ភ្នំពេញ ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានណែនាំឲ្យ ក្រុមការងារវ៉ាក់សាំងប្រយុទ្ធប្រឆាំងជំងឺកូវីដ១៩ របស់ក្រសួងការពារជាតិ គួរតែមានការប្រុងប្រយ័ត្ន ជាពិសេសក្រុមសំភាសន៍ជាមួយអ្នកដែលទៅចាក់វ៉ាក់សាំងប្រឆាំងជំងឺកូវីដ១៩ គឺត្រូវតែប្រុងប្រយ័ត្ន ទាំងការសំភាសន៍ ទាំងដំណើរការចាក់វ៉ាក់សាំង និងការពារខ្លួនឲ្យបានម៉ត់ចត់។
សម្តេចពិជ័យសេនាបញ្ជាក់ថា ជាពិសេសគឺក្រុមគ្រូពេទ្យតែម្តង ត្រូវការពារខ្លួន ពីព្រោះអ្នកដែលមកចាក់វ៉ាក់សាំងម្ជុលទី១ (លើកទី១) និងអ្នកចាក់ម្ជុលទី២ ក៏វានៅតែមានឆ្លងជំងឺកូវីដ១៩ ដែរ។ ដូច្នេះត្រូវតែប្រុងប្រយ័ត្នមិនអាចធ្វេសប្រហែសបានទេ គឺចាប់ពីដំណើរការសំភាសន៍ រហូតដល់ដំណើរការចាក់វ៉ាក់សាំង គឺក្រុមគ្រូពេទ្យត្រូវតែប្រុងប្រយ័ត្ន កុំធ្វេសប្រហែសឲ្យសោះ។
ប្រមុខការពារជាតិបានសង្កត់ធ្ងន់ថា “ក្រុមផ្នែកផ្សេងៗទៀត ដែលយើងបានរៀបចំទុកត្រូវតែមានការប្រុងប្រយ័ត្ន ឥឡូវហ្នឹងគឺយើងឃើញច្បាស់ហើយ ដោយសារវារាលដាលរបៀបហ្នឹង វាមិនរើសមុខទេ អ្នកដែលទទួលវ៉ាក់សាំងហើយ ក៏វានៅតែចូលមករាលត្បាតបានដែរ ដូច្នេះគឺយើងត្រូវតែប្រុងប្រយ័ត្នឲ្យបានល្អផង កុំឲ្យប្រហែសឲ្យសោះ ជាពិសេសគ្រប់ភារកិច្ចបំពេញការងារដាច់ខាតត្រូវតែពាក់ម៉ាស់ឲ្យបាន ១០០ភាគរយ កុំឲ្យមានការធ្វេសប្រហែស ការធ្វើអនាម័យ គន្លាត…”៕ រក្សាសិទ្ធិដោយៈ ចេស្តារ
