ភ្នំពេញ ៖ ក្នុងឆ្នាំ២០១៧ ការអនុវត្តចំណូលរបស់ក្រសួងសេដ្ឋកិច្ច និងហិរញ្ញវត្ថុ សម្រេចបានលទ្ធផលល្អ ដោយអង្គភាពក្រោមឱវាទក្រសួងប្រមូលបានប្រមាណ ១៩,៣ ទ្រីលានរៀល ស្មើនឹង១០៦,១ភាគរយនៃច្បាប់ ក្នុងនោះចំណូលសារពើពន្ធ (ចំណូលគយ និងរដ្ឋាករ និងចំណូលពន្ធដារ) ប្រមូលបានលើសច្បាប់៨,៤ភាគរយ ចំណូលមិនមែនសារពើពន្ធប្រមូលបានលើសច្បាប់៨,១% និងចំណូលមូលធនសម្រេចបានប្រមាណ៩៩,៧% នៃច្បាប់។
បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី១ខែមីនា ស្ដីពីលទ្ធផលនៃកិច្ចប្រជុំត្រួតពិនិត្យនិងវាយតម្លៃការអនុវត្ដថវិកា ប្រចាំឆ្នាំ២០១៧ របស់ក្រសួងសេដ្ឋកិច្ច និងហិរញ្ញវត្ថុ ដែលរៀបចំឡើង នៅថ្ងៃទី២៨ ខែ កុម្ភៈ ឆ្នាំ២០១៨ ក្រោមអធិបតីលោកបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។
លោក អូន ព័ន្ធមុនីរ័ត្ន បានបញ្ជាក់ថា កិច្ចប្រជុំ ត្រូវបានរៀបចំក្នុងគោលបំណងដើម្បីត្រួតពិនិត្យនិងវាយតម្លៃការអនុវត្តថវិកាប្រចាំឆ្នាំ២០១៧ របស់ក្រសួងសេដ្ឋកិច្ច។ ការអនុវត្តចំណាយតាមអង្គភាពថវិកាភាគច្រើន បានល្អជាងឆ្នាំ២០១៦ ដោយការអនុវត្តកាន់តែខិតជិតឥណទានច្បាប់ លើកលែងតែករណីដែលមានការបន្ថែមឥណទានថវិកា តាមការសម្រេចរបស់រាជរដ្ឋាភិបាល ជាពិសេសលើអន្តរាគមន៍របស់រដ្ឋ លើការជំរុញផលិតកម្ម និងទីផ្សារស្រូវអង្ករ។ ការអនុវត្តសកម្មភាពជំនាញ សម្រេចបានសមិទ្ធផលសំខាន់ៗជាច្រើន នៅគ្រប់កម្មវិធី ខិតទៅជិតគោលដៅកំណត់ក្នុងផែនការសកម្មភាព ដោយបំពេញបានពេញលេញ នូវបេសកកម្មរបស់ក្រសួងសេដ្ឋកិច្ចនិងហិរញ្ញវត្ថុ។ ទន្ទឹមនេះ អង្គប្រជុំបានពិនិត្យ និងពិភាក្សា ដោះស្រាយបញ្ហាប្រឈមនានាដែលអង្គភាពក្រោមឱវាទក្រសួងបានជួបប្រទះក្នុងការអនុវត្តកម្មវិធី និងបានដាក់ចេញនូវិធានការដោះស្រាយ ដែលមានលក្ខណៈជាប្រព័ន្ធ សំដៅជំរុញការអនុវត្តនៅឆ្នាំ បន្តបន្ទាប់ឱ្យកាន់តែមានប្រសិទ្ធភាពខ្ពស់។
អង្គប្រជុំ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អគ្គលេខាធិការដ្ឋាន ក្នុងនាមអង្គភាពទទួលបន្ទុកហិរញ្ញវត្ថុ ដែលជាសេនាធិការរបស់ក្រសួងលើការងារគ្រប់គ្រងថវិកា និងគ្រប់អង្គភាពថវិកានៃក្រសួងសេដ្ឋកិច្ចនិងហិរញ្ញវត្ថុ ដែលបានសហការផ្ដល់របាយការណ៍មក អង្គភាពទទួលបន្ទុកហិរញ្ញវត្ថុ ដើម្បីរៀបចំបូកសរុបចេញជារបាយការណ៍ ត្រួតពិនិត្យនិងវាយតម្លៃការ អនុវត្តថវិកាប្រចាំឆ្នាំ២០១៧នេះ ដែលជារបាយការណ៍មានលក្ខណៈស៊ីជម្រៅគ្រប់ជ្រុងជ្រោយ និងបំពេញបាននូវលក្ខខណ្ឌតម្រូវដែលមានក្នុងរបាយការណ៍ណែនាំ ស្ដីពីនីតិវិធីអនុវត្តថវិកាកម្មវិធី។
អង្គប្រជុំក៏បានវាយតម្លៃថា ក្រសួងសេដ្ឋកិច្ច និងហិរញ្ញវត្ថុ កំពុងស្ថាបនាភាពជាគំរូ ស្របតាមទិសដៅ កំណត់ដោយ លោកបណ្ឌិតសភាចារ្យទេសរដ្ឋមន្ត្រី និងបានលើកទឹកចិត្តឱ្យយកបទពិសោធន៍នៃការ អនុវត្តថវិកាកម្មវិធីទៅបន្តកែលម្អនីតិវិធីនានា ដោយយកយុទ្ធសាស្ត្រកែទម្រង់ប្រព័ន្ធថវិកាកម្ពុជា ឆ្នាំ២០១៨-២០២៥ ជាប្រទីប និងជាផែនទីគោចរ៕ ដោយ៖បញ្ញាស័ក្តិ
