ភ្នំពេញ ៖ អាជ្ញាធរខណ្ឌឫស្សីកែវ បានរកឃើញអ្នកមានវិជ្ជមានមេរោគកូវីដ១៩ ចំនួន០១នាក់ អាយុ ៣១ ឆ្នាំ ដែលមានទីតាំងនៅបុរីវិមានភ្នំពេញ។ ចំណែកក្រុមគ្រូពេទ្យមន្ទីរពេទ្យបង្អែកពោធិ៍ចិនតុង ចុះមកយកជនជាតិចិនវិជ្ជមានកូវីដ១៩ ចំនួន២នាក់
នៅចំណុចក្រុមហ៊ុន កាត់ដេរសម្លៀកបំពាក់ អ៊ីហាង។
យោងតាមផេកផ្លូវការអភិបាលខណ្ឌឬស្សីកែវ លោកជា ពិសី បានឲ្យដឹងថា អ្នកមានវិជ្ជមាននឹងមេរោគកូវីដ១៩ នៅថ្ងៃទី១៦ ខែមីនា ឆ្នាំ២០២១ វេលាម៉ោង១៨ និង០០នាទី ក្នុងមូលដ្ឋានខណ្ឌឫស្សីកែវ បានរកឃើញអ្នកមានវិជ្ជមាននឹងមេរោគកូវីដ១៩ ចំនួន០១នាក់ ឈ្មោះ ប៊ុត គីមឡី ភេទស្រី អាយុ ៣១ ឆ្នាំ ដែលមានទីតាំងនៅបុរីវិមានភ្នំពេញ ផ្ទះលេខ៣៦V ផ្លូវ៣៨០ ក្រុមទី៤ ភូមិ៤ សង្កាត់ច្រាំងចំរេះទី១ ខណ្ឌប្ញស្សីកែវ រាជធានីភ្នំពេញ អ្នកជំងឺនេះធ្លាប់ទៅហាង Metro Azura ខណ្ឌទួលគោក កាលពីថ្ងៃទី៨ ខែមីនា ឆ្នាំ២០២១កន្លងមក ក្នុងនោះមានអ្នកពាក់ព័ន្ធចំនួន ០៤ នាក់ (ស្រី០៣នាក់)។ បច្ចុប្បន្នអ្នកជំងឺម្នាក់ខាងលើនេះត្រូវបានបញ្ជូនទៅព្យាបាល នៅអតីតសណ្ឋាគារអ៊ីនធើខនទីណង់តាល់ (The Great Duke)។
រីឯអ្នកដែលពាក់ព័ន្ធចំនួន ០៤ នាក់ខាងលើ កំពុងស្នាក់នៅក្នុងផ្ទះ ត្រូវបានអោយធ្វើចត្តាឡីស័កនៅក្នុងទីតាំងនេះ និងត្រៀមយកសំណាកនៅថ្ងៃស្អែក ជាចុងក្រោយ អាជ្ញាធរ បានសម្រេចបិទទីតាំងខាងលើនេះជាបណ្ដោះអាសន្ន។
ចំណែកក្រុមគ្រូពេទ្យមន្ទីរពេទ្យបង្អែកពោធិ៍ចិនតុង ចុះមកយកអ្នកវិជ្ជមានកូវីដ១៩ នៅវេលាម៉ោង១៨និង០០នាទី ថ្ងៃទី១៦ ខែមីនា ឆ្នាំ២០២១ នៅចំណុចក្រុមហ៊ុន កាត់ដេរសម្លៀកបំពាក់ អ៊ីហាង (ខេមបូឌា) អូអិលធីឌី ផ្លូវបេតុង ក្រុមទី២ ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
ក្រុមគ្រូពេទ្យបានមកយក អ្នកវិជ្ជមានកូវីដ១៩ ចំនួន២នាក់ (ជនជាតិចិន) គឺ១-ភេទប្រុស អាយុ៣៦ឆ្នាំ (ជនជាតិចិន )មុខរបរប្រធានក្រុម ហ៊ុន ស្នាក់នៅកន្លែងកើតហេតុ។ ២-ភេទស្រី អាយុ៣៥ឆ្នាំ (ជនជាតិចិន ) មុខរបរប្រធានគ្រប់គ្រង ស្នាក់នៅក្នុងក្រុមហ៊ុនផ្ទាល់ ។
បានទៅយកសំណាកដោយខ្លួនឯងនៅមន្ទីរពេទ្យ មិត្តភាពខ្មែរ សូវៀត កាលពីថ្ងៃទី១៣ ខែមីនា ២០២១ ។ មានកម្មករនិយោជិក សរុបចំនួន៥០៣នាក់បានចេញពីក្នុងក្រុមហ៊ុនទៅផ្ទះស្នាក់រៀងខ្លួន ។ បច្ចុប្បន្នមានបុគ្គលិក ស្នាក់នៅក្នុងក្រុមហ៊ុនចំនួន ១០នាក់/ស្រីចំនួន០៦នាក់/ជនជាតិចិនចំនួន០៥នាក់/ជនជាតិខ្មែរចំនួន០៥នាក់។ ត្រូវបានអប់រំណែនាំឲ្យធ្វើចត្តាឡីស័កនៅក្នុងក្រុមហ៊ុន។
បច្ចុប្បន្នអ្នកជំងឺខាងលើត្រូវបានបញ្ជូនទៅសម្រាកព្យាបាលនៅ(The Great Duke)។ ចំណែកទីតាំងកើតហេតុត្រូវបានហ៊ុមព័ទ្ធជាបណ្ដោះ អាសន្ន។ សូមបងប្អូនយកចិត្តទុកដាក់ថែរក្សា ការពារសុខភាពខ្លួនឯង ដោយប្រុងប្រយ័ត្នខ្ពស់បំផុត ដើម្បីជៀសឲ្យឆ្ងាយពីជំងឺរាតត្បាតកូវីដ១៩ ដ៏កាចសាហាវនេះ ជាពិសេសស្តាប់ការណែនាំរបស់ក្រសួងសុខាភិបាល ជាចាំបាច់បំផុត ។
សូមសំណាងល្អ ទទួលបានសុខភាពល្អទាំងអស់គ្នា បងប្អូនខណ្ឌមានជ័យអើយ ៕ រក្សាសិទ្ធិដោយ៖មីដានិងសារឿន
