ភ្នំពេញ ៖ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានសូមឲ្យមេបញ្ជាការអង្គភាពទាំងអស់ ពន្យល់ណែនាំដល់បងប្អូនកងកម្លាំងប្រដាប់អាវុធ ដែលជាគោលដៅអាទិភាពក្នុងការទទួលចាក់ថ្នាំបង្ការ ឱ្យមានស្មារតីនឹងនរ និងជឿទុកចិត្តលើការគិតគូររបស់រាជរដ្ឋាភិបាល និងរបស់សម្តេចតេជោនាយករដ្ឋមន្ត្រីផ្ទាល់ ព្រោះនេះគឺជាកិច្ចការធំ នៅក្នុងការងារប្រយុទ្ធនឹងជំងឺកូវីដ-១៩។
លោកឧត្តមសេនីយ៍ឯក ហ៊ុន ម៉ាណែត លើកឡើងក្នុងពិធីបិទវគ្គហ្វឹកហ្វឺនបំប៉នជំនាញភស្តុភារ, យន្តយុទ្ធ, ពេទ្យសង្គ្រោះ និងជំនាញបើកបររថយន្តធុនធ្ងន់ សម្រាប់យោធភូមិភាគទី៤ និងកងពលធំអន្តរាគមន៍លេខ២ នៅខេត្តសៀមរាប កាលពីថ្ងៃទី៤ ខែកុម្ភៈ ឆ្នាំ២០២១នេះ។
លោកឧត្តមសេនីយ៍ឯក ហ៊ុន ម៉ាណែត បន្តថា ទន្ទឹមនឹងនេះ សូមបងប្អូនប្រជាពលរដ្ឋរួមគ្នា និងត្រៀមលក្ខណៈចូលរួមជាមួយរដ្ឋាភិបាលអនុវត្តវិធានការសុខាភិបាល និងទទួលចាក់ថ្នាំបង្ការទៅតាមដំណាក់កាលនីមួយៗតាមផែនការលទ្ធភាពរបស់រាជរដ្ឋាភិបាល ដើម្បីការពារខ្លួនយើង គ្រួសារយើង សង្គមជាតិយើង និងប្រជាជនយើងនៅក្នុងកាលៈទេសៈដ៏លំបាកនេះ។ ការប្រយុទ្ធប្រឆាំងនឹងជំងឺកូវីដ គឺផ្តើមចេញពីខ្លួនយើង ដើម្បីការពារខ្លួនយើង និងអ្នកដទៃ។ ប្រទេសមួយចំនួនខ្វះការយកចិត្តទុកដាក់លើប្រជាជនខ្លួនឯង។ ប្រទេសយើងតូច ប៉ុន្តែយើងមានថ្នាក់ដឹកនាំដែលគិតគូរពីប្រជាពលរដ្ឋ យកចិត្តទុកដាក់ដោះស្រាយការលំបាកគ្រប់បែបយ៉ាងរបស់ប្រជាពលរដ្ឋ។
ចំពោះបញ្ហាជំងឺកូវីដ-១៩ ដែលជាបញ្ហាប្រឈមចំពោះមុខ មកដល់បច្ចុប្បន្ននេះ កម្ពុជាយើងអាចគ្រប់គ្រងស្ថានការណ៍បានល្អប្រសើរ ដោយមិនទាន់មានករណីឆ្លងច្រើន ហើយករណីស្លាប់នៅក្នុងប្រទេសក៏មិនទាន់មាន ខណៈដែលប្រទេសមួយចំនួនទាំងក្នុងតំបន់ និងពិភពលោកកំពុងបន្តរងគ្រោះខ្លាំង។ ទាំងនេះក៏ដោយសារយើងទាំងអស់គ្នា ទាំងប្រជាជន មន្ត្រីរាជការ និងកងកម្លាំងប្រដាប់អាវុធបានចូលរួមអនុវត្តប្រកបដោយការទទួលខុសត្រូវនូវវិធានការដ៏ម៉ឺងម៉ាត់ និងមានប្រសិទ្ធភាពរបស់រាជរដ្ឋាភិបាល ហើយចុងក្រោយនេះ គឺវិធានការទប់ស្កាត់នៅច្រកព្រំដែនតែម្តង។ យ៉ាងណាក៏ដោយ ជាមួយនឹងកំណើនពលករចំណាកស្រុកមកពីក្រៅប្រទេសនេះ ក៏ជាហានិភ័យមួយគួរឱ្យព្រួយបារម្ភផងដែរ។ ដូច្នេះដំណាក់កាលបន្តនៅក្នុងការងារនេះ គឺការបន្តការពារប្រជាពលរដ្ឋរបស់យើង ទី១តាមរយៈវិធានការណ៍សុខាភិបាល និងទី២ តាមរយៈផ្តល់ការចាក់ថ្នាំបង្ការដល់ប្រជាពលរដ្ឋ ដូចបណ្តាប្រទេសផ្សេងៗទៀត។
លោកបន្តថា សព្វថ្ងៃនេះ នៅទូទាំងពិភពលោក ប្រទេសជាច្រើនបានរកឃើញថ្នាំបង្ការជំងឺកូវីដ-១៩ ដែលអាចមានប្រសិទ្ធភាពប្រើប្រាស់បាន ដោយឆ្លងតាមការស្រាវជ្រាវ និងត្រួតពិនិត្យផ្នែកបច្ចេកទេស និងវិទ្យាសាស្ត្រត្រឹមត្រូវ។ ដូច្នេះ នៅចំពោះមុខហានិភ័យដ៏គ្រោះថ្នាក់នៃជំងឺនេះ រាជរដ្ឋាភិបាលបានសម្រេចចិត្តទិញថ្នាំបង្ការពីប្រទេសចិន បន្ថែមលើជំនួយរបស់បណ្តាប្រទេសជាមិត្ត ធ្វើយ៉ាងណាការពារឱ្យបាននូវសុខភាព និងអាយុជីវិតរបស់ប្រជាពលរដ្ឋ ដោយមិនអាចរង់ចាំបានឡើយ ជាពិសេសខណៈពេលដែលកម្លាំងសុខាភិបាល និងកម្លាំងប្រដាប់អាវុធជាតិយើងដែលនៅជួរមុខកំពុងប្រឈមដោះស្រាយបញ្ហាពលករចំណាកស្រុកដែលត្រឡប់ចូលមកក្នុងប្រទេសវិញនៅតាមច្រកព្រំដែន និងត្រូវធ្វើចត្តាឡីស័ក។ នេះ គឺជាការសម្រេចចិត្តរបស់រាជរដ្ឋាភិបាលផ្អែកលើមូលដ្ឋានសុខាភិបាល និងស្តង់ដារគុណភាព សុវត្ថិភាពច្បាស់លាស់ ជាពិសេសការទទួលខុសត្រូវខ្ពស់ចំពោះជោគវាសនាប្រទេសជាតិ និងអាយុជីវិតរបស់ប្រជាពលរដ្ឋ។ ក្នុងភាពជាអ្នកដឹកនាំដោយគំរូ ព្រមទាំងដើម្បីផ្តល់ទំនុកចិត្ត និងជំនឿជឿជាក់ដល់ប្រជាពលរដ្ឋ សម្តេចតេជោនាយករដ្ឋមន្ត្រី និងថ្នាក់ដឹកនាំផ្សេងទៀត ក៏បានស្ម័គ្រចិត្តទទួលយកការចាក់ថ្នាំបង្ការនេះមុនគេផងដែរ។ ម្យ៉ាងវិញទៀត ថ្នាក់ដឹកនាំ និងប្រជាជននៃបណ្តាប្រទេសផ្សេងៗជាច្រើនទៀតរាប់លាននាក់ទៀត ក៏បានប្រើប្រាស់នូវថ្នាំបង្ការប្រភេទនេះ ដោយមានប្រសិទ្ធភាពរួចទៅហើយ។
សូមជម្រាបថា វ៉ាក់សាំងជំនួយរបស់ចិន នឹងមកដល់ថ្ងៃទី០៧ ខែកុម្ភៈ ឆ្នាំ២០២១។ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាសម្រេចចាក់វ៉ាក់សាំងនៅថ្ងៃទី១០ ខែកុម្ភៈ នាមន្ទីរពេទ្យកាល់ម៉ែត ៕ រក្សាសិទ្ធិដោយ៖ ចេស្តារ
