ភ្នំពេញ ៖ រថយន្តម៉ាកព្រូសមួយគ្រឿងបើកចេញពីផ្សាត្រពាំងថ្លឹង ប្រុងបត់ឆ្វេងមិនប្រយ័ត្នត្រូវរថយន្តកុងតឺន័ររបស់ក្រុមហ៊ុនផែស្ងួតតេងឡាយ កៀបណ្តាលឲ្យរងការខូចខាតផ្នែកខាងមុខ។ សំណាងល្អមិនមានគ្រោះថ្នាក់ទៅដល់មនុស្ស។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ៥ និង២០ នាទីល្ងាចថ្ងៃសុក្រទី ៥ ខែកុម្ភៈឆ្នាំ ២០២១ ស្ថិតនៅតាមបណ្តោយផ្លូវវេងស្រេង ត្រង់ចំណុចមុខផ្សារត្រពាំងថ្លឹង ក្នុងសង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ។
យោងតាមប្រភពព័ត៌មានពីប្រជាពលរដ្ឋ នៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តម៉ាកព្រូស ពណ៌សមួយគ្រឿងពាក់ផ្លាកលេខភ្នំពេញ2-BJ 7160 ធ្វើដំណើរចេញពីផ្សាត្រពាំងថ្លឹង ក្នុងទិសដៅពីត្បូងទៅជើងគោលបំណងបត់ឆ្វេងឡើងទៅរង្វង់មូលចោមចៅ ខណៈមកដល់ចំណុចកើតហេតុខាងលើ ក៏ត្រូវរថយន្តកុងតឺន័ររបស់ក្រុមហ៊ុនផែស្ងួតតេងឡាយមួយគ្រឿងទៀត ពាក់ផ្លាកលេខ3-C 0243 ធ្វើដំណើរតាមបណ្តោយផ្លូវវេងស្រេង ក្នុងទិសដៅពីកើតទៅលិចក្នុងល្បឿនលឿន ជ្រុលទៅកៀចំផ្នែកខាងមុខបណ្តាលឲ្យដាច់កាងនិងបែកធុងទឹកធ្លាក់ដល់ដី។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌពោធិ៍សែនជ័យ ចុះមកដល់រួចក៏ឱ្យភាគីទាំង២សម្របសម្រួលគ្នា ដោយតំណាងភាគីខាងរថយន្តកុងតឺន័រ មិនចង់វែងឆ្ងាយក៏ព្រមសងជាសំណង ក្នុងការជួសជុលបញ្ចប់រឿងនៅកន្លែងកើតហេតុ៕ រក្សាសិទ្ធិដោយ៖ សា មេត
