ខេត្តប៉ៃលិន ៖ ការចាប់យកមុខរបរចិញ្ចឹមមាន់ស្រែ តាមលក្ខណៈបច្ចេកទេសថ្មី ធ្វើឱ្យកសិករដែលចិញ្ចឹម ទទួល បានទិន្នផលខ្ពស់ ចំណេញច្រើន និងប្រើប្រាស់ដើមទុនតិចទៀតផង។ កសិករម្នាក់ រស់នៅសង្កាត់អូរតាវ៉ៅ ក្រុងប៉ៃលិន បានចាប់យកមុខរបរចិញ្ចឹមមាន់ស្រែបន្ថែម ដោយប្រើប្រាស់ដើមទុនតិចក្នុងការទិញចំណី បូករួមជាមួយនឹងបច្ចេកទេសផលិតចំណីធម្មជាតិទៀត ធ្វើឱ្យការប្រមូលផលលក់ម្តងៗ ទទួលបានប្រាក់ចំណូលខ្ពស់ សម្រាប់ផ្គត់ផ្គង់ជីវភាពប្រចាំថ្ងៃ។
លោក ចាន់ រក្សា កសិករចិញ្ចឹមមាន់ស្រែ បានឱ្យដឹងថា រយ:ពេលជិត១ឆ្នាំមកហើយ រហូតមកដល់ពេលនេះ ដែលលោកបានចិញ្ចឹមមាន់ស្រែ ប្រភេទមាន់ស្គួយ មានសាច់ណែន និងជើងលឿង ដោយចាប់លក់បានរយ:ពេល៣ដងមកហើយ។
លោកបានប្រើចំណីជារបៀបធម្មជាតិ ដោយមានពោតក្រហម កិនលាយជាមួយដើមស្មៅ ដែលការលាយផ្សំនេះ មានតម្លៃថោកបំផុត ១គីឡូក្រាម អស់ត្រឹមតែ៤០០ទៅ៥០០រៀល ប៉ុណ្ណោះ រីឯចំណីទិញនៅទីផ្សារ ក្នុង១គីឡូក្រាម ត្រូវចំណាយអស់២០០០ទៅ២៥០០រៀលឯណោះ។ ដូចនេះការផលិតចំណីខ្លួនឯងធ្វើឱ្យចំណាយ ដើមទុនតិច តែចំណេញច្រើន។ ជាមួយគ្នានេះ លោកក៏បានសំនូមពរ ដល់មន្ទីរកសិកម្មខេត្ត បន្តចុះទៅបង្រៀនពីរបៀបថែទាំ និងបច្ចេកទេសចិញ្ចឹមមាន់ស្រែបន្ថែមទៀត ព្រមទាំងជួយរកទីផ្សារលក់ដូរផងដែរ ពីព្រោះថាការលក់ដូរនាបច្ចុប្បន្ននេះ មិនទាន់មានទីផ្សារទូលំទូលាយនៅឡើយទេ។
គួររម្លឹកថា ស្ថិតក្នុងបរិបទការឆ្លងរាលដាលនៃជំងឺកូវីដ ១៩នេះ អាជ្ញាធរមូលដ្ឋាន បានលើកទឹកចិត្ត ដល់ ប្រជា កសិករ ឱ្យ បន្ថែម មុខរបរចិញ្ចឹមមាន់ស្រែ ដើម្បីជួយដល់ស្ថានភាពជីវភាពរបស់ប្រជាពលរដ្ឋ សំដៅធ្វើយ៉ាងណាឱ្យជីវភាពកាន់តែប្រសើរ ពីព្រោះថាមាន់ស្រែនេះ ក្នុងខេត្តប៉ៃលិនទាំងមូល មិនទាន់មានការផ្គត់ផ្គង់ គ្របគ្រាន់នៅឡើយទេ៕ រក្សាសិទ្ធិដោយ ៖ CEN
