ខេត្តមណ្ឌលគិរី៖ កូនសិស្សជាប់ចំណាត់ថ្នាក់លេខ១ ខាងអក្សរសាស្ត្រខ្មែរ ប្រចាំខេត្តមណ្ឌលគិរី កំពុងជួបបញ្ហាជីវភាពទីទល់ក្រយ៉ាងខ្លាំង ដែលបច្ចុប្បន្នគាត់រស់នៅក្នុងផ្ទះ ឬខ្ទមធ្លុះធ្លាយដំបូលរហែកតូចមួយនៅ ភូមិពូរ៉ាដែត ឃុំ ស្រែពូម ស្រុកពេជ្រាដា ខេត្តមណ្ឌលគិរី ។
តាមរយៈ លោកនាយកសាលាអនុវិទ្យាល័យអូតរផ្លាយ លោក ប៉ាល់ សិនេ ឲ្យដឹងថា កូនសិស្សស្រីម្នាក់នេះ មានឈ្មោះ ថន រដ្ឋា រៀននៅថ្នាក់ទី៩ នៃអនុវិទ្យាល័យអូរផ្លាយ។ លោកគ្រូបន្តថា សិស្សម្នាក់នេះ ជាសិស្សឧស្សាហ៍ព្យាយាមក្នុងការរៀនសូត្រ ហើយជាសិស្សស្រីដ៏ឆ្នើមនៅអនុវិទ្យាល័យនេះ និងជាសិស្សពូកែ ខាងអក្សរសាស្ត្រខ្មែរជាប់ចំណាត់ថ្នាក់លេខ១ ប្រចាំខេត្តមណ្ឌលគិរី ដែលទើបប្រលងថ្មីៗនេះ ក្នុងចំណោមបេក្ខជនជាង ៥០០នាក់ទៀតផង និងត្រៀមទៅប្រលងថ្នាក់ជាតិជាបន្តទៀត នៅឯខេត្តកំពុងចាម នាពេលខាងមុខ។ លោកបន្តថា បច្ចុប្បន្នកូនសិស្សឈ្មោះ ថន រដ្ឋា កំពុងជួបបញ្ហាជីវភាពជាខ្លាំង ដោយក្រុមគ្រួសារស្ទើរពុំមានលទ្ធភាព ដើម្បីអោយកូនបន្តការសិក្សាទៅហើយ។ លោកគ្រូបន្តថា ក្រុមគ្រួសារ សិស្សស្រីម្នាក់នេះ ពុំមានមុខរបរសមរម្យនោះទេ គឺក្រុមគ្រួសារគាត់ ដើរស៊ីឈ្មួញគេ គ្រាន់បានកម្រៃបន្តិចបន្តួច ដើម្បីដោះស្រាយជីវភាពប្រចាំថ្ងៃ សម្រាប់តែមួយថ្ងៃតែប៉ុណ្ណោះ។
លោក សេង ថន និងអ្នកស្រី ទឹង រេន ជាឪពុកម្ដាយ ក្មេងស្រីខាងលើបានរៀបរាប់ថា គាត់មានកូនចំនួន ២នាក់ ស្រី១ ប្រុស១ សព្វថ្ងៃប្រកបរបរដើរស៊ីឈ្មួលគេ ដូចជា ដកដំឡូង សំអាតស្មៅ ប៉េះម្រេច ដោយទទួលបានកម្រៃបន្តិចបន្តួចប៉ុណ្ណោះ។ ក្រៅពីការងារស៊ីឈ្នួលគេ ពួកគាត់បានដើររើស ធ្យូង ដែលសេសសល់ពីការដុតចំការ របស់អ្នកភូមិ យកទៅលក់ ដើម្បីបានប្រាក់អោយកូនបានទៅរៀន។ លោកឲ្យដឹងទៀតថា ទោះបីជាជីវភាព របស់ក្រុមប្រចាំថ្ងៃគ្រួសារដុនដាបយ៉ាងណា ក៏លោកមិនអោយកូនឈប់ពីការសិក្សានោះទេ។ លោកថា បច្ចុប្បន្នគាត់គ្មានផ្ទះសំបែងរស់នៅឲ្យបានសមរម្យទេ ដោយ រស់នៅក្នុងខ្ទមតូចដំបូលធ្លុះធ្លាយ ដែលគាត់សុំដីអ្នកស្រុកជិតខាង ដើម្បីសងខ្ទមនេះរស់នៅ។
គួររំលឹកថា កាលពីព្រឹកថ្ងៃទី១៤ ខែមីនា ឆ្នាំ២០១៨ ក្រុមការងាររបស់រដ្ឋាបាលសាលាខេត្តមណ្ឌលគិរី ក៏បាននាំថវិកាចំនួន ៥០ម៉ឺនរៀល និងថវិកា ១០ម៉ឺនរៀលទៀត របស់ភ្ញាក់ងារ TVហង្សមាសខេត្តមណ្ឌលគិរី យកទៅផ្តល់ជូនដល់ក្រុមគ្រួសារប្អូនស្រីជាសិស្សពូកែលេខ១ មុខវិជ្ជាអក្សរសាស្ត្រខ្មែរ ប្រចាំខេត្តមណ្ឌលគិរី ដើម្បីជួយដោះស្រាយជីវភាពរយៈពេលខ្លី។ យ៉ាងនេះក្តី ក្រុមគ្រួសារកុមារីខាងលើនេះ បានអំពាវនាវដល់សប្បុរសជនជួយឧបត្ថម ជាពិសេស បើត្រូវការកំលាំងពលកម្ម ស្នើផ្តល់ឱកាសការងារដល់រូបគាត់ ឬជួលពួកគាត់ទៅធ្វើការអោយ ដើម្បីការងារធ្វើ បានកម្រៃខ្លះ ដើម្បីផ្គត់ផ្គងកូនរៀនផង និងសម្រាប់ចិញ្ចឹមជីវិតគ្រួសារផងដែរ។ ចំណែក កុមារី ឈ្មោះ ថន រដ្ឋា ដែលជាសិស្សពូកែមុខវិជ្ជាអក្សរសាស្ត្រខ្មែ ប្រចាំខេត្តមណ្ឌលគិរី ក៏បានឲ្យដឹងដែរថា ក្រៅអំពីមានជីវភាពខ្វះខាត រូបគេក៏ចង់មានកង់ជិះទៅសាលារៀន ដែលមានចម្ងាយឆ្ងាយពីផ្ទះមួយគ្រឿងជាចាំបាច់ដែរ ព្រោះកង់ របស់ក្មួយស្រីធ្លាប់ជិះបានខូចប្រើប្រាស់លែងកើតទៀតហើយនៅពេលនេះ៕ ដោយ៖ សមុទ្រឈើ
