តាមរយៈទំព័រហ្វេសប៊ុក «អនុគណៈកម្មការស្រាវជ្រាវជំងឺកូវីដ១៩» នៅមុននេះបន្តិច (ថ្ងៃទី០៧ ខែមេសា ឆ្នាំ២០២១) បញ្ជាក់ឲ្យដឹងថា អ្នកលក់នៅផ្សារអូរឬស្សី វិជ្ជមានកូវីដ-១៩ បានកើនឡើងដល់ ៦០នាក់ ហើយ បន្ទាប់ពីរកឃើញ ២៤ នាក់ បន្ថែមទៀតនៅថ្ងៃនេះ។
ហេតុនេះ ក៏សូមសូមអំពាវនាវដល់ប្រជាពលរដ្ឋ អ្នកលក់នៅផ្សារអូរឬស្សី ឬ អ្នកចេញចូលជាប្រចាំ ឬ ញឹកញាប់ទាំងអស់ ប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមប្រញាប់ទៅធ្វេីតេស្តរកមេរោគកូវីដ១៩ ឲ្យបានរួសរាន់ កុំឲ្យការឆ្លងរីករាលដាក់តែធ្ងន់។ សម្រាប់ទីតាំងដែលលោកអ្នកអាចទៅធ្វើតេស្ត គឺនៅ វិទ្យាល័យបាក់ទូក, វិទ្យាល័យបឹងត្របែក, មណ្ឌលសុខភាពចាក់អង្រែក្រោម, មន្ទីរ ពេទ្យខ្មែរ-សូវៀត, សាលាបឋមសិក្សា សុភមង្គល (ក្រោយផ្សារស៊ិន ជូរី បណ្តោះអាសន្ន) និងមន្ទីរពេទ្យបង្អែកនៅតាមបណ្តាខេត្តនានា។
អនុគណៈកម្មការខាងលើ ក៏បានណែនាំផងដែរ ទៅដល់អ្នកដែលគ្មានរោគសញ្ញា គឺសូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕
រក្សាសិទ្ធិដោយ៖ លឹម ហុង