នារីមានរូបឆោមដ៏ស្រស់សោភាម្នាក់ នៅក្នុងប្រទេសថៃ បានកំពុងបង្ហាញដល់យើងទាំងអស់គ្នាដឹងថា «ស្នេហាពិត» នៅតែមាននៅក្នុងលោកនេះ ហើយរឿងរ៉ាវរបស់នាង និងមិត្តប្រុសដ៏កំសត់ បានកំពុងធ្វើឲ្យរំជួលបេះដូងមនុស្សគ្រប់ៗគ្នា នៅលើអ៊ីនធើរណេត ។
នារីម្នាក់ឈ្មោះ Atittaya Chumkeaw បានកំពុងមើលថែយ៉ាងយកចិត្តទុកដាក់ ចំពោះមិត្តប្រុសជាទីស្រលាញ់របស់នាងឈ្មោះ Pooh Chokchai Kaew ដែលបានរងទទួលជំងឺមហារីកភ្នែកដំណាក់កាលចុងក្រោយ ដែលបង្កឲ្យដុំសាច់រីករាលដាលពាសពេញផ្ទៃមុខរបស់គាត់តែម្តង ។
ក្នុងអំឡុងខួបកំណើតស្នេហ៍៣ឆ្នាំរបស់ពួកគេ គូស្នេហ៍វ័យក្មេងនេះ បានផុសរូបនៅលើអនឡាញ ហើយវាក៏ទទួលបានការចាប់អារម្មណ៍យ៉ាងខ្លាំង ពីសំណាក់អ្នកលេងអ៊ីនធើរណេត ។
Attitaya បានដាក់ចំណងជើងនៃរូបថតខួប៣ឆ្នាំរបស់នាងថា «នេះជាខួប៣ឆ្នាំរបស់ពួកយើងទាំងពីរ ហើយក្តីស្រលាញ់នៅតែដដែល!» ។
គេបានយល់ឃើញថា ប្អូនប្រុស Kaew បានរងទទួលជំងឺម្យ៉ាងមានឈ្មោះថា retinoblastoma (ដុំនៅរ៉េទីន), ជាប្រភេទមហារីកដ៏កម្រមួយ ដែលចាប់ផ្តើមពីរេទីន ដែលជាផ្នែកមួយនៃភ្នែកទទួលខុសរ៉ាប់រងសម្រាប់រាវរកពន្លឺ ។
យោងតាមគ្រួសាររបស់គាត់, នោះលក្ខខណ្ឌរបស់ Kaew ពុំមានជម្រើសព្យាបាលផ្សេងទៀតនោះទេ ព្រោះវាជាជំងឺដ៏កម្រ ។
ទោះយ៉ាងណា បុរសអាយុ ២១ ឆ្នាំ ដ៏អភ័ព្វរូបនេះ នៅតែមាន «ក្តីសង្ឃឹមសម្រាប់ទៅលើអព្ភូតហេតុមួយ ហើយថា ដុំសាច់នោះនឹងរលាយបាត់» ។
យោងតាម Daily Mail នោះសមាជិកជា Moderator របស់គ្រុបហ្វេសប៊ុកម្នាក់បានសរសេរថា៖ «ខ្ញុំសូមកោតសរសើរយ៉ាងខ្លាំង ចំពោះប្អូនស្រីម្នាក់នេះ ដែលកំពុងស្ថិតនៅក្បែរដៃគូរបស់នាង ។ អ្នកគាំទ្រជាច្រើននិយាយថា សេចក្តីស្រលាញ់ដែលនាងកំពុងផ្តល់ឲ្យមិត្តប្រុសរបស់នាង គឺជារឿងដ៏ល្អបំផុត ដែលនាងអាចផ្តល់ឲ្យគាត់ ។ រឿងនេះអាចឲ្យមានអព្ភូតហេតុកើតឡើង» ។
ទន្ទឹមនោះនេះផងដែរ អ្នកលេងអ៊ីនធើរណែត ក៏បានផ្ញើសារជូនពរល្អៗដល់អ្នកទាំងពីរតាមរយៈខមិនខាងក្រោមយ៉ាងដូច្នេះថា៖
«សូមឆាប់ជាសះស្បើយឆាប់ៗណា៎!»
«សូមរីករាយ…!»
«កុំបាក់ទឹកចិត្ត ស៊ូៗ!!»
«សូមបន្តប្រយុទ្ធប្រឆាំងនូវអ្វីៗដែលកំពុងកើតឡើងចំពោះអ្នកទាំងពីរ»
«នេះគឺជាសេ្នហាដ៏ពិតប្រាកដមួយ»
ប្រែសម្រួលដោយ៖ ចន្ទី