Friday, March 29, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

រថយន្ត​ក្រុមហ៊ុន​វិ​រៈ​ប៊ុន​ថាំ បើក​លឿន​ដូច​ហោះ រេ​ចង្កូត​ទៅបុក​ក្មេង​ស្លាប់ នៅ​ស្រុក​ស្វាយទាប​

spot_img

ស្វាយរៀង ៖ គ្រោះថ្នាក់​ចរាចរណ៍​ដ៏​អាក្រក់ បង្កឡើង​ដោយ​អ្នកបើកបរ​រថយន្ត​ក្រុមហ៊ុន​វិ​រៈ​ប៊ុន​ថាំ ដោយ​បើកបរ​ល្បឿន​លឿន​ហើយ​បាន រេ​ចង្កូត​ធ្លាក់​ផ្លូវ​ទៅបុក​ក្មេងប្រុស​ម្នាក់ ដែល​កំពុង​ឈរ​កាន់​កង់​នៅលើ​ចិញ្ចើមផ្លូវ បណ្តាល​ឲ្យ​រងរបួស​ធ្ងន់ធ្ងរ ហើយ​បាន​ស្លាប់​ពេល​ឳ​ពុក​ម្តាយ​យកទៅ​ដល់​មន្ទីរពេទ្យ​។​

​ចំណែក​រថយន្ត​បង្ក​បាន​ជ្រុល​ទៅបុក​ដើមឈើ បណ្តាល​ឲ្យ​ក្រឡាប់​ផ្ងារជើង គាប​ជាប់​នឹង​ដើមឈើ​ទៅមុខ​លែងរួច​។ បើតាម​សមត្ថកិច្ច​បាន​ឲ្យ​ដឹងថា ករណី​គ្រោះថ្នាក់​ចរាចរណ៍​នេះ បានកើត​ឡើង​នៅ​ថ្ងៃទី​១០ ខែកុម្ភៈ​ឆ្នាំ​២០២១ វេលា​ម៉ោង​៦​និង​៤០​នាទី​យប់ រវាង​រថយន្ត​និង​កង់ នៅលើ​កំណាត់​ផ្លូវជាតិ​លេខ​១ ត្រង់ចំណុច​ចន្លោះ​គីឡូម៉ែត្រ​លេខ​១៣៩/១៤០ ស្ថិតក្នុង​ភូមិ​លៀប ឃុំ​កណ្តៀង​រាយ ស្រុក​ស្វាយទាប ខេត្តស្វាយរៀង​។​

​ប្រភព​បន្តទៀតថា មុនពេល​កើតហេតុ គេ​ឃើញ​រថយន្ត​១​គ្រឿង ម៉ាក​ហ៊ីយ៉ាន់ដាយ ពណ៌​ទឹកក្រូច ពាក់​ផ្លាកលេខ​ភ្នំពេញ ២BJ.៦៤៥៨ បើកបរ​ទិសដៅ​ពី​លិចទៅ​កើត​យ៉ាង​លឿន លុះ​មកដល់​ចំណុចកើតហេតុ​ខាងលើ ស្រាប់តែ​រេ​ចង្កូត​ធ្លាក់​ផ្លូវ​ទៅខាង​ស្តាំ បាន​ជ្រុល​ទៅបុក​ក្មេងប្រុស​ម្នាក់ ដែល​កំពុង​ឈរ​កាន់​កង់​នៅលើ​ចិញ្ចើមថ្នល់ ខាងត្បូង​ពេញទំហឹង បណ្តាល​ឲ្យ​រងរបួស​យ៉ាងធ្ងន់ធ្ងរ ហើយ​បាន​ស្លាប់ ពេល​ឳ​ពុក​ម្តាយ​បញ្ជូន​ដល់​មន្ទីរពេទ្យ​។​

​សមត្ថកិច្ច​បាន​ឲ្យ​ដឹង​ទៀតថា ជន​បើកបរ​រថយន្ត​បង្ក​ឈ្មោះ ធឿន ផាន់ ភេទ​ប្រុស អាយុ​៣១​ឆ្នាំ មុខរបរ​បើកបរ​រថ​យន្ត​ក្រុមហ៊ុន​វិ​រៈ​ប៊ុន​ថាំ រស់នៅ​ភូមិ​ថ្ម​ស ឃុំ​ថ្ម​ស ស្រុក​បុ​ទុម​សាគរ ខេត្តកោះកុង (​គ្មាន​របួសស្នាម​) ចំណែក​កុមារា​រងគ្រោះ​ឈ្មោះ​រុំ វិ​រះ ភេទ​ប្រុស អាយុ​១២​ឆ្នាំ មុខរបរ​សិស្ស រស់នៅ​ភូមិ​លៀប ឃុំ​កណ្តៀង​រាយ ស្រុក​ស្វាយទាប ខេត្តស្វាយរៀង រងរបួស​ធ្ងន់ធ្ងរ បាន​បញ្ជូនទៅ​មន្ទីរពេទ្យបង្អែក​ស្រុក​ស្វាយទាប ដើម្បី​សង្គ្រោះ ក៏ប៉ុន្តែ​ដោយ​របួស​ធ្ងន់ធ្ងរ​ពេក បាន​ស្លាប់​នៅ​មន្ទីរពេទ្យ​។​

​រីឯ​មធ្យោបាយ​ទាំងពីរ (​រថយន្ត ខូចខាត​ធ្ងន់ និង​កង់​ខូចខាត​ស្រាល​) យកមក​រក្សាទុក​នៅ អធិការដ្ឋាន​នគរបាល​ស្រុក​ស្វាយទាប ។ ចំណែកឯ​អ្នកបើកបរ​រថយន្ត បាន​ឃាត់ខ្លួន ទុក​នៅ​អធិការ ដើម្បី​ដោះស្រាយ​តាម​នីតិវិធី​។ មូលហេតុៈ រថយន្ត​ប្រើប្រាស់​ល្បឿន​លឿន រេ​ចង្កូត​ធ្លាក់​ផ្លូវ​ទៅបុក​ក្មេង​នៅ​ខាងស្តាំ​ដៃ​។ សព​ប្រគល់​ឲ្យ​ក្រុមគ្រួសារ​យកទៅ​ធ្វើបុណ្យ​តាម​ប្រពៃណី​៕ រក្សា​សិទ្ធិ​ដោយ​៖​វ៉ៃ​កូ​

spot_img
×