ភ្នំពេញ ៖ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាបបានថ្លែងថាដោយផ្អែកទៅលើសម្បត្តិវប្បធម៌ ទីតាំងភូមិសាស្ត្រ បានធ្វើឱ្យខេត្ដសៀមរាបមានសក្ដានុពលសេដ្ឋកិច្ចជាចម្បងលើវិស័យកសិកម្ម និង ទេសចរណ៍។ការថយចុះភ្ញៀវទេសចរទៅកាន់ខេត្តសៀមរាបត្រូវបានមន្ត្រីក្រុមប្រឹក្សាខេត្តលើកឡើងនៅថ្ងៃទី១៨ ខែកុម្ភៈ ឆ្នាំ២០២១ ក្នុងសន្និសីទសារព័ត៌មានស្តីពី «វឌ្ឍនភាពមូលដ្ឋានឃុំ សង្កាត់ និងទិសដៅការងារបន្តរបស់ខេត្តសៀមរាប»ដែលរៀបចំដោយអង្គភាពអ្នកនាំពាក្យរាជរដ្ឋាភិបាល ។
ឯកឧត្តមបន្តថាដោយការរីករាលដាលជំងឺកូវីដ-១៩នៅទូទាំងពិភពលោកក្នុងឆ្នាំ២០២០ បានធ្វើឱ្យភ្ញៀវទេសចរធ្លាក់ចុះយ៉ាងគំហុគ ដែលជះឥទ្ធិពលមកលើប្រទេសកម្ពុជា ដោយមានភ្ញៀវទេសចរមកទស្សនាខេត្តសៀមរាបសរុបចំនួន ១ ១០៤ ០៣៦នាក់ មានការថយចុះ ៧៤,០៩ភាគរយ បើប្រៀបធៀបឆ្នាំ២០១៩ ក្នុងនោះមានដូចជា ភ្ញៀវទេសចរអន្តរជាតិមានចំនួនសរុប ៤០០ ៨៨៩នាក់ មានការថយចុះ ៨១,៨២ភាគរយ និងភ្ញៀវទេសចរជាតិមានចំនួនសរុប ៧០៣ ១៤៧នាក់ មានការថយចុះ ៦៥,៨១ភាគរយ ប្រៀបធៀបនឹងឆ្នាំ២០១៩។
ដោយស្ថានភាពជំងឺកូវីដ-១៩ ក្នុងសហគមន៍បានធូរស្រាល បានធ្វើឱ្យទេសចរណ៍ក្នុងស្រុកមានសកម្មភាពមួយចំនួន ជាហេតុធ្វើឱ្យសេវាកម្មទេសចរណ៍ (សណ្ឋាគារ ផ្ទះសំណាក់) អាប់ផាតមិន និងភោជនីយដ្ឋានបានធ្វើឱ្យមានសកម្មភាពមួយចំនួនឡើងវិញតែមិនសូវមានសន្ទុះខ្ពស់នៅឡើយ អាស្រ័យដោយហេដ្ឋារចនាសម្ព័ន្ធផ្លូវថ្នល់ក្នុងក្រុងជាច្រើនកំពុងដំណើរការសាងសង់។
ឯកឧត្តម ប្រធានក្រុមប្រឹក្សាខេត្តបានបញ្ជាក់ថាតាមរយៈសក្កានុពលទាំងនេះ បានធ្វើឱ្យសេដ្ឋកិច្ចខេត្តសៀមរាប ទទួលបាននូវផលិតផលក្នុងស្រុកសរុប (ផសស/GDP) ១ ៦៣៦លានដុល្លារអាមេរិក ជាមួយនឹងប្រាក់ចំណូលជាមធ្យម(ផសស) សម្រាប់មនុស្សម្នាក់ស្មើនឹង ១ ៥៤៥ដុល្លារអាមេរិក។
ដោយឡែកឯកឧត្តម ផៃ ស៊ីផាន,រដ្ឋមន្ត្រីអមនាយករដ្ឋមន្ត្រីនិងជាប្រធានអ្កភាពអ្នកនាំពាក្យរាជរដ្ឋាភិបាលបានថ្លែងថាសន្និសីទសារព័ត៌មាននេះមានគោលបំណងបំផុសនិងបបង្ហាញជូនសាធារណជននូវយន្តរាប្រជាធិបតេយ្យថ្នាក់ក្រោមជាតិជាប្រវត្តិសាស្ត្ររបស់កម្ពុជានិងផ្សព្វផ្សាយពីសមិទ្ធិផល ដែលរដ្ឋបាលថ្នាក់មូលដ្ឋានបានខិតខំប្រឹងប្រែងបំពេញការងារសម្រេចបានក្នុងការផ្តល់សេវាសាធារណៈនិងអភិវឌ្ឍមូលដ្ឋានឃុំ/សង្កាត់។
សណ្ឋាគារសរុបមាន ២២៨កន្លែង ស្មើនឹង ១៤ ៥៩៩ បន្ទប់ផ្ទះសំណាក់មានចំនួន ៣១០កន្លែង ស្មើនឹង ៤ ៦៧៩បន្ទប់។ភោជនីយដ្ឋានសរុបចំនួន ១៩៦កន្លែង ម៉ាស្សា ៥០កន្លែង ខារ៉ាអូខេចំនួន ១៤កន្លែង ឌីស្គូតែកចំនួន ០៤កន្លែង និងកន្លែងវាយកូនហ្គោល ០៣កន្លែង។ទីភ្នាក់ងារទេសចរណ៍ ៣២១សាខា មគ្គុទ្ទេសក៍ទេសចរណ៍មានចំនួន ៥ ១៧២នាក់ ស្រី ៧៥៧ នាក់។
រដ្ឋបាលខេត្តសៀមរាបបានយកចិត្តទុកដាក់ក្នុងការភ្ជាប់ទំនាក់ទំនង ចងសម្ព័ន្ធមេត្រីភាព ជាមួយនឹងកិច្ចសហប្រតិបត្តិការ និងទំនាក់ទំនងល្អជាមួយបណ្តាខេត្ត-ក្រុង ជាសម្ព័ន្ធមេត្រីភាព ចំនួន ១៦ សមាគមន៍ទីភ្នាក់ងារសហប្រតិបត្តិការចំនួន ០៥ នៃប្រទេសចំនួន ០៥ ដែលសម្រេចបាននូវលទ្ធផលការងារមួយចំនួនសម្រាប់ការអភិវឌ្ឍខេត្ត រួមមាន ៖ គម្រោងបណ្តាញគ្រប់គ្រងទឹកកង្វក់ និងផលិតជីសរីរាង្គដែលមានថវិកាគាំទ្រ ១.៧លានអ៊ឺរ៉ូ គម្រោងគាំទ្របច្ចេកទេសសម្រាប់រៀបចំទីក្រុងវៃឆ្លាតខេត្តសៀមរាប ការផ្តល់អាហារូបករណ៍ និងបណ្តុះបណ្តាលធនធានមនុស្សដល់មន្ត្រីសិស្សនិស្សិតលើជំនាញផ្សេងៗ សរុបចំនួន ១១រូប ការកសាងផ្លូវបេតុងអភិវឌ្ឍន៍ភូមិភ្នំក្រោម ដែលមានថវិកាគាំទ្រ ៦៤ ៧៥០ដុល្លាអាមេរិក ការផ្តល់រថយន្តសំអាតផ្លូវចំនួន ០៣គ្រឿង រថយន្ត-ពន្លត់អគ្គីភ័យចំនួន ០៤គ្រឿង រថយន្តសង្គ្រោះបន្ទាន់ ០៤គ្រឿង ព្រមទាំងការផ្តល់គ្រឿងសម្ភារៈពេទ្យ និងម៉ាស់ចំនួន ២៣៨ ៥០០ម៉ាស់ ដែលបានរួមចំណែកក្នុងការទប់ស្កាត់នូវជំងឺកូវីដ-១៩ ក្នុងខេត្តសៀមរាប៕ដោយ.CEN
