វីដេអូមួយដែលបង្ហាញស្ត្រីម្នាក់នៅក្នុងប្រទេសម៉ាឡេស៊ី ស្រែកដាក់បុគ្គលិកពេទ្យ បានកំពុងរីករាលដាល ជាមួយការរិះគន់ជាខ្លាំង។ គេបានជឿថា ស្ត្រីនោះបានលួចចូលក្នុងមន្ទីរពេទ្យ ដើម្បីនៅជាមួយប្តីរបស់នាងជាអ្នកជំងឺ covid-19។ មនុស្សជាច្រើនបានសង្ស័យថា នាងបានចូលបន្ទប់ធ្វើចត្ថាឡីស័ក covid-19 ដែលបង្កឲ្យកើតជាជម្លោះខ្លាំងក្លាជាមួយបុគ្គលិកពេទ្យតែម្តង។
នៅក្នុងសេចក្តីថ្លែងការណ៍មួយ អ្នកគ្រប់គ្រងនៃមន្ទីរពេទ្យ Miri បានបញ្ជាក់ថា ស្ត្រីរូបនោះមានភាពតានតឹងយ៉ាងខ្លាំង ដោយសារតែស្ថានភាពសុខភាពប្តីរបស់នាង មិនត្រូវបានគេបង្ហាញឲ្យដឹង ហើយបានបន្ថែមថា ការពិគ្រោះយោបល់ត្រូវបានផ្តល់ដល់ស្ត្រីនោះផងដែរ។
អ្នកគ្រប់គ្រងបានពន្យល់បន្ថែមថា ហេតុការណ៍នេះបានកើតឡើង គឺបន្ទាប់ពីស្ត្រីជាប្រពន្ធរូបនេះ មិនព្រមសហការ និងអនុវត្តតាមគោលការណ៍របស់មន្ទីរពេទ្យ។
មូលហេតុដែលបុគ្គលិកមន្ទីរពេទ្យបានឆ្លើយតប តាមរយៈការថតវីដេអូ គឺក្នុងគោលបំណងជូនដំណឹង និងស្វែងរកជំនួយពីប្រធាននាយកដ្ឋាន និងសហការីដទៃទៀតនៅក្នុងមន្ទីរពេទ្យទាក់ទងនឹងហេតុការណ៍នេះ។
ដោយមានការជួយសម្រុះសម្រួលពីប៉ូលិស ករណីនេះត្រូវបានដោះស្រាយបញ្ចប់រឿង៕ រក្សាសិទ្ធិដោយ៖ លឹម ហុង
