ភ្នំពេញ ៖ នៅមុននេះបន្តិច នៅលើបណ្តាញសង្គមហ្វេសប៊ុក បានចែករំលែកព័ត៌មានដ៏ក្តៅគគុកមួយ ដោយបានលើកឡើងផ្ទាំងប៉ាណូរបស់ក្រុមហ៊ុន ទ្រី ដាណា (NNP) ដាក់កាត់ទទឹងផ្លូវ ត្រូវអាជ្ញាធរចុះរុះរើ ព្រោះមិនទាន់មានច្បាប់អនុញ្ញាតឲ្យដាក់ បែរជាលួចដាក់ តើជាការពិត ឬយ៉ាងណា?។
យោងតាមប្រភពព័ត៌មាន ចែករំលែកតៗគ្នា បានបញ្ជាក់ឲ្យដឹងដ៏គួរឲ្យភ្ញាក់ផ្អើលថា «ខណៈពេលម៉ោង២រសៀលថ្ងៃទី១៥ ខែកុម្ភៈ ឆ្នាំ២០២១ ផ្ទាំងប៉ាណូរបស់ក្រុមហ៊ុន ទ្រី ដាណា(NNP) ដែលដាក់ទទឹងផ្លូវជាតិលេខ៥៧ ក្នុងខេត្តប៉ៃលិន ត្រូវបានអាជ្ញាធរខេត្តប៉ៃលិន សហការជាមួយមន្ត្រីជំនាញក្រុងប៉ៃលិន សម្រេចដោះចេញហើយ ព្រោះមិនទាន់មានច្បាប់អនុញ្ញាតឲ្យដាក់ បែរជាលួចដាក់ដោយគ្មានអាជ្ញាធរជំនាញដឹង។ ព័ត៌មានបឋម»។
ស្របជាមួយគ្នានេះ គេក៏បានឃើញមហាជនជាច្រើន បានលើកជាសំណួរងឿងឆ្ងល់ «អយុត្តិធម៌ណាស់ ក្នុងនាមខ្ញុំ ជាម្ចាស់ក្រុមហ៊ុនដូចគ្នា យើងមានច្បាប់ត្រឹមត្រូវ យើងបង់ពន្ធត្រឹមត្រូវ ចំណាយមួយខែៗរាប់ម៉ឺនដុលារ ចូលរដ្ឋ ចុះក្រុហ៊ុនស្រាបៀរ ក្រុមហ៊ុនភេសជ្ជៈ ហេតុអ្វីគេដាក់បាន, ចុះអាជ្ញាធរខ្វាក់ភ្នែក ឬទើបភ្ញាក់ពីស្រវឹង បានជាគេដាក់ផ្ទាំងប៉ាណូធំយ៉ាងហ្នឹងហើយ បែរមិនដឹងថាគេលួចដាក់នោះ?»។
ទោះយ៉ាងណា ខណៈពេលនេះ គេក៏មិនទាន់ឃើញខាងក្រុមហ៊ុនអ្នកស្រី ទ្រី ដាណ ចេញប្រតិកម្មឆ្លើយតបទៅនឹងព័ត៌មាន ដែលកំពុងផ្ទុះក្តៅគគុកនេះនៅឡើយទេ ដើម្បីឲ្យមហាជនបានដឹងច្បាស់ថា តើវាជារឿងពិត ឬយ៉ាងណា?៕ រក្សាសិទ្ធិដោយ៖ លឹម ហុង
