ភ្នំពេញ ៖ ផ្សារនេះជាគំរូមួយសម្រាប់យកទៅអនុវត្តនូវទីតាំងផ្សេងៗទៀត នៅក្នុងអំឡុងនៃការបិទខ្ទប់។ ផ្សាររបៀបនេះ ត្រូវបាន រដ្ឋបាលខណ្ឌពោធិ៍សែនជ័យ បង្កេីតឡើងសម្រាប់ឲ្យអាជីវករធ្វើការលក់ដូរ ដែលមានការគូសគំនូសរក្សាគម្លាត ដេីម្បីចូលរួមទប់ស្កាត់ជំងឺកូវីដ១៩។
ទីតាំងផ្សារលក់ដូររក្សាគម្លាតនេះ ស្ថិតនៅលេីដងមហាវិថីចោមចៅ (ផ្លូវវេងស្រេង) ដោយមានចំនួនពីរទីតាំង គឺទីតាំងទី១ នៅមុខផ្សារការណាឌីយ៉ា ភូមិត្រពាំងថ្លឹង២ សង្កាត់ចោមចៅទី១ ខខណ្ឌពោធិ៍សែនជ័យ និងទីតាំងទី២ នៅមុខក្រុមហ៊ុន ម៉ូតូហុងដា ក្នុងសង្កាត់ចោមចៅទី១ ជាប់ព្រំប្រទល់សង្កាត់ចោមចៅទី២ ខណ្ឌពោធិ៍សែនជ័យ ។
អាជ្ញាធរមូលដ្ឋាន បានឱ្យដឹងថា ក្នុងខណ្ឌពោធិ៍សែនជ័យនេះ គឺតំបន់ផ្សារត្រូវបានបិទចំនួន ១៨ទីតាំង ហើយរដ្ឋបាលខណ្ឌពោធិ៍សែនជ័យ បានសម្រេចបង្កេីតផ្សាររក្សារគម្លាតនេះឱ្យបងប្អូនអាជីវករលក់បន្លែ ត្រី សាច់ និងអនុញ្ញាតឲ្យដាក់លក់នៅតាមបណ្តោយដងផ្លូវខាងលេីនេះ ដោយមានគូសគំនូស និងរក្សាគម្លាតបានយ៉ាងត្រឹមត្រូវ៕
រក្សាសិទ្ធិដោយ ៖ CEN
