ខេត្តស្វាយរៀង ៖ ក្នុងពិធីសូត្រមន្តដាក់ឲ្យដំណើរការសាលាឃុំថ្មី ” រមាំងថ្កោល ” លោកជំទាវ ឧត្ដមសេនីយ៍ឯក តុប សារ៉ន អគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ និងជាអនុប្រធានក្រុមយែនឌ័រ ក្រសួងការពារជាតិ បានណែនាំ និងជំរុញដល់បងប្អូនប្រជាពលរដ្ឋ ត្រូវបន្ថែមការប្រុងប្រយ័ត្នអំពីបញ្ហាអនាម័យ និងសុខភាព ជាពិសេស ទប់ស្កាត់កុំឲ្យមានការឆ្លងរីករាលដាលនៃជំងឺកូវីដ-១៩។
លោកជំទាវ ឧត្ដមសេនីយ៍ឯក តុប សារ៉ន លើកឡើងថា នៅតាមបណ្ដាខេត្តជាប់ព្រំដែនភាគខាងលិច ភាគពាយព្យ (កម្ពុជា-ថៃ) និងភាគខាងកើត (កម្ពុជា-វៀតណាម) មានផ្ទុះជំងឺកូវីដ-១៩ ឆ្លងចូលជាសហគមន៍ គួរឲ្យព្រួយបារម្ភ , ដូច្នេះសូមបងប្អូន កុំចល័តទៅណាមកណាប្រសិនបើមិនមានការចាំបាច់ និងត្រូវអនុវត្តឱ្យបានខ្ជាប់ខ្ជួនតាមវិធានការរបស់ក្រសួងសុខាភិបាល និងរាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។ មួយវិញទៀត បន្ទាប់ពីរដូវភ្លៀងបានបញ្ចប់ទៅ មូសខ្លាបានកកើតយ៉ាងច្រើននៅតាមភូមិឋាន ដូច្នេះ ពេលដេកពួន ត្រូវដាក់មុងឱ្យបានត្រឹមត្រូវ ដើម្បីគេចផុតពីជំងឺ គ្រុនឈាម ជំងឺឈីក និងជំងឺផ្សេងៗទៀត។
សូមបញ្ជាក់ថា ទីស្នាក់ការសាលាឃុំ ” រមាំងថ្កោល ” ស្ថិតក្នុងភូមិខ្ជាយ ឃុំរមាំងថ្កោល ស្រុកស្វាយទាប ខេត្តស្វាយរៀង ត្រូវបានរៀបចំពិធីសូត្រមន្តដាក់ឲ្យដំណើរការ នាព្រឹក ថ្ងៃសុក្រ ០៨រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៥ ខែកុម្ភៈ ឆ្នាំ២០២១ ដោយមានមន្ត្រីក្រុមការងារថ្នាក់ក្រសួង មន្ត្រីមូលដ្ឋាន និងបងប្អូនប្រជាពលរដ្ឋជាច្រើននាក់បានចូលរួម។
ជាមួយគ្នានេះ លោកជំទាវ អគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ និងជាអនុប្រធានក្រុមយែនឌ័រ ក្រសួងការពារជាតិ តាងនាមឱ្យក្រុមការងារ មន្ត្រីអាជ្ញាធរមូលដ្ឋាន និងប្រជាពលរដ្ឋ សូមថ្លែងអំណរគុណដល់សម្តេចតេជោ ហ៊ុន សែន ដែលផ្ដល់អគារសាលាឃុំថ្មីមួយនេះ។ លោកជំទាវ ក៏បានថ្លែងអំណរគុណដល់សប្បុរសជន ដែលតែងតែជួយឧបត្ថម្ភថវិកា និងសម្ភារ ជួយដល់ការអភិវឌ្ឍន៍ក្នុងមូលដ្ឋាន ឃុំរមាំងថ្កោល សំរាប់ជាប្រយោជន៍ដល់ ពុក-ម៉ែបងប្អូនប្រជាពលរដ្ឋ ជាពិសេស សូមឱ្យមន្ត្រីថ្នាក់មូលដ្ឋាន ជួយថែរក្សាទីស្នាក់ការសាលាឃុំ រមាំងថ្កោល នេះ ធ្វើយ៉ាងណា ឲ្យប្រើប្រាស់បានយូរអង្វែង និងជួយសម្រួលការងារដល់បងប្អូនប្រជាពលរដ្ឋ ដូចអនុសាសន៍របស់សម្ដេចតេជោហ៊ុន សែន បានលើកឡើងថា មន្ត្រីជាខ្ញុំបម្រើដ៏ស្មោះត្រង់របស់រាស្ត្រ មិនមែនជាចៅហ្វាយនាយរបស់រាស្ត្រ នោះឡើយ។
គួរបញ្ជាក់ថា ទីស្នាក់ការសាលាឃុំ រមាំងថ្កោល ថ្មីនេះ គឺជាអំណោយរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដោយសម្ដេចមើលឃើញថា សាលាឃុំចាស់មានសភាពចាស់ទ្រុឌទ្រោម មន្ត្រីមូលដ្ឋានខ្វះកន្លែងអង្គុយធ្វើការបម្រើប្រជាពលរដ្ឋ ហេតុនេះ សម្ដេចក៏ផ្ដល់ទីស្នាក់ការសាលាឃុំ រមាំងថ្កោល នេះឡើងតែម្ដង។
សប្បុរសជនដែលបានជួយឧបត្ថម្ភ ក្នុងកម្មវិធីសូត្រមន្តដាក់ឲ្យដំណើរការសាលាឃុំនេះ រួមមាន ÷
១- លោកជំទាវឧកញ៉ា វណ្ណ លុយ ទៀង ថៃ ១០០ដុល្លារ និងទឹកពិសាអេរ៉ូទិច ១៥កេស,
២- លោកជំទាវ ថោង ថាវរី និងក្រុមគ្រួសារ ៥០០ ដុល្លារ,
៣- លោកជំទាវឧកញ៉ា ជីប យុទ្ធារី និងក្រុមគ្រួសារ ១លានរៀល,
៤- លោកជំទាវ ស៊ុ ពន្លក អោក សៀង ២០០ដុល្លារ,
៥- លោកជំទាវ ថន ស្រី ឃុន ពិសិដ្ឋ ៥០មុឺនរៀល,
៦- លោកជំទាវ សុខ រតនា សុខ សារ៉ន ២០មុឺនរៀល,
៧- លោកស្រី ឡេង មុំ និងស្វាមី ២០មុឺនរៀល,
៨- លោកស្រី ជឿន ២០មុឺនរៀល ៕ រក្សាសិទ្ធិដោយ ពិសិដ្ឋ CEN
