ភ្នំពេញ ៖ តុលាការនឹងប្រកាសសាលក្រមផ្តន្ទាទោសមេខ្លោងឧទ្ទាមក្រៅច្បាប់ សម រង្ស៊ី និងបក្ខពួកចំនួន ៨នាក់ នៅថ្ងៃទី២៣ ខែកុម្ភៈ ឆ្នាំ២០២១ ខាងមុខនេះ លើសំណុំរឿង ឧបឃាត ឬ «ការប៉ុនប៉ងធ្វើរដ្ឋប្រហារ»។ ការគ្រោងនឹងប្រកាសសាលក្រមនេះ បានធ្វើឡើងបន្ទាប់ពីតុលាការបានបើកសវនាការនៅព្រឹកថ្ងៃទី៩ ខែកុម្ភៈ ឆ្នាំ២០២១ នេះ។
នៅក្នុងសវនាការ គឺមិនមានវត្តមានជនជាប់ចោទទាំង ៩នាក់នោះទេ ប៉ុន្តែមានមេធាវីតំណាងចូលការពារក្តីនៅក្នុងសវនាការ។
សំណុំរឿងនេះ តុលាការបានដំណើរការបើកសវនាការកាលពីថ្ងៃទី១១ ខែវិច្ឆិកា ឆ្នាំ២០២០ , កាលពីថ្ងៃទី២៩ ខែមករា ឆ្នាំ២០២១ និងថ្ងៃទី៩ ខែកុម្ភៈ ឆ្នាំ២០២១។
សំណុំរឿង ឧបឃាត ឬ «ការប៉ុនប៉ងធ្វើរដ្ឋប្រហារ» គឺតាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី កាលពីថ្ងៃទី០៩ ខែវិច្ឆិកា ឆ្នាំ២០១៩។
លោក សម រង្ស៊ី និងអតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួន ៨រូបផ្សេងទៀតដែលកំពុងតែស្ថិតនៅក្រៅប្រទេស ត្រូវបានតុលាការចេញដីកាបង្គាប់ឲ្យចូលខ្លួននៅថ្ងៃទី១១ ខែវិច្ឆិកា ឆ្នាំ២០២០ ដើម្បីឆ្លើយដោះសារពីការចោទប្រកាន់ពីបទ ឧបឃាត ឬ «ការប៉ុនប៉ងធ្វើរដ្ឋប្រហារ» តាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី នៅថ្ងៃទី០៩ ខែវិច្ឆិកា ឆ្នាំ២០១៩។
ដីកាបង្គាប់ឲ្យចូលខ្លួននេះ ចេញដោយលោកសេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១៩ ខែតុលា ឆ្នាំ២០២០ ដែលត្រូវបានសមត្ថកិច្ចយកទៅបិទនៅអតីតទីស្នាក់ការនៃអតីតគណបក្សសង្គ្រោះជាតិ នៅសង្កាត់ចាក់អង្រែលើ ខណ្ឌមានជ័យ កាលពីរសៀលថ្ងៃទី២០ ខែតុលា ឆ្នាំ២០២០។
ជនជាប់ចោទទាំង ៩នាក់ ដែលបង្គាប់ឲ្យចូលខ្លួនមានដូចជា ៖
១. លោកសម រង្ស៊ី
២. លោកអេង ឆៃអ៊ាង
៣. លោកស្រី មូរ សុខហួរ
៤. លោកអ៊ូ ច័ន្ទឫទ្ធិ
៥. លោកហូរ វ៉ាន់
៦. លោកឡុង រី
៧. លោកម៉ែន សុថាវរិន្ទ្រ
៨. លោកស្រី ជូឡុង សូមូរ៉ា
៩. លោកនុត រំដួល។
យោងតាមមាត្រា ៤៥១ ៖ បទឧបឃាត គឺជាការប្រព្រឹត្តអំពើហិង្សាមួយ ឬច្រើន ក្នុងគោលបំណងបង្កឲ្យមានគ្រោះថ្នាក់ដល់ស្ថាប័ន នៃព្រះរាជាណាចក្រកម្ពុជា ឬនាំឲ្យមានការប៉ះពាល់ដល់បូរណភាពនៃដែនដីជាតិ។ បទឧបឃាត ត្រូវផ្តន្ទាទោសដាក់ពន្ធនាគារពី ១៥ឆ្នាំ ទៅ ៣០ឆ្នាំ។
គួរបញ្ជាក់ថា កាលពីថ្ងៃទី៣ ខែតុលា ឆ្នាំ២០១៩ តុលាការបានចេញដីកាឲ្យចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំង ៨រូប។ ដីកាចាប់ខ្លួននេះ ធ្វើឡើងក្រោមបទចោទ «ឧបឃាត» ឬ «ការប៉ុនប៉ងធ្វើរដ្ឋប្រហារ» តាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី នៅថ្ងៃទី០៩ ខែវិច្ឆិកា ឆ្នាំ២០១៩។ មនុស្សទាំង៩នាក់នេះ ត្រូវបានអយ្យការអមសាលាដំបូងរាជធានីភ្នំពេញចោទប្រកាន់នៅក្នុងសំណុំរឿងព្រហ្មទណ្ឌលេខ ៦៥៣៦ ចុះថ្ងៃទី១៩ ខែកញ្ញា ឆ្នាំ២០១៩ ពីបទ «ឧបឃាត» តាមមាត្រា ២៧ និងមាត្រា ៤៥១ នៃក្រមព្រហ្មទណ្ឌកម្ពុជា។ ជាបទចោទពាក់ព័ន្ធនឹងអង្គហេតុនៃ «ការប៉ុនប៉ងធ្វើរដ្ឋប្រហារ» ផ្តួលរំលំរដ្ឋាភិបាលកម្ពុជា ក្រោមឧបាយកលជា «ផែនការនៃការវិលត្រលប់មកកម្ពុជាវិញរបស់លោក សម រង្ស៊ី» ដោយមានការអំពាវនាវ និងប្រើថវិកាប៉ុនប៉ងបង្កើតកងកម្លាំងឧទ្ទាមប្រដាប់អាវុធខុសច្បាប់ ដើម្បីចូលរួមអនុវត្តផែនការនេះ៕ រក្សាសិទ្ធិដោយៈ ចេស្តារ
