បើតាមការចេញផ្សាយរបស់សារព័ត៌មាន CNA ដែលមានមូលដ្ឋាននៅសហរដ្ឋអាមេរិក នាព្រឹក ថ្ងៃអង្គារ ទី១៦ ខែមីនា ឆ្នាំ២០២១ អង្គការសុខភាពពិភពលោក WHO បានអំពាវនាវឱ្យបណ្ដាប្រទេសទាំងអស់កុំបញ្ឈប់ ឬផ្អាកយុទ្ធនាការចាក់វ៉ាក់សាំងប្រឆាំង COVID-19 បើទោះជាមានប្រទេសអឺរ៉ុបជាច្រើន និងប្រទេសមួយក្នុងតំបន់អាស៊ី បានសម្រេចចិត្តផ្អាកការប្រើប្រាស់វ៉ាក់សាំង របស់ក្រុមហ៊ុន AstraZeneca ដោយសារតែបារម្ភពីបញ្ហាកំណកឈាមក្នុងសរសៃឈាម ដែលផ្ទុយពីប្រទេសអូស្ត្រាលីនៅតែដំណើរការចាក់វ៉ាក់សាំង AstraZeneca នេះដដែល។
ប្រទេសថៃកាលពីថ្ងៃចន្ទម្សិលមិញបានប្រកាសថា នឹងចាប់ផ្ដើមចាក់វ៉ាក់សាំងរបស់ក្រុមហ៊ុន AstraZeneca ឡើងវិញនៅថ្ងៃអង្គារនេះ ប៉ុន្តែឥណ្ឌូណេស៊ីវិញបានអះអាងថា ខ្លួននឹងបន្តរង់ចាំមើលលទ្ធផលនៃការស៊ើបអង្កេតសិន បន្ទាប់ពីហូឡង់ និងអ៊ែរឡង់ ប្រកាសផ្អាកចាក់វ៉ាក់សាំងក្រុមហ៊ុនមួយនេះ កាលពីថ្ងៃអាទិត្យសប្ដាហ៍មុន។
អ្នកនាំពាក្យអង្គការ WHO លោក គ្រីស្ទាន លីនដ៍ម៉ៃយឺ (Christian Lindmeier) បានអំពាវនាវឱ្យបណ្ដាប្រទេសទាំងអស់ ថា សូមកុំបញ្ឈប់ ឬផ្អាកយុទ្ធនាការចាក់វ៉ាក់សាំង នៅក្នុងដំណាក់កាលដ៏សំខាន់នេះ ដោយបញ្ជាក់ថា «មកទល់នឹងថ្ងៃនេះ មិនមានភស្ដុតាងណាមួយបញ្ជាក់ថា ឧប្បដិហេតុដែលបានកើតឡើង គឺត្រូវបានបង្កឡើង ឬមានជាប់ពាក់ព័ន្ធនឹងវ៉ាក់សាំង AstraZeneca នោះទេ… ហើយវាគឺជាពេលវេលាដ៏សំខាន់ ក្នុងការបន្តយុទ្ធនាការចាក់វ៉ាក់សាំង ដើម្បីការពារជីវិតមនុស្ស និងកម្ចាត់ជំងឺដ៏សាហាវមួយនេះ។
ងាកទៅប្រទេសអូស្ត្រាលីវិញ, ថ្នាក់ដឹកនាំក្រសួងរតនាគារអូស្ត្រាលី លោក ចូស ហ្វ្រាយដិនប៊ឺក (Josh Frydenberg) នៅថ្ងៃអង្គារនេះ បានបញ្ជាក់ជាថ្មីថា ប្រទេសអូស្ត្រាលីគ្មានផែនការបញ្ឈប់ ការប្រើប្រាស់វ៉ាក់សាំងបង្ការជំងឺ COVID-19 ដែលអភិវឌ្ឍឡើងដោយក្រុមហ៊ុមផលិតឱសថអង់គ្លេស AstraZeneca ឡើយ, ដោយនិយតករឱសថអ៊ឺរ៉ុប និងអង្គការសុខភាពពិភពលោក (WHO) បានបញ្ជាក់ហើយថា វ៉ាក់សាំងបង្ការជំងឺ COVID-19 ដែលអភិវឌ្ឍឡើងដោយក្រុមហ៊ុនផលិតឱសថអង់គ្លេស AstraZeneca គឺមានប្រសិទ្ធភាព និងមានសុវត្ថិភាពក្នុងការប្រើប្រាស់ដូច្នេះយើងនឹងបន្តអនុវត្តការចាក់វ៉ាក់សាំងនេះ៕ រក្សាសិទ្ធិដោយ ពិសិដ្ឋ CEN
