ប្រិយមិត្តមួយចំនួនធំ ប្រាកដណាស់បានស្គាល់ហើយ ពីលោក តាំង គីមហេង ដែលជាអតីតម្ចាស់ផលិតកម្ម Kh Promotion ដ៏ល្បីមួយឆ្មោះ កាលពី២០ឆ្នាំមុន ដែលផលិតកម្មរបស់លោក មានតារាល្បីៗជាច្រើនដួងកាលពីជំនាន់នោះមានដូចជា៖ លោក សាន្ត ផានិត, សុខ ពិសី, សុខ ស្រីនាង, លោក ហ្សូណូ ជាដើម។
ទោះយ៉ាងណា ក្រោយផលិតកម្មរបស់លោក បានបិទទ្វារស្ងាត់អស់រយៈពេលជាច្រើនឆ្នាំ ដែលគ្រប់គ្នាសឹងតែភ្លេចមុខលោកទៅហើយ ស្រាប់តែនៅអំឡុងឆ្នាំ២០១៩ ក៏លេចឮដំណឹងស្ទើរតែមិនគួរឲ្យជឿថា អតីតផលិតកម្មនេះ គឺលោក តាំង គឹមហេង បានធ្លាក់ខ្លួនដល់ថ្នាក់អង្គុយលក់ទឹកសុទ្ធ នៅតាមដងផ្លូវសាធារណៈដ៏គួរឲ្យអាណិតអាសូរជាខ្លាំង។
ដោយឡែក ថ្មីៗនេះ លោក តាំង គឹមហេង ក៏បានធ្វើឲ្យមហាជន មានការចាប់អារម្មណ៍ជាថ្មី តាមរយៈមុខរបរលក់ផ្លែពុទ្រាតាមអនឡាញ និងដឹកឲ្យអតិថិជនដល់ៗកន្លែងវិញម្តង។ ក្នុងនោះ លោកបានសរសេរខ្លីនៅក្នុងបណ្តាញសង្គមថា៖ «សព្វថ្ងៃនេះខ្ញុំជាអ្នកពុទ្រាធម្មជាតិ បាត់ដំបង មិនឆ្ងាញ់មិនយកលុយ ដឹកជូនដល់គ្រប់ទីកន្លែងមិនគិតលុយថែមទេ សូមជួយទិញយកទៅពិសារផង សូមអរគុណ»។ លោកក៏បានបញ្ជាក់ថា៖ «វិថីជីវិតមិនទៀងទាត់ទេ អតីតកាលជាអ្វីក៏ដោយ មិនសំខាន់ទេ តែរឿងបច្ចុប្បន្នទេ ទើបជារឿងដែលត្រូវគិត ព្រោះជីវិតត្រូវការបន្តរស់ទៅមុខទៀត»។
យ៉ាងណាមិញ ក្រោយពីបានឃើញលោកធ្លាក់ខ្លួនបែបនេះ ក៏ឃើញមានបងប្អូនអ្នកប្រើប្រាស់បណ្តាញសង្គម ដែលមានក្តីអាណិត បានជួយទិញពុទ្រារបស់លោកមួយចំនួនផងដែរ៕ រក្សាសិទ្ធិដោយ៖ លឹម ហុង
