ភ្នំពេញ ៖ ក្រសួងការងារ បណ្តុះបណ្តាលវិជ្ជាជីវៈ បានជំរុញដល់គ្រប់ភាគីពាក់ព័ន្ធ ត្រូវយកបញ្ហាប្រឈមនានា និងចំណុចសេសសល់ ដែលបានអនុវត្តក្នុងរឆ្នាំ២០១៧កន្លងនេះ ត្រូវមកពិភាក្សាគ្នារកវិធីដំណោះស្រាយ ឡើងបន្តអនុវត្ត ការងារឆ្នាំ២០១៨ ឲ្យបានប្រសើរឡើងវិញ។
ក្នុងសន្និបាតបូកសរុបលទ្ធផលការងារឆ្នាំ២០១៧ ទិសដៅការងារឆ្នាំ២០១៨ នៃការអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ២០១៤-២០១៨ នៅទីស្តីការ ក្រសួងការងារ កាលពីព្រឹកថ្ងៃទី១២ ខែមីនានេះ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និង បណ្តុះបណ្តាលវិជ្ជាជីវៈ បានលើកឡើងថា សន្និបាតនាពេលនេះ គឺរៀបចំឡើងក្នុងគោលបំណង ដើម្បីពិនិត្យមើលអំពីវឌ្ឍនភាពការងារប្រចាំឆ្នាំ២០១៧ នៃការអនុវត្តផែនការយុទ្ធសាស្ត្រអភិវឌ្ឍន៍ វិស័យការងារ និងបណ្តុះបណ្តាលវិជ្ជាជីវៈ ២០១៤ ២០១៨ និងបញ្ហាប្រឈមមួយចំនួន ដើម្បីដាក់ចេញនូវទិសដៅសម្រាប់អនុវត្តការងារនៅឆ្នាំ២០១៨ សំដៅបង្កើននូវប្រសិទ្ធភាពការងារឲ្យស្របទៅ និងកំណែទម្រង់ស៊ីជម្រៅ របស់រាជរដ្ឋាភិបាល ក៏ដូច គោលនយោបាយជាតិ ស្តីពីមុខរបរនិងការងារ ២០១៥- ២០២៥ និងគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ២០១៧-២០២៥។
លោក មបណ្ឌិត រដ្ឋមន្ត្រី បានបញ្ជាក់ថា ប៉ុន្មានខែកន្លងមកនេះ សម្ដេចតេជោ ហ៊ុន សែន បានចុះសួរសុខទុក្ខដល់កម្មករ វិនិយោជិក ដើម្បី ដោះស្រាយបញ្ហាធំៗជាច្រើន ក្នុងការលើកកម្ពស់ជីវភាពប្រជាពលរដ្ឋ និងរក្សាសេដ្ឋកិច្ចរបស់កម្ពុជាផងដែរ។ ដូចជាសាធារណៈជនបានជ្រាបហើយការលើកម្ពស់ជីវភាពប្រជាពលរដ្ឋ ពិសេសកម្មកតាមរោងចក្រ ពិតជាមានការយកចិត្តទុកដាក់ខ្ពស់ពីរាជរដ្ឋាភិបាលខ្លាំងណាស់។
លោកបណ្ឌិត រដ្ឋមន្ត្រី បានថ្លែងអំណរគុណ ចំពោះក្រសួង ស្ថាប័នពាក់ព័ន្ធ អង្គការមិនមែន រដ្ឋាភិបាលជាតិ អន្តរជាតិ ដៃគូរអភិវឌ្ឍនានា អង្គការវិជ្ជាជីវៈ សហជីព និងវិស័យឯកជន ដែលតែងតែគាំទ្រ និងផ្តល់នូវកិច្ចសហការជាមួយក្រសួងការងារ និងបណ្តុះបណ្តាលវិជ្ជាជីវៈ រួមចំណែកយ៉ាងសកម្មក្នុងការអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ក្នុងរយៈពេលកន្លងមក ដែលធ្វើឱ្យយើងសម្រេចបានជោគជ័យតាមការគ្រោងទុក ក្នុងការបង្កើតឱកាសការងារធ្វើ និងធានាបាននូវសុខដុមនីយកម្មរវាងកម្មករនិយោជិត និងនិយោជក។
លោករដ្ឋមន្ត្រីមានប្រសាសន៍បញ្ជាក់ថា សន្និបាតបូកសរុបលទ្ធផលការងារនាពេលនេះ គឺអនុវត្តតាមទិសស្លោក ងូតទឹក ឆ្លុះកញ្ចក់ ដុះក្អែល និងព្យាបាល ដើម្បីបង្កើនប្រសិទ្ធភាពនៃកំណែទម្រង់ទាំង ៥ របស់ក្រសួង។ លោក បានស្នើដល់សមាជិក សមាជិកាអង្គសន្និបាតទាំងមូល យកនូវបញ្ហាប្រឈមនានា និងចំណុចសេសសល់ ដែលបានអនុវត្តក្នុងរយៈពេលមួយឆ្នាំកន្លងនេះ តាមរយៈការធ្វើបទបង្ហាញតាមយុទ្ធសាស្ត្រនីមួយៗ ដើម្បីពិភាក្សាឱ្យបានផុលផុសរកឱ្យឃើញដំណោះ ស្រាយដ៏សំខាន់ៗ សម្រាប់ធ្វើជាទិសដៅក្នុងការអនុវត្តបន្ត សំដៅធ្វើឱ្យប្រសើរឡើងនូវសេវាផ្តល់ឱកាសការងារ និងការផ្តល់មុខជំនាញវិជ្ជាជីវៈឱ្យបានឈានទៅដល់កម្រិតមួយដ៏សមស្របបំផុត ក្នុងការចូលរួមធ្វើ សមាហរណកម្មរបស់សហគមន៍អាស៊ានប្រកបដោយគុណភាព ប្រសិទ្ធភាព ប្រសិទ្ធផល និងនិរន្តភាព រួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គម និងការកាត់បន្ថយភាពក្រីក្ររបស់ប្រជាពលរដ្ឋ៕ ដោយ៖បញ្ញាស័ក្តិ
