ស្វាយរៀង ៖ លោកជំទាវឧបនាយករដ្ឋមន្ត្រី ម៉ែន សំអន សមាជិកអចិន្ត្រៃយ៍គណ:កម្មាធិការកណ្ដាល គណបក្សប្រជាជនកម្ពុជា និងជាប្រធានក្រុមការងារថ្នាក់កណ្ដាល គណបក្សប្រជាជនកម្ពុជាចុះជួយខេត្តស្វាយរៀង បានថ្លែងទៅកាន់សមាជិកអង្គសន្និបាត ត្រូវបន្តការយកចិត្តទុកដាក់ដោយខានមិនបាន លើការគ្រប់គ្រងសមាជិកគណបក្សឲ្យបានច្បាស់លាស់ ជាពិសេសមន្ត្រីបក្សគ្រប់ផ្នែកត្រូវប្រព្រឹត្តតែអំពើល្អ ដោះស្រាយរាល់សំណូមពររបស់ប្រជាជន និងការកសាងសមិទ្ធផលលើគ្រប់វិស័យ។
លោកជំទាវ ថ្លែងបែបនេះ នៅព្រឹកថ្ងៃសុក្រ ទី១៦ ខែមីនា ឆ្នាំ២០១៨ ទៅកាន់សមាជិកអង្គសន្និបាតចំនួន ៨៣០នាក់ ក្នុងឱកាសអញ្ជើញជាអធិបតីសន្និបាតបូកសរុបលទ្ធផលការងារបក្សប្រចាំឆ្នាំ២០១៧ និងទិសដៅភារកិច្ចការងារឆ្នាំ ២០១៨ របស់គណបក្សប្រជាជនកម្ពុជាខេត្តស្វាយរៀង។
លោកជំទាវ បានធ្វើការកត់សម្គាល់នៅក្នុងឆ្នាំ២០១៧ ទោះបីខេត្តត្រូវប្រឈមនឹងការលំបាកជាច្រើនក្ដី ក៏និន្នាការរីកចម្រើនលើគ្រប់វិស័យនៅតែរក្សាបាន សេដ្ឋកិច្ចមានការរីកចម្រើនទៅមុខ ភាពក្រីក្រត្រូវបានកាត់បន្ថយ តាមរយ:ការកសាង ជួសជុល កែលម្អរហេដ្ឋារចនាសម្ព័ន្ធ និងផ្ដល់កម្មសិទ្ធិដីធ្លីជូនដល់ប្រជាពលរដ្ឋ។ ជាពិសេស ការខិតខំប្រឹងប្រែងរបស់ក្រុមការងារគ្រប់ជាន់ថ្នាក់របស់គណបក្សប្រជាជនកម្ពុជា បានធ្វើឲ្យការបោះឆ្នោតព្រឹទ្ធសភានីតិកាលទី៤ និងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ បានទទួលជ័យជំនះយ៉ាងច្រើនសន្ធឹកសន្ធាប់ជាបន្តបន្ទាប់។
ឆ្លៀតក្នុងឱកាសនោះ លោកជំទាវក៏បានអំពាវនាវអោយមានការពិនិត្យ បន្តការយកចិត្តទុកដាក់កិច្ចការទិសដៅភារកិច្ច និងត្រៀមខ្លួនអនុវត្តផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី៦ នាពេលខាងមុខ។ គណ:កម្មាធិការគណបក្សស្រុក-ក្រុង ឃុំ-សង្កាត់ មន្ត្រីគណបក្សគ្រប់ជាន់ថ្នាក់ ត្រូវបន្តក្តាប់នូវការងារជាយុទ្ធសាស្ត្រ ជំរុញការអនុវត្តកម្មវិធីនយោបាយរបស់បក្សក្នុងការអភិវឌ្ឍឃុំ-សង្កាត់ ដោះស្រាយបញ្ហានៅតាមមូលដ្ឋានរបស់ខ្លួន។ លើសពីនោះទៀត ត្រូវបន្តផ្សព្វផ្សាយអប់រំណែនាំអំពីផែនការឧបាយកលពិសពុលរបស់គណបក្សសង្គ្រោះជាតិ ដែលឃុបឃិតជាមួយបរទេសក្នុងការផ្តួលរំលំរដ្ឋអំណាចស្របច្បាប់ តាមរយ:ការធ្វើបដិវត្តពណ៌។
ក្នុងពិធីនេះដែរ ឯកឧត្តម ម៉ែន វិបុល ប្រធានគណ:កម្មាធិការគណបក្សប្រជាជនកម្ពុជាខេត្តស្វាយរៀង បានមានប្រសាសន៍ ក្រោមមាគ៌ាដឹកនាំដ៏ឆ្នើម និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ដែលមានគោលនយោបាយត្រឹមត្រូវ បានធ្វើឲគណបក្សប្រជាជនកម្ពុជាខេត្តស្វាយរៀង មានសាមគ្គីភាព និងឯករាជ្យភាពផ្ទៃក្នុងរឹងមាំ ធ្វើជាមូលដ្ឋានបង្អែកក្នុងការដឹកនាំ កសាង និងអភិវឌ្ឍន៍ខេត្ត អោយមានការរីកចម្រើនឈានឡើងជាលំដាប់។ ឯកឧត្តមបានសម្តែង និងថ្លែងអំណរគុណចំពោះក្រុមការងារថ្នាក់កណ្ដាល ចុះជួយខេត្ត ស្រុក-ក្រុង ឃុំ-សង្កាត់ ដែលបានរួមចំណែកឧបត្ថម្ភគាំទ្រ ទាំងថវិកា និងសម្ភារ:ដល់បណ្ដាមូលដ្ឋាន ធ្វើឲ្យខេត្តស្វាយរៀងរក្សាបានប្រៀប ឈ្នះ និងរីកចម្រើនឥតឈប់ឈរ៕ ដោយ ៖ ភក្តី