ភ្នំពេញ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងក្នុងបណ្តាញសង្គមហ្វេសប៊ុក កាលពីពេលកន្លងទៅថ្មីៗនេះថា ដើម្បីដោះស្រាយនូវបញ្ហាប្រឈមទីផ្សារលក់កសិ ផលរបស់កម្ពុជា ចំពោះមុខនេះ ការនាំចេញកសិផលចេញត្រង់ពីកម្ពុជាទៅកាន់ប្រទេសជិតខាង គឺជាការចាំបាច់បំផុតដើម្បីធានាបានប្រាក់ចំណូល និងរក្សាបាននូវស្ថិរភាពជីវភាពរបស់កសិករនៅតាមជនបទ។
បើយោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ ប្រទេសកម្ពុជា បានធ្វើនាំចេញស្រូវចំនួន ប្រមាណ ១,៥២លានតោន ទៅកាន់ប្រទេសជិតខាង ពោលគឺប្រទេសវៀតណាមតែម្តង ដែលនៅក្នុងរយៈពេល ៤ខែឆ្នាំ ២០២១នេះ បាននាំចេញស្រូវកើនឡើងដល់ ៧៣,១៥ភាគរយ បើប្រៀបនឹងរយៈពេលដូចគ្នាកាលពីឆ្នាំ ២០២០កន្លងទៅនេះ។ តាមការប៉ាន់ស្មាន គឺការនាំចេញស្រូវមានតម្លៃប្រមាណ ២២១លានដុល្លារ។
កាលពីឆ្នាំ២០២០កន្លងទៅនេះ កម្ពុជាបាននាំចេញស្រូវមានប្រមាណ ២,៨៩លានតោន ដែលមានតម្លៃ ៧២៣លានដុល្លារ ហើយការនាំចេញស្រូវត្រូវបានធ្វើឡើងសម្រាប់ប្រទេសជិតខាង ជាពិសេស ប្រទេសវៀតណាម។ ចំណែកការនាំចេញអង្ករសរុបប្រមាណ ៦៩ម៉ឺនតោន ដែលមានតម្លៃជិត ៥៣៩លានដុល្លារអាមេរិក។ តួលេខនៃការនាំចេញនេះ កើនឡើង ១១,៤០ភាគរយ បើធៀបនឹងឆ្នាំ២០១៩។
របាយការណ៍ដដែលនេះ បានឲ្យដឹងទៀតថា ក្នុងរយៈពេល ៤ ខែឆ្នាំ ២០២១នេះ ការនាំចេញអង្កររបស់កម្ពុជាទៅទីផ្សារអន្តរជាតិ មានបរិមាណជាង ១៩ម៉ឺនតោន ធ្លាក់ចុះជាង ៣៥ភាគរយ បើធៀបនឹងរយៈពេលដូចគ្នាឆ្នាំ២០២០។ តួលេខនៃការនាំចេញអង្ករនេះ មានតម្លៃប៉ាន់ស្មានប្រមាណ ១៦១,៦៩លានដុល្លារ។
ឯកឧត្តម វេង សាខុន បានប្រសាសន៍ថា ដោយសារឥណទាន ដែលបានផ្តល់ជូនដល់ការកែឆ្នៃផលិត ផលក្នុងស្រុក នៅមានកម្រិត ធ្វើឲ្យសមត្ថភាពក្នុងការប្រមូលទិញស្តុក និងការកែឆ្នៃរបស់កម្ពុជា ពុំទាន់មានលទ្ធភាព និងសមត្ថភាពគ្រប់គ្រាន់ក្នុងការប្រមូលទិញកសិផលពីកសិករផលិតបាន ដែលមានសន្ទុះកើនឡើងក្នុងរយៈពេលប៉ុន្មានឆ្នាំចុងក្រោយនោះឡើយ។ ឯកឧត្តម វេង សាខុន បានអះអាងថា បើទោះបីជាយ៉ាងនេះក្តី ដើម្បីដោះស្រាយកំណើនផលិតផលកសិកម្មជារៀងរាល់ឆ្នាំ និងការចាល់ នៅលើទីផ្សារ រាជរដ្ឋា ភិបាលកម្ពុជា បាននិងកំពុងយកចិត្តទុកដាក់ និងខិតខំបញ្ចេញកញ្ចប់ ថវិកាជាតិជាបន្តបន្ទាប់ ផ្តល់ទៅដល់ធនាគារអភិវឌ្ឍន៍ជនបទ និងកសិកម្ម និងធនាគារសហគ្រាសធន់តូច និងមធ្យមកម្ពុជា សម្រាប់ផ្តល់ឥណទានសម្បទាន ជូនដល់កសិករ រោងម៉ាស៊ីនស្រូវ សហគមន៍កសិកម្ម វារីវប្បករ និងសហគ្រាសធន់តូច និងមធ្យម ដើម្បីប្រមូលទិញកសិផលក្នុងស្រុក សម្រាប់ស្តុក និងការវិនិយោគលើការសាងសង់រោងចក្រកែច្នៃកសិផល ក្នុងគោលបំណងលើកកម្ពស់ប្រសិទ្ធភាពតម្លៃបន្ថែម បង្កើតឱកាសការងារ ដោយប្រើប្រាស់វត្ថុធាតុដើមក្នុងចង្វាក់ផលិតកម្ម និងកម្លាំងពលកម្មក្នុងស្រុកឲ្យអស់លទ្ធភាព។
យោងតាមសហព័ន្ធស្រូវអង្ករកម្ពុជា ការធ្លាក់ចុះបរិមាណនៃការនាំចេញអង្ករនៅដើមឆ្នាំនេះ គឺបណ្តាលមកពីឧប សគ្គនៃការបញ្ជូនទំនិញទៅកាន់អ្នកបញ្ជាទិញនៅក្រៅប្រទេស ជាពិសេសទៅកាន់បណ្តាប្រទេសគោលដៅនៅក្នុងសហគមន៍អឺរ៉ុប ដោយសារតែកង្វះកុងតឺន័រសម្រាប់ផ្ទុកអង្ករ និងថ្លៃដឹកជញ្ជូនតាមសមុទ្រនៅតែបន្តមានតម្លៃខ្ពស់ធៀបទៅរយៈពេលដូចគ្នា ៥ឆ្នាំចុងក្រោយ ដែលមានគម្លាតខ្ពស់ជាងរហូតដល់ជាង ៥ដង៕
រក្សាសិទ្ធិដោយ ៖ CEN
