ភ្នំពេញ ៖ រថយន្ត២គ្រឿងប៉ះគ្នាបន្តិចបន្ទួចដោះស្រាយមិនត្រូវប្រកែកគ្នាបែកផ្សែង ផ្អើលដល់សមត្ថកិច្ចអន្តរាគមន៍ ខណៈដែលប្រកែកគ្នាអស់ជាច្រើនម៉ោង ដោយសំអាងថាត្រូវរៀងៗខ្លួន។
ហេតុការណ៍នេះបានកើតឡើងនៅវេលាម៉ោង១និង២០នាទីរសៀលថ្ងៃទី៥ ខែកុម្ភៈ ឆ្នាំ២០២១ តាមបណ្ដោយផ្លូវ១៥៤ ស្ថិតក្នុងសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
តាមប្រភពកន្លែងកើតហេតុបានប្រាប់ក្រុមការងារCENឲ្យដឹងថា មុនកើតហេតុគេឃើញរថយន្តម៉ាកតូយ៉ូតា ហៃយ៉ាស់ ពណ៌ទឹកប្រាក់ពាក់ផ្លាកលេខភ្នំពេញ2AD-1988 បើកបរដោយបុរសម្នាក់និងអ្នករួមដំណើរ៤នាក់ក្នុងរថយន្ត តាមបណ្ដោយផ្លូវ១៥៤ ទិសដៅពីលិចទៅកើត ពេលឆ្លងផុតផ្លូវ៦៣ តៃកុងអែបគៀនរកកន្លែងដូរលុយ ភ្លាមនោះក៏មានរថយន្តកូរ៉េពណ៌ខៀវពាក់ផ្លាកលេខភ្នំពេញ2O-2433 បើកបរដោយបុរសម្នាក់ជាបុគ្គលិកចែកចាយទឹកសុទ្ធហាយធិច ក្នុងទិសដៅស្របទិសគ្នា បានវ៉ារថយន្តដឹកអ្នកដំណើររួចវាយស៊ីញ្ញូចូលគៀន ដើម្បីដាក់ទឹកសុទ្ធឲ្យម៉ូយនៅក្បែរកន្លែងកើតហេតុ បានគៀរថយន្តដឹកអ្នកដំណើរបន្តិចបន្ទួច តែដោះស្រាយគ្នាមិនត្រូវ គិតតែប្រកែកគ្នាតឹងសរសៃកយកត្រូវរៀងខ្លួន ដោយសំអាងត្រូវរៀងខ្លួនទើបទំនាក់ទំនងសមត្ថកិច្ចជួយអន្តរាគមន៍។
ក្រោយកើតហេតុ សមត្ថកិច្ចមូលដ្ឋានបានមកដល់ ក៏ទំនាកទំនងទៅសមត្ថកិច្ចជំនាញចរាចរណ៍ខណ្ឌមកវាស់វែង ពេលជំនាញខណ្ឌមកតែកុងរថយន្តកូរ៉េ បានទទួលកំហុសនិងព្រមសងទៅរថយន្តដឹកអ្នកដំណើរចំនួន២០ដុល្លារបញ្ចប់រឿង នៅកន្លែងកើតហេតុ៕ រក្សាសិទ្ធិដោយ៖សារឿន
