ភ្នំពេញ ៖ ដូចដែលប្រិយមិត្តជាច្រើនបានជ្រាបរួចហើយថា កាលពីពេលកន្លងទៅនេះ លោក K01 បានចេញបានចេញមុខឡាយវីដេអូ និយាយក្តែងៗសុខចិត្តជាប់គុកក៏ជាប់ចុះ ដោយស្នើដល់រាជរដ្ឋាភិបាល និងក៏ដូចក្រសួងពាក់ព័ន្ធ ពិចារណាសូមឲ្យធនាគារផ្អាកការទារលុយប្រជាពលរដ្ឋដែលជាកូនបំណុលរយៈពេល ៣ខែ និងក៏ដូចការមិនយកថ្លៃទឹក ថ្លៃភ្លើង ក្នុងអំឡុងពេលកូវីដ១៩ នេះ។
តែយ៉ាងណា ក្រោយលោក K01 បានលើកឡើងបែបនេះ ប្រមុខរាជរដ្ឋាភិបាល ក៏បានធ្វើការព្រមានធ្ងន់ៗទៅលើបុគ្គលរូបនេះថា «ប្រយ័ត្នគុក» ព្រោះនេះគឺជាចេតនានិយាយលក្ខណៈញុះញង់តែម្តង។ ហើយសម្តេចតេជោ នាយករដ្ឋមន្ត្រី ក៏បានឲ្យក្រសួងព័ត៌មានពិនិត្យមើលបុគ្គល K01 ផងដែរ។
ក្រោយពីសម្តេចតេជោ បានធ្វើការព្រមានធ្ងន់ៗ មិនបានប៉ុន្មានម៉ោងផង ក្រសួងព័ត៌មានក៏បានចាប់ផ្តើមសម្រេចលុបអាជ្ញាប័ណ្ណ លោក ឃឿន សុឡា (K01) ដែលជាចាងហ្វាងគេហទំព័រអនឡាញ “www.k01 tv online.com” ក្រោយពិនិត្យឃើញថា ម្ចាស់អាជ្ញាប័ណ្ណរូបនេះ ពិតជាបានផ្សព្វផ្សាយព័ត៌មានញុះញង់ មានចេតនា ទុច្ចរិតបង្កចលាចលក្នុងសង្គម ដែលបំពានលើវិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្រសួងព័ត៌មាន។
ប៉ុន្តែ អ្វីដែលយើងគ្រប់គ្នា មិននឹកស្មានដល់ និងក៏ដូចហួសចិត្តជាខ្លាំងនោះ គឺក្រោយក្រសួងបានលុបអាជ្ញាប័ណ្ណ ស្រាប់តែលោក K01 ដែលជាបុគ្គលទើបឡើងកូដមានបាន ដោយសារល្បីឈ្មោះព្រោះមានអាជ្ញាប័ណ្ណ អាចធ្វើព័ត៌មាន និងចុងក្រោយកាក់កបនឹងជំនួញដីធ្លី បានចេញមកនិយាយយ៉ាងសែនឈ្លើយ ខណៈកំពុងជិះឡាន ហើយមហាជនចូលសួរបែបចំអកឲ្យថា តើមានអារម្មណ៍យ៉ាងណា នៅពេលក្រសួងលុបអាជ្ញាប័ណ្ណចោលបែបនេះ។
ក្នុងនោះ បុគ្គលដ៏មានអំនួតរូបនេះ បាននិយាយបកឌឺឲ្យក្រសួងថា អាជ្ញាប័ណ្ណ១សន្លឹកនេះ គួរតែត្រូវបានដកចោលយូរហើយ មិនគួរទុកឲ្យចង្អៀតក្រសួងទេ ពីព្រោះខ្លួនមិនបាន Live ព័ត៌មានទេ មួយរយៈធំនេះ និងចុងក្រោយ បាននិយាយទាំងភ្លេចកំណើតដើមបែបនេះថា «មិនបាច់សួរថា ខ្ញុំមានអារម្មណ៍យ៉ាងណាទេ ព្រោះខ្ញុំក៏មិនរស់ដោយសារអាជ្ញាប័ណ្ណ១សន្លឹកនេះដែរ»។
គួរបញ្ជាក់ថា លោក K01 មិនមែនទើបមានកំហុសលើកទី១នេះទេ គឺបុគ្គលរូបនេះ ធ្លាប់បានសាងកំហុសច្រើនលើកច្រើនសាររួចមកហើយ ប៉ុន្តែ បានចេញមុខសំទោសក៏រួចខ្លួន និងអាចមានឱកាសល្បីឈ្មោះ សាងភាពមានបាន ដោយសារមានអាជ្ញាប័ណ្ឌធ្វើអាជីវកម្មសារព័ត៌មាន បន្តមកទល់ពេលនេះ។ តែយ៉ាងណា តាមរយៈសម្តីដ៏៏មហាឌឺនេះផងដែរ មហាជនបានស្នើឲ្យក្រសួងចាត់វិធានការផ្លូវច្បាប់ ទៅលើបុគ្គលរូបនេះម្តងទៅ កុំឲ្យឈ្លើយបែបនេះទៀត៕ រក្សាសិទ្ធិដោយ៖ លឹម ហុង
