ភ្នំពេញ៖ ការសម្រេចបានការនាំចេញផលិតផលកសិកម្មក្រៅពីអង្ករចំនួន១,៦លានតោនរបស់កម្ពុជាគឺបានកើនជាង ៥៥% នៅក្នុងរយៈពេល ២ខែ ឆ្នាំ២០២១នេះ។
បើតាមតួលេខរបស់អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ត្រឹមតែរយៈពេល២ដំបូងនៅឆ្នាំ២០២១នេះ កម្ពុជាសម្រេចបានការនាំចេញផលិតផលកសិកម្មក្រៅពីអង្ករមានដល់ទៅប្រមាណ១លាន៦សែនតោន កើនឡើងដល់ទៅជាង៥៥%ធៀបនឹងរយៈពេលដូចគ្នាកាលពីឆ្នាំ២០២០ ដោយការនាំចេញមានទៅកាន់ទីផ្សារគោលដៅចំនួន២៥ប្រទេស។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការកើនឡើងនៃការនាំចេញផលិតផលកសិកម្មនេះ អាចចាត់ទុកថា ជាបរិបទថ្មី នៃយុទ្ធសាស្ត្រការផ្លាស់ប្តូរមុខដំណាំរបស់ប្រទេសជិតខាង ព្រោះមុខដំណាំមួយចំនួន មិនអាចទ្រទ្រង់ជីវភាពរស់នៅរបស់កសិកររបស់ពួកគេបន្តទៀត ជាមួយនឹងដីដាំដំណាំក្នុងប្រទេសទាំងនោះ ក៏កាន់តែចង្អៀត។
ម្យ៉ាងវិញទៀត មុខដំណាំមួយចំនួន ដែលកម្ពុជានាំចេញកើនឡើងនេះ ដោយសារតែប្រទេសជិតខាងគេលែងសូវដាំ ដោយប្រទេសទាំងនោះ គេងាកទៅដាំដំណាំផ្សេងវិញ ដែលនេះជាឱកាសល្អសម្រាប់មុខដំណាំរបស់កម្ពុជា ងាយស្រួលជ្រៀតចូលដើម្បីផ្គត់ផ្គង់តាមតម្រូវការទីផ្សារ។
ទិន្នន័យដដែលនេះ បានឲ្យដឹងទៀតថា ក្នុងចំណោមផលិតផលកសិកម្ម ដែលបាននាំចេញច្រើនជាងគេ រួមានដំឡូងមីក្រៀម មានការនាំចេញជាង ៨០ម៉ឺនតោន ខណៈដំឡូងមីស្រស់នាំចេញជាង១៥ម៉ឺនតោន។ ស្រូវនាំចេញជាង ២៨ម៉ឺនតោន, ស្វាយចន្ទីនាំចេញ ប្រមាណ ៨ម៉ឺនតោន, គ្រាប់ពោតក្រហម ជិត៨ម៉ឺនតោន ផ្លែចេកស្រស់ជាង ៧ម៉ឺនតោន និងផ្លែស្វាយស្រស់នាំចេញមានជាង៤ម៉ឺនតោន។
ដោយឡែក ការនាំចេញអង្ករវិញ នៅរយៈពេល២ខែដំបូង នៃដើមឆ្នាំ២០២១នេះដែរ កម្ពុជាសម្រេចបានការនាំចេញ ក្នុងរង្វង់ទឹកប្រាក់ជាង ៦៤លានដុល្លារ និងក្នុងបរិមាណជាង ៧ម៉ឺន៦ពាន់តោន ធ្លាក់ចុះដល់ទៅជាង៤៤% បើប្រៀបធៀបនឹងរយះពេលដូចគ្នា នៃឆ្នាំ២០២០។ ការនាំចេញអង្ករនេះ ចិន នៅតែជាប្រទេស និងជាទីផ្សារធំជាងគេ ដែលមានចំណែកដល់ទៅប្រមាណជិត៥០% គិតជាបរិមាណគឺមានជាង ៣ម៉ឺន៧ពាន់តោន។ ទីផ្សារសហភាពអឺរ៉ុបមានចំណែកជិត ២៥% និងទីផ្សារអាស៊ានមានចំណែក៨% នៃការនាំចេញអង្ករសរុបរបស់កម្ពុជា៕ រក្សាសិទ្ធិដោយ៖CEN
