ខេត្តស្វាយរៀង ៖ ស្ត្រីម្នាក់បានស្លាប់ភ្លាមនៅកន្លែងកើតហេតុ ដោយសារគ្រោះថ្នាក់ចរាចរណ៍មួយ រវាងម៉ូតូនិងរថយន្តនៅលើផ្លូវជាតិលេខ ១ ចន្លោះគីឡូម៉ែត្រលេខ១៣៣/១៣៤ ស្ថិតក្នុងភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ដែលហេតុការណ៍នេះ បានកើតឡើងកាលពីវេលាម៉ោង ១៦ និង ៣០ នាទីរសៀលថ្ងៃទី ២៣ ខែកុម្ភៈឆ្នាំ ២០២១។
សមត្ថកិច្ចបានឲ្យដឹងថា មានម៉ូតូមួយគ្រឿង ម៉ាកHONDA DREAM ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ ស្វាយរៀង ១H-៨៤០៧ បើកបរដោយឈ្មោះ អិន សារ៉ួន ភេទស្រី អាយុ៦២ឆ្នាំ មុខរបរកសិករសញ្ជាតិខ្មែរ ជនជាតិខ្មែរ រស់នៅភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ស្លាប់នៅកន្លែងកើតហេតុ (ពាក់មួកសុវត្ថិភាព) ទិសដៅពីលិចទៅកើតរួចបត់ មកដល់កន្លែងកើតហេតុ ត្រូវរថយន្ត ម៉ាកHYUNDAI LIBERO ពណ៌ខៀវចាស់ ស្លាកលេខ ភ្នំពេញ ២AL ៧៦៤១ បុកចំពីមុខ ក្នុងទិសដៅផ្ទុយគ្នាពីទៅកើតទៅលិច បើកបរដោយឈ្មោះ អេង ពៅ ភេទប្រុស អាយុ៤៩ឆ្នាំ មុខរបរបើកបររថយន្ត សញ្ជាតិខ្មែរ ជនជាតិខ្មែរ រស់នៅភូមិព្រៃទំពួង ឃុំពើក ស្រុក អង្គស្នួល ខេត្តកណ្តាល គ្មានរបួសស្នាម ។
ប្រភពដដែលបានបន្តឱ្យដឹងទៀតថា ករណីនេះសាកសពបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី ចំណែកឯអ្នកបើកបររថយន្តបានឃាត់ខ្លួននាំ មកអធិការដ្ឋាននគរបាលស្រុកស្វាយទាបដើម្បីសាកសួរចម្លើយ ចំពោះមធ្យោបាយទាំងពីរគ្រឿង (រថយន្ត ខូចខាចស្រាល និង ម៉ូតូខូចខាតធ្ងន់) យកមករក្សាទុកនៅអធិការដ្ឋាននគរបាលស្រុកស្វាយទាប។ ហើយមូលហេតុដែលបង្កឲ្យមានករណីគ្រោះថ្នាក់ចរាចរណ៍នេះ កើតឡើងគឺបណ្ដាលមកពីអ្នកបើកបរម៉ូតូបត់ឆ្វេង៕ រក្សាសិទ្ធិដោយ ៖ វ៉ៃកូ
