ភ្នំពេញៈ ស្នងការដ្ឋាននគរបាលរាជធានីភ្នំពេញបានបើកកិច្ចប្រជុំចាត់តាំងក្រុមការងារ ចុះពង្រឹងត្រួតពិនិត្យគ្រប់គ្រងជនបរទេសធ្វើការងារ និងស្នាក់នៅក្នុងរាជធានីភ្នំពេញ ដើម្បីពង្រឹងអនុវត្តច្បាប់អន្តោប្រវេសន៍ឱ្យមានប្រសិទ្ធភាព តម្លាភាព ចំពោះជនបរទេសរដែលបានស្នាក់នៅធ្វើការដោយខុសច្បាប់ និងការស្រាវជ្រាវបង្ក្រាបបទល្មើសប្រព្រឹត្តដោយជនបរទេសចាប់យកមកអនុវត្តតាមផ្លូវច្បាប់ ធានាបានសន្តិសុខសណ្តាប់ធ្នាប់សុវត្ថិភាពសង្គម និងផ្តល់ភាពកក់ក្តៅជូនជនបរទេសដែលមករស់នៅធ្វើការរកស៊ីដោយស្របច្បាប់។
កិច្ចប្រជុំបានធ្វើឡើងកាលពីព្រឹកថ្ងៃទី០៥ ខែកុម្ភៈ ឆ្នាំ២០២១ ប្រព្រឹត្តទៅក្រោមវត្តមានលោកឧត្តមសេនីយ៍ទោ ទិត វិសិដ្ឋ ស្នងការរងទទួលផែនការងារអន្តោប្រវេសន៍ និងលោកឧត្តមសេនីយ៍ទោ លូ រ៉ាប៉ូ ,លោកឧត្តមសេនីយ៍ត្រី សរ សំណាង ដែលជាស្នងការរងជំនួយដឹកនាំផែនការងារអន្តោប្រវេសន៍ ក្នុងនោះក៏មានការអញ្ជើញចូលរួម ពីលោកនាយការិយាល័យជំនាញផែនការងារអន្តោប្រវេសន៍ លោកអធិការនៃអធិការដ្ឋាននគរបាលទាំង១៤ខណ្ឌ លោកលោកស្រីអធិការរង និងលោកនាយ នាយរងផ្នែក ដែលទទួលភារកិច្ចការងារអន្តោប្រវេសន៍សរុប១០៥នាក់។
នៅក្នុងរាជធានីភ្នំពេញបើតាមរបាយការណ៍ឱ្យដឹងថា មានជនបរទេសស្នាក់នៅធ្វើការប្រមាណជិត៣ពាន់គោលដៅ។
លោកឧត្តមសេនីយ៍ត្រី សរ សំណាង ស្នងការរងទទួលការងារជំនួយដឹកនាំផែនការងារអន្តោប្រវេសន៍ បានលើកឡើងសូមឱ្យអស់លោកលោកស្រី ដែលត្រូវបានចាត់តាំង អនុវត្តតាមលិខិតបង្គាប់ការរបស់ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ស្តីពីការប្រគល់ភារកិច្ចចុះសម្រង់ស្ថិតិគ្រប់គ្រងជនបរទេស និងការស្រាវជ្រាវបង្ក្រាបបទល្មើសដោយជនបរទេស យកទៅអនុវត្តឱ្យមានប្រិទ្ធភាពនិងការទទួលខុសត្រូវខ្ពស់។ ចុះអនុវត្តភារកិច្ចធ្វើឡើងដោយតម្លាភាព ប្រសិទ្ធភាព ហើយអនុវត្តឱ្យចំគោលដៅជនបរទេសស្នាក់នៅ ធ្វើការងារជាក់ស្តែងដូចជានៅសហការគ្រាស សិប្បកម្ម រោងចក្រ និងកន្លែងស្នាក់នៅផ្សេងទៀត ។ជាពិសេសជម្រុញនៃការគ្រប់គ្រងរាល់ការចេញចូលរបស់ជនបរទេស ឱ្យបានជាក់លាក់និងធ្វើរបាយការណ៍ជារៀងរាល់ខែ ដើម្បីងាយស្រួលក្នុងការគ្រប់គ្រងជនបរទេសសម្រាប់ការងារបង្ការទប់ស្កាត់ និងបង្ក្រាបជនបរទេសដែលប្រព្រឹត្តបទល្មើសខុសច្បាប់ បង្កឱ្យប៉ះពាល់ស្ថិរភាពសង្គម។
លោកឧត្តមសេនីយ៍ត្រី សរ សំណាង លើកឡើងទៀតថា ចំពោះការចុះបំពេញភារកិច្ចត្រួតពិនិត្យទៅគោលដៅធ្វើការ និងស្នាក់នៅរបស់ជនបរទេសកន្លងមកមានចំណុចប្រឈមខ្លះ ដែលធ្វើឱ្យរាំងស្ទះដល់សមត្ថកិច្ចអនុវត្តការងារ ដូចជាម្ចាស់គោលដៅមិនចូលរួមសហការ។ នៅពេលក្រុមការងារចុះទៅគឺជួបសន្តិសុខ ជួបតំណាងអ្នកគ្រប់គ្រងគោលដៅដោយ ពួកគេមិនយល់ពីការងារគ្រប់គ្រងជនបរទេស ហើយបានហាមឃាត់មិនឱ្យសមត្ថកិច្ចចូលទៅបំពេញភារកិច្ចនោះឡើយ។ ប៉ុន្តែទោះជាមានបញ្ហាប្រឈមទាំងនេះក្តី ក្រុមការងារត្រូវសម្របសម្រួលោឱ្យអស់លទ្ធភាព ដោយធ្វើយ៉ាងណាឱ្យម្ចាស់គោលដៅចូលរួមសហការ ដើម្បីក្រុមការងារអនុវត្តភារកិច្ចដោយរលូននិងជោគជ័យ។
ក្នុងកិច្ចប្រជុំនោះផងដែរលោកនាយ នាយរងការិយាល័យ ជំនាញអន្តោប្រវេសន៍ លោកអធិការ និងមន្ត្រីពាក់ព័ន្ធមួយចំនួនក៏បានលើកឡើងពីបញ្ហាប្រឈម នៅពេលចុះអនុវត្តភារកិច្ចលើការងារអន្តោប្រវេសន៍ ដើម្បីពិភាក្សានិងរកដំណោះស្រាយជុំវិញ នៃការចុះអនុវត្តភារកិច្ចនេះទទួលបានជោគជ័យផងដែរ៕ រក្សាសិទ្ធិដោយៈ ចេស្តារ