ស្ទឹងត្រែង ៖ ករណីចាក់សម្លាប់យុវជនម្នាក់ នៅភូមិបាដឺម ឃុំសាមឃួយ ស្រុកសេសាន ខេត្តស្ទឹងត្រែង បានកំណត់មុខសញ្ញារួចហើយ។ ពេលនេះសមត្ថកិច្ចកំពុងតាមចាប់ជនដៃដល់ យកមកផ្ដន្ទាទោសតាមច្បាប់។
គួររំលឹកឲ្យដឹងថា កាលពីយប់ថ្ងៃទី ៤ ខែកុម្ភៈ ឆ្នាំ ២០២១ វេលាម៉ោង ១១ និង ៣០ នាទី មានអំពើឃាតកម្មមួយកើតឡើង នៅវត្តបាដឺម ឃុំសាមឃួយ បណ្ដាលឲ្យយុវជនម្នាក់ត្រូវគេចាក់សម្លាញ់។ ជនរងគ្រោះឈ្មោះវីឧត្តម អាយុ ២១ ឆ្នាំ រស់នៅភូមិភ្លុក ឃុំភ្លុក ស្រុកសេសាន។
ប្រភពពីសមត្ថកិច្ចបានប្រាប់ឲ្យដឹងថា នៅយប់កើតហេតុវត្តបាដឺម មានរៀបចំពិធីកម្សាន្ត មួយ។ នៅយប់ពិធីនោះ មានករណីឃាតកម្មកើតឡើង។ ទំនាស់រវាងយុវជនពីរក្រុម ទំនងជាឌឺដងដាក់គ្នារវាងអ្នកឃុំភ្លុក និងឃុំសាមឃួយ រហូតឈានដល់ប្រើប្រាស់អាវុធមុតស្រួច ចាក់ចំដើមដោះខាងឆ្វេង បណ្ដាលឱ្យជនរងគ្រោះដួលស្លាប់នៅបរិវេណវត្ត។
នៅយប់កើតហេតុនោះ ក្រុមទាំងពីរបានបង្កជម្លោះម្តងហើយ តែត្រូវប្រជាការពារភូមិការពារក្នុងពិធីនោះ ឃាត់ដកហូតសម្ភារអាវុធដាវមួយចំនួន។ លុះពេលយប់ជ្រៅក្រុមទាំង ២ ក៏បានបង្កជម្លោះម្ដងទៀត ខណៈពេលប្រជាការពារភូមិទៅផ្ទះ។ ពេលបង្កជម្លោះលើកទី ២ ក៏មានភាគ្គីម្ខាងទៀត ចាក់សម្លាប់យុវជនម្នាក់តែម្ដងទៅ។
សមត្ថកិច្ចមិនទាន់បង្ហាញអត្តសញ្ញាណជនដៃដល់ ដែលបានចាក់សម្លាប់យុវជនម្នាក់នៅឡើយទេ ពេលនេះកំពុងតាមចាប់ខ្លួនជនបង្កនោះ៕ រក្សាសិទ្ធិដោយ៖សំណាង