ថ្មីៗនេះ មហាជនទាំងក្នុង និងក្រៅសិល្បៈមានការចាប់អារម្មណ៍ និងងឿងឆ្ងល់ជាខ្លាំង ខណៈសុខៗ អតីតតារាសម្តែងអ្នកនាង ម៉ៅ សុខចាន់ធី បានប្រកាសចែកផ្លូវគ្នាជាមួយស្វាមីវ័យក្មេងឈ្មោះ រ៉ាម៉ូ ក្រោយពីបានរៀបការជាមួយគ្នាកាលពីអំឡុងឆ្នាំ២០១៨ កន្លងមក។
ជុំវិញការរឿងរ៉ាវប្រេះស្រាំជីវិតប្តីប្រពន្ធឈានដល់ការចែកផ្លូវគ្នានេះផងដែរ អ្នកនាង ម៉ៅ សុខចាន់ធី បានទម្លាយចេញឲ្យដឹងថា មូលហេតុគឺដោយសារអតីតស្វាមីវ័យក្មេងរបស់អ្នកនាង តែងតែរម្អុកសុំលុយជាបន្តបន្ទាប់ ដែលជាហេតុធ្វើឲ្យអ្នកនាងលែងមានទំនុកចិត្តលើប្តីហេងស៊យរូបនេះតទៅទៀត។
អតីតតារាសម្តែងរាងមាន់ចែ សម្រស់ចាំ សាច់សខ្ចីរូបនេះ ក៏បានប្រាប់ឲ្យដឹងថា អ្នកនាងបានចែកផ្លូវជាមួយលោក រ៉ាម៉ូ អស់រយៈពេលប្រមានជា២ខែមកហើយ ដោយអ្នកនាងជាអ្នកសុំបែក។
យ៉ាងណាមិញ ជាមួយនឹងការសម្រេចចិត្តលែងប្តីវ័យក្មេង ទុកក៏មិនចំណេញ ដកចេញក៏មិនស្តាយ អ្នកនាង ម៉ៅ សុខចាន់ធី ក៏បានបញ្ចេញនូវអារម្មណ៍ពិតៗទាំងក្តៅចិត្តថា៖ «ចប់គឺចប់ មិនបាច់តវ៉ាអីច្រើននោះទេ តែស្តាយណាស់ ដែលខ្ញុំធ្វើឲ្យវាមានឈ្មោះក្នុងសង្គម ទាំងដែលវាជាមនុស្សខ្ញុំរើសចេញពីក្នុងសំរាមសោះ ខំបន្ទាបខ្លួនប៉ុណ្ណឹងហើយ នៅតែទៅជួបអាប្រភេទមនុស្សចោលម្សៀតដដែល! នេះហើយមកពីនិស្ស័យដែលយើងខំអាណិតគេពេក…»។
គួរបញ្ជាក់ថា នេះមិនមែនជាលើកទី១ទេ ដែលអ្នកនាង ម៉ៅ សុខចាន់ធី បានជួបប្រទះនឹងស្នេហាមិនសមប្រកប ព្រោះគេនៅចាំបានថា កាលពីអំឡុងឆ្នាំ២០១៥ អ្នកនាងធ្លាប់បានចុះមកភ្ជាប់ពាក្យជាមួយបុរសម្នាក់ដែលជាតួសម្តែងម្នាក់ តែមិនយូរប៉ុន្មាន អ្នកទាំងពីរក៏បានចែកផ្លូវគ្នាទៅវិញ ហើយក្រោយមក នៅក្នុងអំឡុងឆ្នាំ២០១៨ អ្នកនាងក៏បានមករៀបការជាមួយលោក រ៉ាម៉ូ ដែលមានអាយុក្មេងជាងអ្នកនាងប្រមាណជា ១០ ឆ្នាំ ឯណោះ។ តែទោះយ៉ាងណា ខ្សែជីវិតស្វាក់តែការបែករបស់អ្នកនាង នៅពេលនេះ ក៏បានចែកផ្លូវគ្នាជាបន្តទៀត ពិតជានិស្ស័យកម្មមែន!៕ រក្សាសិទ្ធិដោយ៖ លឹម ហុង
