ភ្នំពេញ ៖ បុរសជាកម្មករបូមខ្សាច់ម្នាក់បានដើររអិលជើងធ្លាក់ចូលក្នុងទុយោបូមខ្សាច់ បណ្ដាលឲ្យស្រូបថប់ដង្ហើមស្លាប់យ៉ាងអាណោធអាធ័ម ក្នុងដេប៉ូខ្សាច់ដ៏ធំមួយបង្កការភ្ញាក់ផ្អើលដល់សមត្ថកិច្ចនិងប្រជាពលរដ្ឋជិតខាង។
ហេតុការណ៍ភ្ញាក់ផ្អើលនេះដែរ បានកើតឡើងកាលពីវេលាម៉ោង៧និង០០នាទីយប់ ថ្ងៃទី៣ ខែមិថុនា ឆ្នាំ២០២១ នៅចំណុចដេប៉ូខ្សាច់ដីឡូតិ៍លេខ៥៣៤ តាមបណ្ដោយផ្លូវជាតិលេខ២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ជនរងគ្រោះមានឈ្មោះ ឆន សម្បតិ្ត ភេទប្រុស អាយុ២២ឆ្នាំ ជាកម្មករបូមខ្សាច់ បច្ចុប្បន្នស្នាក់នៅកន្លែងកើតហេតុខាងលើ មានស្រុកកំណើតនៅខេត្តតាកែវ ។
បើយោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញជនរងគ្រោះខាងលើ បានដើរទៅក្បែរទុយោបូមខ្សាច់ដោយមិនប្រយ័ត្នក៏រអិលជើងធ្លាក់ចូលទៅក្នុងទឹកត្រូវម៉ាសុីនបូមខ្សាច់ស្រូបចូលទៅខាងក្នុងទុយោបណ្ដាលឲ្យជនរគ្រោះដកដង្ហើមមិនរួចក៏ថប់ដង្ហើមស្លាប់បាត់បង់ជីវិតនៅនឹងកន្លែងតែម្តងទៅ។
ក្រោយពេលកើតហេតុសមត្ថកិច្ចមូលដ្ឋានចុះមកដល់ចំណុចកើតហេតុបានទាក់ទងទៅខាងសមត្ថកិច្ចជំនាញកោសល្យវិច្ច័យឲ្យចុះមកត្រួតពិនិត្យទៅលើសពរួចក៏ប្រគល់សពឲ្យទៅក្រុមគ្រួសារយកទៅធ្វើបុណ្យតាមប្រពៃណី៕ រក្សាសិទ្ធិដោយ៖ សាមេត
