កោះកុង៖ ម្ចាស់អាជីវកម្មនេសាទសមុទ្រជាច្រើននៅខេត្តកោះកុង បានចាប់ផ្តើមទទួលកម្មករឲ្យចូលបម្រើការងារឡើងវិញ ជាធម្មតាហើយ ខណៈម្ចាស់អាជីវកម្មនេសាទសមុទ្រមួយចំនួនធំ បានកាត់បន្ថយស្ទើរគ្រប់ទីកន្លែង នៅក្នុងកំឡុងពេលពុំទាន់បើកឲ្យមានការធ្វើដំណើរឆ្លងកាត់ខេត្តនីមួយៗ។
កំពង់ផែដងទង់ ក្រុងខេមរភូមិន្ទ ជាជង្រុកដោះដូរសេដ្ឋកិច្ច ពាណិជ្ជកម្មមួយដ៏មានសក្កានុពលលើផ្នែកផលនេសាទសមុទ្ររបស់កម្ពុជា ឆ្ពោះទៅកាន់រាជធានីភ្នំពេញ និងបណ្តាខេត្តផ្សេងៗ។ អាជីវកម្មនេសាទ និងការលក់មុខទំនិញផ្សេងៗ ក៏បានចាប់ផ្តើមកម្រើកឡើងវិញដែរ ទាំងតម្លៃ និងការចរាចរណ៍ នៅលើទីផ្សារ បន្ទាប់ពីប្រមុខរាជរដ្ឋាភិបាលកម្ពុជាបានចេញសេចក្តីសម្រេចបើកឲ្យដំនើរការ ឆ្លងខេត្តទៅកាន់រាជធានីភ្នំពេញ ជាពិសេសនៅលើទីផ្សារតាមខេត្តតំបន់ឆ្នេរ។
អ្នកទទួលទិញផលនេសាទសមុទ្រ ប្រចាំកំពង់ផែដងទង់ផ្តើមមានការសប្បាយចិត្ត ខណៈប្រជានេសាទផ្តើមមានផលនេសាទ នាំចូលមកកាន់កំពង់ផែ ក្នុងតម្លៃមួយសមរម្យ។ អាជីវករ សុខ លាង ដែលជា អ្នកទទួល ទិញ ផល នេសាទសមុទ្រ បានលើកឡើងថា អ្វីគ្រប់យ៉ាងបានផ្តើមវិលត្រឡប់មក គ្រាន់បើបន្តិចហើយ ខណៈមានអតិថិជននៅរាជធានីភ្នំពេញ បានធ្វើការបញ្ជាទិញផលនេសាទបណ្តើរៗ ស្របពេលដែលប្រមុខរាជរដ្ឋាភិបាល បានចេញសេចក្តីសម្រេចបញ្ចប់ការបិទខ្ទប់ និងបើកឲ្យមានការចរាចរណ៍ឆ្លងខេត្តទៅកាន់រាជធានីភ្នំពេញ។
គួរបញ្ជាក់ថា កន្លងទៅអាជីវកម្មនេសាទនៅកំពង់ផែដងទង់ មានការធ្លាក់ចុះយ៉ាងខ្លាំងគ្រប់មុខទំនិញ ចាប់តាំងពីការផ្ទុះឡើងដំបូងនៃការឆ្លងរាលដាលជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ និងការបិទខ្ទប់ការធ្វើដំណើរឆ្លងកាត់ពីខេត្តនៅទូទាងប្រទេស៕
រក្សាសិទ្ធិដោយ ៖ CEN
