាទផ្សេង ក៏បានប្រាប់គាត់ដូចគ្នាដែរថា សំណាងល្អនឹងចូលមកដល់នៅក្នុងខែទី២នៃឆ្នាំ២០២១នេះ គឺខែកុម្ភៈ។ ហើយព្រឹកព្រលឹមនៃថ្ងៃនោះ គាត់បានទៅផ្សារ និងបានទិញសំបុត្រ២ចុងក្រោយ មុនពេលចាប់ឆ្នោតឈ្នះជាមួយទឹកប្រាក់ ៣០ លានបាត។
ចំណែកអ្នកឈ្នះចុងក្រោយ គឺជាអ្នកលក់ឆ្នោតផ្ទាល់នៅក្នុងខេត្ត Roi Et ជាមួយទឹកប្រាក់ ៣០ លានបាត (ស្មើនឹងជិត ១លានដុល្លារ)។ អ្នកស្រី Rungthip Sanjandee អាយុ ៥៣ ឆ្នាំ បានបញ្ជាក់ប្រាប់ឲ្យដឹងផងដែរថា បានដើរលក់ឆ្នោតតាមទម្លាប់ ព្រោះតែងតែមានអតិថិជនទិញជាមួយលេខ ៣០៧ ប៉ុន្តែ លើកនេះ អត់មានអ្នកចង់ទិញទេ ហេតុដូច្នេះ អ្នកស្រីក៏បានរក្សាវាទុកដោយខ្លួនឯងតែម្តងទៅ។
ជាមួយការឈ្នះនូវទឹកប្រាក់ដ៏មហាធំធេងនេះ អ្នកស្រី Sanjandee ក៏បានជូនមន្ត្រីប៉ុស្តិក្នុងមូលដ្ឋានក្នុងម្នាក់ចំនួន ១ពាន់បាត ផងដែរ ព្រោះថាពួកគាត់ក៏បានជួយខ្នះខ្នែង និងក៏ដូចបានដឹងឮពីការឈ្នះនេះ៕ រក្សាសិទ្ធិដោយ៖ លឹម ហុង
