ភ្នំពេញ ៖ បុរសម្នាក់រងរបួសធ្ងន់ ខណៈពេលកំពុងជិះម៉ូតូក៏បានបុកជ្រុលទៅបុករ៉ឺម៉កម៉ូតូសណ្តោងធុងហ្គាស ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការសង្គ្រោះ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង១០និង២៥នាទីព្រឹកថ្ងៃទី១៦ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវវែងស្រង(ផ្លូវចោមចៅ) ទល់មុខផ្សារឯករាជ្យ១ សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសរងគ្រោះខាងលើ ជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០២១ ពណ៌ខ្មៅពាក់ផ្លាកលេខ ត្បូងឃ្មុំ 1I- 0648 ធ្វើដំណើរពីទិសដៅពីលិចទៅកើតក្នុងល្បឿនយ៉ាងលឿន លុះដល់ចំណុចកើតហេតុក៏មានរ៉ឺម៉កសណ្តោងម៉ូតូដឹកធុងហ្គាស បើកឆ្លងផ្លូវជាន់ហ្វ្រាំងមិនជាប់បានជ្រុលទៅបុករ៉ឺម៉កដឹកហ្គាសយ៉ាងពេញទំហឹង បណ្តាលឲ្យម្ចាស់ម្ចាស់រងរបួសបាក់ជើងស្តាំនិងដៃខាងស្តាំ ចំណែកម៉ូតូរងការខូចខាតផ្នែកខាងមុខទាំងស្រុងតែម្តង។
ក្រោយពេលកើតហេតុសមត្ថកិច្ចប៉ុស្តិ៍រដ្ឋបាលចោមចៅទី១ សហការជាមួយចរាចរណ៍ខណ្ឌចុះមកធ្វើការវាស់វែង និងយកម៉ូតូនិងរ៉ឺម៉កទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីដោះស្រាយគ្នានៅពេលក្រោយ៕ រក្សាសិទ្ធិដោយ៖សួង សាម
