ស្ទឹងត្រែង ៖ គ្រោះថ្នាក់ចរាចរណ៍រវាងរថយន្តកូរ៉េដឹកមាន់រស់ ប៉ះជាមួយរថយន្តឡិចស៊ីស បណ្ដាលឲ្យមនុស្សរងរបួសចំនួន ៩នាក់ នៅព្រំប្រទល់ឃុំស្រែឫស្សី និងឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង វេលាម៉ោងជាង ១២ ថ្ងៃត្រង់ទី១៣ ខែកុម្ភៈ ឆ្នាំ ២០២១។
ប្រភពពីមន្ត្រីនគរបាលបានប្រាប់ឲ្យដឹងថា គ្រោះថ្នាក់ចរាចរណ៍ខាងលើនេះ មានចម្ងាយប្រមាណជា ១៧ គីឡូម៉ែត្រ ពីក្រុងស្ទឹងត្រែង លើកំណាត់ផ្លូវជាតិលេខ ៩ នៅក្នុងឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។
ប្រភពបានឲ្យដឹងទៀតថា គ្រោះថ្នាក់ចរាចរណ៍ខាងលើនេះ បណ្ដាលឲ្យមនុស្សចំនួន៩នាក់ រងរបួសធ្ងន់ស្រាល ក្នុងនោះមានស្រី ២ នាក់។ អ្នករងរបួសត្រូវបានដឹកទៅសង្គ្រោះបន្ទាន់ នៅមន្ទីរពេទ្យបង្អែកខេត្តស្ទឹងត្រែងភ្លាមៗ។ នៅក្នុងហេតុការណ៍នោះ រថយន្តកូរ៉េដឹកមាន់ បានធ្វើដំណើរបញ្ច្រាសទិសគ្នា ពីព្រះវិហារមកខេត្តស្ទឹងត្រែង រីឯរថយន្តឡិចស៊ិស ពីស្ទឹងត្រែងទៅខាងខេត្តព្រះវិហារ។ សមត្ថកិច្ចចុះដល់កន្លែងកើតហេតុ ដើម្បីសម្រួលយករថយន្តចេញពីកន្លែងកើតហេតុ។
សមត្ថកិច្ចមិនទាន់ប្រាប់ពីអត្តសញ្ញាណ អ្នករងរបួសនៅឡើយទេ៕ រក្សាសិទ្ធិដោយ ៖ សំណាង
