រថយន្តហាយឡែនឌ័រមួយគ្រឿងបើកទៅបុករថយន្តកូរ៉ូឡា កំពុកបើកឆ្លងផ្លូវបណ្តាលឲ្យរងការខូចខាតយ៉ាងដំណំ

ភ្នំពេញ÷រថយន្តហាយឡែនឌ័រមួយគ្រឿងបើកបក្នុងល្បឿនលឿនមិនប្រយត្ន័បានជ្រុលចង្កូតទៅបុករថយន្តកូរ៉ូឡាកំពុងតែបើកឆ្លងផ្លូវចំពីចំហៀងខាងមុខពេញទំហឹងបណ្តាលឲ្យរថយន្តរងការខូចខាតទាំងសងខាង ។ សំណាងល្អមិនគ្រោះថ្នាក់ដល់មនុស្ស។

ហេតុការណ៍គ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង០០និង១៥ នាទីយប់រំលងអធ្រាត្រ ឈានចូលថ្ងៃទី៣១ ខែមនា ឆ្នាំ ២០២១ ចំណុចជាប់សាលារៀនទួនហ្វារ ស្តិតនៅតាមបណ្តោយផ្លូវ១៧៣ កែងនឹងផ្លូវ៣១០ ក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគាត់បានឃើញរថយន្តម៉ាកកូរ៉ូឡា ពណ៌ទឹកប្រាក់ពាក់ផ្លាកលេខ ភ្នំពេញ 2-K 8399 បើកបរដោយស្រ្តី២នាក់ធ្វើដំណើរតាមបណ្តោយផ្លូវ១៧៣ ទិសដៅពីលិចមកកើតក្នុងល្បឿនមធ្យម ខណៈមកដល់ចំណុចកើតហេតុផ្លូវបំបែកជា៤ ស្រាប់តែគាត់ឃើញមានរថយន្តម៉ាកហាយឡែនឌ័រពណ៌ស្ករពាក់ផ្លាកលេខ ភ្នំពេញ2-AR 5876 បើកបរដោយបុរសម្នាក់ធ្វើដំណើរតាមបណ្តោយផ្លូវ៣១០ក្នុងទិសដៅពីត្បូងមកជើងក្នុងល្បឿនយ៉ាងលឿនមកបុកចំពីចំហៀងពីមុខខាងស្តាំរថយន្តកូរ៉ូឡាពេញទំហឹងបណ្តាលឲ្យរថយន្តរងការខូចខាតទាំងសងខាង។

ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងជំនាញចរាចរណ៍ខណ្ឌបឹងកេងកង ចុះមកដល់ដោយភាគីទាំងពីរចរចាអត់ត្រូវក៏ទំនាក់ទំនងទៅខាងជំនាញចរាចរណ៍ក្រុងឲ្យចុះមកវាស់វែងនិងធ្វើកំណត់ហេតុយករថយន្ដទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការរាជធានីភ្នំពេញរង់ចាំដោះស្រាយនៅពេលក្រោយ៕

រក្សាសិទ្ធិដោយ៖ សា មេត