ភ្នំពេញ ៖ នារីចំនួន៣នាក់ មានវិបត្តិផ្លូវចិត្តផ្សេងគ្នា ធ្វើដំណើរមកកាន់ស្ពានជ្រោយចង្វា រួចលោតទឹកសម្លាប់ខ្លួនជាបន្តបន្ទាប់ ប៉ុន្តែពួកគេមិនបានស្លាប់ដូចបំណងនោះទេ ត្រូវបានបងប្អូនខ្មែរឥស្លាម នៅខាងក្រោមស្ពានជួយទាន់ពេលវេលា។
ហេតុការណ៍នេះបានកើតឡើងនៅល្ងាចថ្ងៃទី ៥ខែកុម្ភៈឆ្នាំ២០២១ ចំណុចលើស្ពានជ្រោយចង្វា ស្ពានមិត្តភាពកម្ពុជាជប៉ុន ក្នុងទឹកដីសង្កាត់ស្រះចក ខណ្ឌដូនពេញ រាជធានីភ្នំពេញ។
ករណីទី១ ស្ត្រីមាក់ឈ្មោះស្រី អាត អាយុ៣៨ឆ្នាំ រស់នៅក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ មានស្វាមីឈ្មោះសេម មុខរបរជាទាហានជើងទឹកពាក់ស័ក្តិ៤ ដោយនារីជាប្រពន្ធ មិនបានប្រាប់ពីទីតាំងអង្គភាពនោះទេ ហើយមានកូនប្រុសក្នុងបន្ទុកចំនួន២នាក់ កូនទី១ អាយុ១៨ឆ្នាំ កូនទី២ អាយុ ១២ឆ្នាំ។
តាមប្រភពព័ត៌មានពីស្ត្រីខាងលើឱ្យដឹងថា ហេតុដែលនាំឲ្យនាងមកលោតទឹកសម្លាប់ខ្លួន គឺដោយសារអន់ចិត្តហ្នឹងស្វាមីមិនខ្វល់ខ្វាយយកចិត្តទុកដាក់ នឹងមិនស្រឡាញ់នាងទើបធ្វើឲ្យនាងអន់ចិត្ត។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ នាងបានជិះម៉ូតូមួយគ្រឿងម៉ាកឌ្រីមសង់ ពណ៌ក្រហមស៊េរីឆ្នាំ២០១៨ ពាក់ផ្លាកលេខភ្នំពញ1HB 9275 ជិះឡើងស្ពានពីលិចទៅកើតលុះមកដល់ជិតកណ្តាលស្ពាន បានឈប់នៅលើស្ពានរួចលោតចុះ ខណៈពេលដែលនាងលោតពីលើស្ពាន ក៏មានបងប្អូនប្រជានេសាទម្នាក់ និងសមត្ថកិច្ចចំនួន២នាក់ បានចេញទូកទៅជួយស្រង់នាងដាក់លើទូកនាំមកច្រាំងខាងលិច ដើម្បីជួយសង្គ្រោះ និងសួរនាំរកសាច់ញាតិនិងស្វាមីរបស់នាង ឱ្យនាំនាងត្រឡប់ទៅផ្ទះវិញ រួចសមត្ថកិច្ចក៏ទាក់ទងទៅបុរសជាស្វាមី ឱ្យមកទទួលនាងត្រឡប់ទៅផ្ទះវិញ។
ករណីទី ២ បន្ទាប់ពីនារីខាងលើលោតពីលើស្ពាន រួចហើយនោះក៏មានយុវតីចំនួនពីរនាក់ មានវ័យប្រមាណជិត២០ឆ្នាំ ដែលម្នាក់ក្នុងចំណោមពួកគេអះអាងថា នាងទាំង២នាក់ជាអ្នកបោកអ៊ុត មានវិបត្តិរឿងម្ចាស់ខោអាវថា បានបាត់លុយចំនួន២០ម៉ឺនរៀល ស្ដីបន្ទោស ដោយខ្លួនមិនបានយកក៏ឈឺចិត្ត បាននាំគ្នាមកលើស្ពានជ្រោយចង្វា ដើម្បីសម្លាប់ខ្លួន មកដល់ចំណុចដែលស្ត្រីខាងលោត ដែលបន្សល់ទុកម៉ូតូនោះ ក៏បានដោះស្បែកជើង និងកាបូបទុកក្បែរម៉ូតូជនរងគ្រោះខាងលើ ដែលនៅកណ្តាលស្ពាននោះ ដោយខ្លាចខ្ពស់ក៏នាំគ្នាដើរចេញពីទីនោះ ដោយភ្លេចយកកាបូបនិងស្បែកជើង ទៅតាមរួចសំដៅទៅគល់ស្ពានត្រើយខាងកើត រួចលោតចុះពីលើស្ពានទាំងពីរនាក់ មកលោតសម្លាប់ខ្លួននៅច្រាំងទន្លេ តែពួកនាងទាំងពីរបានហែលឡើងគោកមកវិញ ដោយពុំមានអ្នកណាជួយសង្គ្រោះទេ គឺឡើងគោកវិញដោយខ្លួនឯង។
នៅក្នុងហេតុការណ៍ខាងលើនារីទាំងបីនាក់ មានវិបត្តិផ្លូវចិត្តមកលោតទឹកមិនបានស្លាប់ដូចបំណងនោះទេ ពោលគឺស្ត្រីម្នាក់ត្រូវបានសមត្ថកិច្ច ព្រមទាំងប្រជានេសាទស្រង់ទាន់ពេល។ រីឯ២នាក់ទៀត គឺពួកនាងបានហែលទឹកឡើងមកលើគោកវិញដោយខ្លួនឯង។
ក្រោយពេលកើតហេតុ ពួកគេទាំងបីនាក់ត្រូវបានត្រឡប់ ទៅលំនៅឋានរៀងៗខ្លួនវិញ នៅព្រលប់ថ្ងៃដដែល៕ រក្សាសិទ្ធិដោយ៖សារឿន
