ភ្នំពេញ៖ កម្លាំងសន្តិសុខការពារគោលដៅធ្វើចត្តាឡីស័កដើម្បីការពារទប់ស្កាត់កុំឱ្យអ្នកធ្វើចត្តាឡីស័ករត់គេចវេស និងប្រជាពលរដ្ឋដែលបានដាក់ឱ្យធ្វើចត្តាឡីស័កជាប់ពាក់ព័ន្ធនឹងព្រឹត្តិការណ៍សហគមន៍២០ កុម្ភៈ នៅក្នុងរាជធានីភ្នំពេញ សរុបជាង១ពាន់នាក់ ទទួលបានអំណោយលើកទឹកចិត្តជាគ្រឿឧបភោគ បរិភោគ និងសម្ភារៈប្រើប្រាស់សម្រាប់ការពារជំងឺកូវីដ១៩ ពីសម្តេចតេជោនាយករដ្ឋមន្ត្រីហ៊ុន សែន និងពីស្នងការដ្ឋាននគរបាលរាជធានីភ្នំពេញ។
អំណោយទាំងនោះបានផ្តល់ជូនកម្លាំងនគរបាលរាជធានីភ្នំពេញ និងកម្លាំងសមត្ថកិច្ចពាក់ព័ន្ធសរុប៩៣០នាក់ ពីស្នងការដ្ឋាននគរបាលរាជធានីភ្នំពេញ តាមរយៈស្នងការរងដែលជាតំណាងឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ចែកជូន នៅគោលដៅទាំង១១ខណ្ឌ នៃរាជធានីភ្នំពេញ រួមានៈម៉ាស់ចំនួន២៧២ប្រអប់,ចែលលាងដៃ៩៣០ដប,ទឹកសុទ្ធ២៧២កេសនិងមីកំប៉ុងចំនួន២១៧២កំប៉ុង។
ដោយឡែកប្រជាពលរដ្ឋដែលបានដាក់ឱ្យធ្វើចត្តាឡីស័កចំនួន៨៥គ្រួសារ នៅភូមិជង្រុក និងភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ទទួលបានសាច់ជ្រូកដែលជាការឧបត្ថម្ភដ៏ថ្លៃថ្លាពីសម្តេចតេជោ នាយករដ្ឋមន្ត្រី ហ៊ុន សែន តាមរយៈអភិបាលខណ្ឌពោធិ៍សែនជ័យ លោក ហែម ដារិទ្ធិ ដោយក្នុង០១គ្រួសារទទួលបានសាច់ជ្រូក០១គីឡូក្រាម ដើម្បីដោះស្រាយទុក្ខលំបាកក្នុងជីវភាពប្រចាំថ្ងៃ ដែលប្រជាពលរដ្ឋចំនួន៨៥គ្រួសារនោះត្រូវបានដាក់ឱ្យធ្វើចត្តាឡីស័ករយៈពេលប្រមាណជិត១សប្តាហ៍មកហើយនោះ។ក្រោយពីជាប់ពាក់ព័ន្ធនឹងព្រឹត្តិការណ៍សហគមន៍២០ កុម្ភៈ។
សូមបញ្ជាក់ថា នគរបាលរាជធានីភ្នំពេញត្រូវបានប្រើប្រាស់កម្លាំងសរុបជាង៦០០នាក់ ការពារគោលដៅជាង៧០កន្លែង ធ្វើចត្តាឡីស័ក ក្នុងរាជធានីភ្នំពេញដឹកនាំបញ្ជាផ្ទាល់ដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដើម្បីពង្រឹងសន្តិសុខ រក្សាសណ្តាប់ធ្នាប់ ដែលជាការអនុវត្តលើវិធានការបង្ការទប់ស្កាត់ជំងឺឆ្លងកូវីដ១៩តាមបទបញ្ជារបស់ប្រមុខរាជរដ្ឋាភិបាលកម្ពុជា ដែលបានដាក់ចេញនូវវិធានការឱ្យមានការពង្រឹងសន្តិសុខឱ្យបានគត់មុតដើម្បីទប់ស្កាត់អ្នកធ្វើចត្តាឡីស័ក ដែលចង់គេចវេសមិនចង់អនុវត្តតាមវិធានក្រសួងសុខាភិបាលកម្ពុជាដែលជាបញ្ហាប្រឈមបង្កការឆ្លងរាលដាលជំងឺកូវីដ១៩៕ រក្សាសិទ្ធិដោយៈ ចេស្តារ
