ភ្នំពេញ ៖ គ្រោះថ្នាក់ចរាចរណ៍មួយ បានកើតឡើងកាលពីវេលាម៉ោង២និង៥នាទីរសៀលថ្ងៃទី៥ ខែកុម្ភៈ ឆ្នាំ២០២១ នៅតាមបណ្ដោយផ្លូវជាតិលេខ៣ ក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញបណ្ដាលឲ្យបុរសម្នាក់រងរបួសបាក់ជើងយ៉ាងធ្ងន់ធ្ងរ ខណៈដែលគាត់ជិះម៉ូតូ១គ្រឿជ្រុលទៅបុកពីក្រោយរថយន្តដឹកដែក១គ្រឿងទៀត ដែលកំពុងចតស្ងៀមនៅលើផ្លូវ។
តាមប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញរថយន្ត១គ្រឿង ម៉ាកហ៊ីយ៉ាន់ដាយពាក់ផ្លាកលេខភ្នំពេញ 3C- 4293 ជាប្រភេទស្ទូចនិងបានដឹកដែកសរសៃផង បានធ្វើដំណើរក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ បានឈប់រួចចតនៅលើផ្លូវ ពេលនោះបុរសរងគ្រោះបានជិះម៉ូតូ១គ្រឿង ម៉ាកហុងដាវ៉េវពណ៌ខ្មៅពាក់ផ្លាកលេខភ្នំពេញ 1HS- 6859 ក្នុងទិសដៅស្របគ្នាទៅដល់បុកពីក្រោយពេញទំហឹង បណ្ដាលឲ្យដួលរងរបួសបាក់ជើងធ្ងន់ធ្ងរ និងត្រូវបានគេបញ្ជូនទៅសង្គ្រោះបន្ទាន់ភ្លាមៗ។
ក្រោយកើតហេតុសមត្ថកិច្ច បានចុះទៅធ្វើការវាស់វែង រួចនាំយករថយន្តនិងម៉ូតូ ទៅរក្សាទុកដើម្បីរង់ចាំការដោះស្រាយនៅពេលក្រោយ៕ រក្សាសិទ្ធិដោយ ៖ សួងសាម
