ភ្នំពេញ ៖ បុរសជាជាង ម៉ាស៊ីនត្រជាក់ បានឆក់ខ្សែភ្លើង ពេលកំពុងតម្លើងម៉ាស៊ីនត្រជាក់នៅហាងផឹកស៊ីផ្សារកុងតឺន័រ ហើយត្រូវបានស្លាប់ពេលដឹកទៅមន្ទីរពេទ្យ ។ ហេតុការណ៍នេះបានកើតឡើង នៅវេលាម៉ោង៩ និង២០នាទី នៅផ្លូវរដ្ឋសភា ភូមិ១៤ ក្រុម៧៨ សង្កាត់ទន្លេបាសាក់ ខណ្ឌចំការមន ។
ជនរងគ្រោះឈ្មោះ ប៊ន ផុក ភេទប្រុស អាយុ ២៥ឆ្នាំ មុខរបរជាងជួសជុលម៉ាស៊ីនត្រជាក់ ស្នាក់នៅផ្ទះលេខ៩Eo ផ្លូវ១២២ ភូមិ៧ សង្កាត់ផ្សារដេប៉ូ៣ ខណ្ឌទួលគោក និងមានស្រុកកំណើត នៅភូមិកែង ឃុំជ្រោយប្រទាយ ស្រុកព្រែកប្រសព្វ ខេត្តក្រចេះ ។
អ្នកនៅកន្លែងកើតហេតុបានឲ្យដឹងថា ៖បុរសដែលបានស្លាប់ ឡើងតម្លើងម៉ាស៊ីនថ្មីនៅទីតាំងកើតហេតុខាងលើ ជនរងគ្រោះតម្លើងជិតហើយទៅហើយ បែរជាជួបរឿងអកុសល បណ្តាលឲ្យឆក់ធ្លាក់ ដាច់ផ្ងាធ្លាក់មកក្រោម ហើយភ្លាមៗនោះ ត្រូវក្រុមជាងរួមការងារដឹកយកទៅសង្គ្រោះ នៅមន្ទីរពេទ្យកាល់ម៉ែត តែជាអកុសល ជនរងគ្រោះបានស្លាប់ នៅពេលទៅដល់មន្ទីរពេទ្យ ។
ក្រោយ កើតហេតុ ម្ចាស់ហាងបានរាយការណ៍ជូនសមត្ថកិច្ច ដើម្បីចុះមកពិនិត្យទីតាំងកើតហេតុផងដែរ ។ ប៉ុន្តែមហាជនឆ្ងល់ថា តើមានហេតុផលអ្វី បានជានគរបាលប៉ុស្តិ៍ទន្លេបាសាក់ មានការបិទបាំង មិនអោយមានការផ្សព្វផ្សាយព័ត៌មាននេះ ?
ពាក់ព័ន្ឋនឹងករណីឆក់ស្លាប់នេះដែរ អាជ្ញាធរខណ្ឌចំការមន បានចុះពិនិត្យ និងសួរនាំរកលិខិតស្នាម ក្នុងបើកអាជីវកម្មនេះផងដែរ ។
គួរបញ្ជាក់ថា ហាងផឹកស៊ីកុងតែន័រនេះ សុទ្ឋតែដែកទាំងអស់ ដូច្នេះការរាយខ្សែភ្លើងលំអរទៅតាំង សូមធ្វើដោយប្រុងប្រយ័ត្នខ្ពស់បំផុត បើមិនដូច្នេះអាចនឹងមានការឆ្លងចរន្ត បណ្តាលអោយមានគ្រោះថ្នាក់ដល់ភ្ញៀវជាមិនខាន ។
បច្ចុប្បន្ន សពសមត្ថកិច្ចកំពុងស្រាវជ្រាវ រកក្រុមគ្រួសារ ឲ្យមកយកទៅធ្វើបុណ្យតាមប្រពៃណី៕ ដោយ៖បញ្ញាស័ក្តិ
