ភ្នំពេញ ៖ ក្រោយពីសមត្ថកិច្ចបានស្រាវជ្រាវ និងរកឃើញផ្ទះជួលរបស់មេខ្លោងឧក្រិដ្ឋជនចាប់ជំរិតឈ្មោះ អ៊ឹម សុវណ្ណរិទ្ធ មានរក្សាទុកបន្ថែមទៀតនូវអាវុធ៖ កាំភ្លើងវែង ម៉ាក M16 ចំនួន ០១ដើម, គ្រាប់កាំភ្លើងចម្រុះចំនួន ១៦ គ្រាប់ និងស្រោមអាវុធខ្លី ម៉ាក K54 ចំនួន ០១ រួចមក ក៏បានធ្វើឲ្យមហាជនកាន់តែនាំគ្នាលើកឡើងជាចម្ងល់ថា «ជាកងកម្លាំងក្លែងក្លាយ ក្លែងក្លាយអីចូលបន្ទាយស្រួលៗម្ល៉េះ? ក្លែងក្លាយអី បង្ហោះរូបថតជាមួយមេៗតាញឹក? ក្លែងក្លាយ ចុះសក្តិនរណាជាអ្នកបំពាក់ឱ្យមនុស្សក្លែងក្លាយម្នាក់នេះ?»។
ជាមួយនឹងចម្ងល់ដែលមហាជនលើកឡើងនេះផងដែរ ក្នុងនោះ លោក ស្រី ចំរើន ក៏បានចេញមុខស្នើឯកឧត្តម ហ៊ីង ប៊ុនហៀង បើកការស៊ើបអង្កេតស្រាវជ្រាវរកអ្នកចេញប័ណ្ណក្លែងក្លាយឲ្យមេឧក្រិដ្ឋជន អ៊ឹម សុវណ្ណរិទ្ធ។
តាមរយៈទំព័រហ្វេសប៊ុករបស់ខ្លួន លោក ស្រី ចំរើន បានសរសេររៀបរាប់យ៉ាងចាក់ដោតថា៖ «ខ្ញុំបាទគោរពស្នើផ្ទាល់ជូន ឯកឧត្តម នាយឧត្តមសេនីយ៍ ហ៊ីង ប៊ុនហៀង ដើម្បីបើកការស៊ើបអង្កេតពិសេសបន្ទាន់ ករណីឧក្រិដកម្ម នៃផែនការជំរិតប្លន់ដោយប្រដាប់អាវុធ ។
ខ្ញុំបាទជឿជាក់ចំពោះថ្នាក់ដឹកនាំកំពូល ព្រោះរឿងនេះជារឿងបុគ្គលសុទ្ធសាធ មិនមែនអង្គភាព ឬអង្គការចាត់តាំងឡើយ។ ស្នងការ នៃបញ្ជាការដ្ឋានកងអង្គរក្សត្រូវទទួលស្គាល់សកម្មភាពគាត់ក្នុងអង្គភាព និងបញ្ជាក់ពីសមាសសភាពគាត់ឡើងវិញ ។ ហើយស្រាវជ្រាវរកអ្នកដែលចេញកាតក្លែងក្លាយ អោយមេឧក្រិដកម្មនោះ ដើម្បីកុំឲ្យមានលើកទី២ទៀត ក្នុងអង្គភាព។
តែសូមសំដែងការសោកស្តាយ ដែលស្នងការ នៃបញ្ជាការដ្ឋានកងអង្គរក្សបានទ្វេសប្រហែស ឲ្យមេឧក្រិដកម្មនោះ ប្រើប្រាស់កាតក្លែងក្លាយ និងចេញចូលបន្ទាយ ជាពិសេស ការពារភូមិគ្រឹះសម្តេចនាយក រដ្ឋមន្ត្រីបាន។ របាយការណ៍ ក៏ដូចជាការឆ្លើយតប មិនស្របតាមបច្ចេកទេសរដ្ឋបាល និងបទបញ្ជារផ្ទៃក្នុងនៃបញ្ជាការដ្ឋាននៃកងអង្គរក្ស រវាងជនល្មើស និងអង្គភាព ជូន ឯ.ឧ នាយឧត្តមសេនីយ៍ ហ៊ីង ប៊ុនហៀង និងថ្នាក់ដឹកនាំ នេះជាការទ្វេសប្រហែសដ៏ធំមួយ របស់ថ្នាក់ក្រោម ។
ហេតុអ្វីចាំបាច់ ស្រែកបញ្ជារបាញ់សម្លាប់ទាំងអស់ (យោងវីដេអូ) មិនទាន់ឃើញឧក្រិដជនបាញ់តដៃ ទាំងដែលផែនការរៀបជាច្រើនថ្ងៃហើយ បន្ទាប់ពីបានផ្ទៃក្នុងពីតៃកុងឡានថ្មី? ហេតុអ្វីផែនការចាប់ក្រុមឧក្រិដជននេះ ចាំបាច់ត្រូវបាញ់សម្លាប់? តើមេឧក្រិដជននោះជានរណា មានសិទ្ធិប្រើកាតក្លែងក្លាយ? ស្និទ្ធស្នាលជាមួយបុគ្គលណាខ្លះ នរណាខ្លះពាក់ព័ន្ធ ស្នើការសហការជាមួយម្ចាស់ផ្ទះ ក្នុងសំណុំរឿងនេះ។ ហេតុអ្វីមិនឃើញមុខមេឧក្រិដកម្មនោះ និងកាតសម្គាល់ជាប់ខ្លួន?
ជាចុងក្រោយ សូមស្នើបញ្ជាការដ្ឋាននៃកងអង្គរក្ស នឹងពិនិត្យចំពោះ សមាសសភាពមន្ត្រីកងកម្លាំងប្រដាប់អាវុធ ដែលនេះជារឿងធំបំផុត ថាតើកម្លាំងណាខ្លះប្រើប្រាស់កាតក្លែងក្លាយ ហើយចូលការពារជាប់ ប្រមុខថ្នាក់ដឹកនាំ ពោលគឺហានិភ័យខ្ពស់បំផុត សម្រាប់ថ្នាក់ដឹកនាំ។ ស.ច.រ»៕ រក្សាសិទ្ធិដោយ៖ លឹម ហុង
