ខេត្តព្រះសីហនុ៖ សមត្ថកិច្ចកងរាជអាវុធហត្ថខេត្តព្រះសីហនុ បានឲ្យដឹងថា ជនសង្ស័យដែលជាឃាតករសម្លាប់បុរសម្នាក់ទម្លាក់ចូលក្នុងទឹកសមុទ្រ នាស្រុកស្ទឹងហាវ ខេត្តព្រះសីហនុ គឺឃាតករត្រូវជាប្អូនប្រុសបង្កើត របស់ជនរងគ្រោះ។ មន្ត្រីកងរាជអាវុធហត្ថខេត្តព្រះសីហនុ ឲ្យដឹងថា ជនសង្ស័យជាឃាតករ ដែលសម្លាប់បុរសអ្នកនេសាទម្នាក់ វាយទម្លាក់ទឹកសមុទ្រ នៅស្រុកស្ទឹងហាវ ខេត្តព្រះសីហនុ កាលពីថ្ងៃទី២៤ ខែកុម្ភៈ ឆ្នាំ២០១៨ គឺត្រូវជាប្អូនប្រុសបង្កើត របស់ជនរងគ្រោះ និងរស់នៅក្នុងមូលដ្ឋានជាមួយគ្នា។ កម្លាំងកងរាជអាវុធហត្ថ ខេត្តព្រះសីហនុ បានឲ្យដឹងថា មុខសញ្ញាជនសង្ស័យ ដែលជាអ្នកដៃដល់ វាយសម្លាប់បងប្រុសបង្កើត របស់ខ្លួនខាងលើនេះ ត្រូវកម្លាំងកងរាជអាវុធហត្ថ ខេត្តនេះ បានបញ្ជូនខ្លួនទៅសាលាដំបូងខេត្តព្រះសីហនុ នៅរសៀលថ្ងៃទី២៦ ខែកុម្ភៈ ឆ្នាំ២០១៨។ កងរាជអាវុធហត្ថខេត្ត បានឲ្យដឹងទៀតថា ជនសង្ស័យខាងលើមិនទាន់ប្រាប់សមត្ថកិច្ចអំពីមូលហេតុ ដែលខ្លួនសម្លាប់បងប្រុសបង្កើតនោះទេ។
ជនសង្ស័យជាឃាតករ ដែលបានវាយសម្លាប់បងបង្កើត របស់ខ្លួនឯងនេះ មានឈ្មោះ នេត សំអឿន ភេទប្រុស អាយុ ៤២ឆ្នាំ មុខរបរនេសាទ មានទីលំនៅបច្ចុប្បន្ន ភូមិបឹងរាំង ឃុំសាមគ្គី ស្រុកព្រៃនប់ ខេត្តព្រះសីហនុ។ រីឯជនរងគ្រោះ សាកសព មានឈ្មោះ នេត សម្បត្តិ ភេទប្រុស អាយុ ៤៨ឆ្នាំ មុខរបរនេសាទ មានទីលំនៅបច្ចុប្បន្ន ភូមិបឹងរាំង ឃុំសាមគ្គី ស្រុកព្រៃនប់ ខេត្តព្រះសីហនុ។ ទាក់ទិនឃាតកម្មនេះ លោកឧត្ដមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ មានប្រសាសន៍ថា សំណុំរឿងបទល្មើសមនុស្សឃាត លើបងប្រុសបង្កើត របស់ខ្លួនឯងនេះ បានកើតឡើងកាលពីថ្ងៃទី២៤ ខែកុម្ភ: ឆ្នាំ២០១៨ នៅចំណុចក្នុងភូមិសាស្ត្រស្រុកស្ទឹងហាវ។ លោកបន្តថា ក្រោយពេលកើតហេតុ ជនសង្ស័យ ក៏បានរត់ទៅសំងំលាក់ខ្លួន នៅស្រុកបុទុមសាគរ ខេត្តកោះកុង ហើយត្រូវកម្លាំងកងរាជអាវុធហត្ថខេត្តព្រះសីហនុ សហការជាមួយកងកម្លាំងរាជអាវុធហត្ថ ស្រុកបុទុមសាគរ ខេត្តកោះកុង ចាប់ខ្លួនបាន និងបញ្ជូនមកឲ្យបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីចាត់ការបន្តតាមនីតិវិធីច្បាប់៕ ដែន សីមា
