សកម្មភាពជួញដូរក្នុងទីផ្សារមូលបត្រកម្ពុជា មានកំណើនគួរឲ្យកត់សម្គាល់ក្នុងអំឡុងពេលនៃការបិទខ្ទប់ ជាមួយនឹងកំណើនទំហំជួញដូរ និងបរិមាណជួញដូរជាមធ្យមប្រចាំថ្ងៃប្រមាណ ១៣ភាគរយ និង ១៩ ភាគ រយរៀងគ្នា ផ្អែកតាមការប្រើធៀបទិន្នន័យនៅ ១០ថ្ងៃមុន និង ១០ថ្ងៃកំឡុងពេលបិទខ្ទប់ ខណៈដែល សន្ទស្សន៍ផ្សារមូលបត្រកម្ពុជា ក៏បានកើនឡើងខ្ពស់បំផុត រហូតដល់ ៦៤៨,៣៣ពិន្ទុ នៅពាក់កណ្តាលពេលបិទខ្ទប់មុនពេលដាំក្បាលចុះ ដែលផ្ទុយពីរយៈពេលមុនពេលបិទខ្ទប់ដែលមិនសូវមានចលនាឡើងចុះ។
ទោះជាព្រឹត្តិការណ៍សហគមន៍នៃការរីករាលដាលជំងឺកូវីដ ១៩ ពីខែកុម្ភៈកន្លងទៅនេះ បណ្តាលឲ្យមានការ បិទខ្ទប់ តំបន់រាជធានីភ្នំពេញ និងក្រុងតាខ្មៅចាប់តាំងពីថ្ងៃទី ១៥ ខែមេសា ឆ្នាំ២០២១នេះក្តី ក្រុមហ៊ុនផ្សារមូលបត្រកម្ពុជា នៅតែអាចបន្តប្រតិបត្តិការយ៉ាងរលូនដោយគ្មានភាពរអាក់រអួល ហើយអាចដំណើរការប្រព័ន្ធជួញដូររបស់ខ្លួន ដោយគ្មានបញ្ហា។ មិនត្រឹមតែប៉ុណ្ណោះ សកម្មភាពជូញដូរបែរជាមានកើនឡើងគួរឲ្យកត់សម្គាល់។
សកម្មភាពជួញដូរភាគហ៊ុនបានកើនឡើងពេញមួយរយៈពេលនៃការបិទខ្ទប់នេះ។ ទំហំជួញដូរភាគហ៊ុនសរុបជាមធ្យមប្រចាំថ្ងៃបានឈានដល់ ២៤១,៦៣ លានរៀល (ប្រមាណជា ៦០ពាន់ដុល្លារអាមេរិក) ដែឡមានការកើនឡើងប្រមាណជា ១៣ភាគរយ បើប្រៀបធៀបទៅនឹងចំនួនជាមធ្យម ២១៤, ៥៩លានរៀល (ប្រហែឡជា ៥៤ ពាន់ដុល្លារអាមេរិក កាលពីរយៈពេល១០ថ្ងៃមុនការបិទខ្ទប់។ ស្រដៀងគ្នានឹងនេះដែរបរិមាណនៃការជួញដូរជាមធ្យមមានប្រមាណ ៤៤.៣១៨ ហ៊ុន ក្នុងមួយថ្ងៃ ក្នុងកំឡុងពេលនៃការបិទខ្ទប់ បើធៀបទៅនឹងចំនួនជាមធ្យម ៣៧.៣៥៨ ហ៊ុន ដោយមានការកើនឡើង ប្រហែល១៩ភាគរយ។ ទំហំជួញដូរភាគហ៊ុនក្នុងមួយថ្ងៃដែលខ្ពស់បំផុតក្នុងរយៈពេលបិទខ្ទប់មានចំនួនរហូតដល់ ៥៣១,៧៣ លានរៀល (ប្រមាណជា ១៣៣ពាន់ដុល្លារអាមេរិក) បើប្រៀបនឹងចំនួន ត្រឹម ៤២០,២១លានរៀល (ប្រមាណជា ១០៥ពាន់ដុល្លារអាមេរិក) ជាតួលេខខ្ពស់បំផុតក្នុងរយៈពេល១០ថ្ងៃមុនការបិទខ្ទប់នេះ។ កំណើននៃសកម្មភាពជួញដូរនេះ ក៏ពានផ្តល់ឥទ្ធិពលល្អ ដោយផ្ទាល់ផងដែរមកលើ សន្ទស្សន៍ផ្សារមូលបត្រកម្ពុជា ដែលបានធ្វើឲ្យពិន្ទុនៃសន្ទស្សន៍នេះឡើងមកដល់ចំណុចខ្ពស់ជាងគេសម្រាប់ឆ្នាំ២០២១ គិតត្រឹមពេលបច្ចុប្បន្ននេះ។
ចាប់ពីថ្ងៃជួញដូរដំបូងនៃការបិទខ្ទប់ សន្ទស្សន៍ផ្សារមូលបត្រកម្ពុជា បានកើនឡើងជាបន្តបន្ទាប់រហូតដល់កម្រិតខ្ពស់បំផុតគឺ ៦៤៨,៣៣ ពិន្ទុ កាលពីថ្ងៃពុធ ទី២៨ ហើយក្រោយមកដាំក្បាលចុះមកវិញយ៉ាងខ្លាំងនៅ២ថ្ងៃបន្ទាប់មុនពេលងើបឡើងបន្តិចមកវិញដល់ទីតាំងដើម។ ផ្ទូយទៅវិញ សន្ទស្សន៍កាលពីថ្ងៃ១០ថ្ងៃមុនការបិទខ្ទប់ ហាក់នៅនឹងមានការប្រែប្រួលតិចតួចក្នុងរង្វង់ពី ៦៣៨ ទៅត្រឹម ៦៤២ពិន្ទូប៉ុណ្ណោះ។
គួរឲ្យកត់សម្គាល់ផងដែរថាចំនួន បញ្ជាទិញនឹងលក់ប្រមាណ ៩៩ភាគរយ ក្នុងកំឡុងពេលបិខខ្ទប់បានធ្វើឡើងតាមរយៈប្រព័ន្ធជួញដូរចល័ត។ កំឡុងពេលបិទខ្ទប់នេះ បុគ្គលិករបស់ផ្សារមូលបត្រកម្ពុជា និងក្រុមហ៊ុនមូលបត្រធ្វើការពីផ្ទះដោយប្រើបច្ចេកវិទ្យាចូលក្នុងប្រព័ន្ធការិយាល័យពីចម្ងាយ ដើម្បីនៅតែអាចបន្តប្រតិបត្តិការទីផ្សារប្រចាំថ្ងៃជាធម្មតាដោយគ្មានឧបសគ្គអ្វីឡើយ៕
រក្សាសិទ្ធិដោយ ៖ CEN